Xo̱jo̱n Salmoo̱ 61 - Xo̱jo̱n eén Néná

Chínní ngayeje ni̱xtjin nga kotíjña̱ an nga̱sondie

Só xi katsꞌénda Ndabii̱.

¹ ¡Ji Ne, ndaꞌyé ji nga ni̱ma̱ tꞌíxián an, kó ti̱ꞌinsénní nga kuichjiaá!

² ¡Kjiꞌanga je ngiti̱ chikjo̱a̱jiín ini̱ma̱na, ji chjiaá ndeskande nínga fetꞌanii̱ nga̱sondiee̱! ¡Ki̱a̱ tꞌenje̱ní nínga tikón ndi̱jo̱je xi nkꞌa ngase tikón, ta̱bo̱a̱jínnii̱ an!

³ ¡Ngatꞌa̱ jí boá xi ngi̱ndie nínga chonna! ¡Jí boá xi ngo tarié xi ꞌniú tikón, xi konna kjo̱a̱a̱ kondra̱na!

⁴ Mejénna nga ngatsjéni̱xtjin kotíjña̱ an ki̱a̱ na̱ngo̱xi̱ ndikóo̱n, ko̱jo nga nda kotíjña̱ an ki̱a̱ ngindie nga̱a̱ nga xchínní.

⁵ Ngatꞌa̱ ji Ne, jè kandaꞌyé ji ni xi kixiyatjoón nga sa̱ꞌinkjatjosón an, jí boá xi katseꞌée̱ tꞌanangi xota̱ na̱xi̱ńdá xí bendikón jaꞌée̱n.

⁶ Jí boá xi ko̱e̱ꞌé ngasée̱ kjín nó xí kꞌuijñá nga̱sondie nda̱ ree̱, kó tsie ka̱maa̱ nga kꞌuijñá, kjín xota̱ tji̱e̱ kjo̱a̱ꞌa nga kꞌuijñá.

⁷ Kó ngatsjéni̱xtjin nga kꞌuijñá ki̱a̱ ngindyi̱ko̱n Néná, ¡tꞌíjñinde ji kjo̱a̱ni̱ma̱takón ko̱jo kjo̱a̱kixi̱ tsi̱ꞌe̱ nga xchoón!

⁸ Bo̱a̱ tsꞌén siée̱ salmo̱ jaꞌée̱n ngatsjéni̱xtjin, kó ndyiojón ndyiojón sa̱ꞌinkjatjosoón ni xi kixiyatjoón nga sa̱ꞌin an.