Xo̱jo̱n Salmoo̱ 58 - Xo̱jo̱n eén Néná

Jí boá ngo Ne xi kixi̱

Só xi katsꞌénda Ndabii̱.

¹ Ngo ni kosíyájnúꞌun, jún xi xota̱xá xí botíxomájnú. A ja̱koxi̱ boá nga ni xi kixi̱ xi ꞌmíyajnú. A kixi̱ ndyi̱niꞌánjéjnúu̱ xota̱ nga̱sondiee̱.

² ¡Jmí, ta̱sá ngi̱jin ini̱ma̱jnú ni xi ndajín ꞌbíjinjnú! ¡Kó ndsa̱jnú je tjikítsie maá ni xi ndajín xi je kjifochó ngayeje nga̱sondiee̱!

³ Xota̱ xi ꞌniú ndajiín, jè ndajín ndeskande ngindiee̱ nga stse̱én, xota̱ xi ndisoo̱ ndeskande nga síndo ngi̱ya ndo̱bo̱a̱ndií na̱áa̱n nga jè ndajín.

⁴ Kui xotaa̱ tsꞌénꞌónná eén nga chji̱a̱, xikó maá tsi xaán ye̱ tjiín. Xaán ye̱ xi xtiya, xi ꞌbíchjá tji̱bo̱a̱nijoo̱n,

⁵ tsi̱ꞌe̱ nga ku̱i̱ntꞌièjiín ni xi tsó nda̱ tjiꞌee̱ ndatsi ta̱nisién ꞌniú maá nga tsꞌén kjo̱a̱tjiꞌe.

⁶ Ji Ne, ¡chjátꞌé jí ṉꞌni̱u̱ kui xotaa̱! Ji Ne, ¡chjátꞌé jí ṉꞌni̱u̱ kui xandi̱je̱e̱!

⁷ ¡Ti̱ꞌincheje ji xikó má maá ndáfoaa̱ kjiꞌanga chaja nga mindyia ngi̱ya ndsa̱! ¡Kjiꞌanga skji̱ní yáyojoó, ti̱ꞌinxi̱ ji kui nii̱!

⁸ ¡Ti̱ꞌin ji nga ka̱mańdá xikó maá cho̱na̱je̱nńñaá nga fí! ¡Bo̱a̱ ngatamaa̱ xikó maá ndí xtió xí bejín ndiꞌií tsꞌueé!

⁹ ¡Ngindiee̱ nga sku̱i̱e̱ ti̱jíjnú nga je tjítí ndaꞌyaá! ¡Skjifé tjo̱o̱, ndatsi to̱kó síndo ngase, ko̱jo ndatsi ndyi̱tsꞌènxchán!

¹⁰ Achichí tsjá ka̱maa̱ xota̱ xi kixi̱i̱ nga sku̱i̱e̱ nga je kiniꞌángojo, ko̱jo nga ki̱a̱ ko̱níjónni se jiín kui xota̱ xi ꞌniú ndajiín.

¹¹ Kósꞌe̱ bi̱ ka̱tso̱ xota̱ nga̱sondiee̱: «¡Nga ja̱koxi̱, tsꞌén ngo ni xi niꞌán xota̱ xi kixi̱i̱! ¡Ja̱koxi̱ boá nga tikón ngo Néná xí kixí tsꞌén tsꞌenseén xotaa̱ kui nga̱sondiee̱!»