Xo̱jo̱n Salmoo̱ 6 - Xo̱jo̱n eén Néná

Bi̱ tsꞌén ndokjo̱a̱a̱ Néná nga tjibítja ngo kjo̱a̱niꞌin

Só xi katsꞌénda Ndabii̱.

¹ Ji Ne, ngata̱ niꞌínxchínje̱jínní kjiꞌanga xtii̱, ti̱nde ngata̱ botíjéjínní kjiꞌanga ꞌniú tiniꞌínxchín jí,

² ngatamani̱ma̱a̱ an Ne, ngatꞌa̱ jè kjiꞌme an. Ti̱ꞌindayení, ngatꞌa̱ ngayeje ńdana je kjifotsié má,

³ kó yojona achichí kjifotsié nga, ngaskande kjiꞌání nga ko̱si̱ke̱jení ji Ne.

⁴ ¡Tsitsíjin nginí, kó ꞌna̱xiéꞌéní! ¡Ta̱ngatꞌanii̱ kjo̱a̱ni̱ma̱takóo̱n, ꞌniú míꞌaá nga ko̱ꞌna̱xiéꞌéní!

⁵ Ngatꞌa̱ jmíjín xi kjo̱a̱ꞌátsjiee̱n ji ki̱a̱ nínga síndo xota̱ xi je jesoón, kó ki̱a̱ nga̱tsjo̱ó, ꞌyá xí sa̱ꞌíntsjaá jí.

⁶ ¡Jè jenda an nga ta̱soboá tsꞌénkjandá án! Xki̱ jñó xki̱ jñó ni̱ma̱ kjandá án, kó ndándyíkón án tsꞌénkꞌándyi̱ má ṉchanna.

⁷ Nde ngiti̱ ndajín tsijenna, ta̱ngatꞌanii̱ kui kjo̱a̱ni̱ma̱a̱, ¡jè kjima ti̱ka̱ má an, ta̱ngatꞌanii̱ ngayeje kondra̱na!

⁸ ¡Jún xota̱ xi ndajín, kjin ti̱ꞌankjaꞌájnúꞌun yojojnú, ngatꞌa̱ Néná je tsintꞌié nga tsꞌénkjandá án!

⁹ ¡Néná je tsintꞌié nga ni̱ma̱ tꞌíxián an, Néná je iskjíbé énna nga tsꞌénchji̱a̱a̱!

¹⁰ Ngayeje kondra̱na, kjo̱a̱soboá si̱ꞌankjaꞌa ko̱jo si̱ꞌantsobéjii̱n. ¡Ta̱niján ma kji̱ndi̱bá nga ko̱nga, nga kjo̱a̱ꞌa kjo̱a̱soboá!