Xo̱jo̱n Salmoo̱ 57 - Xo̱jo̱n eén Néná

Mejénna nga ji xi xchínní

Ndabii̱ katsꞌénda kui soó kjiꞌanga tsangaa̱ Sauu̱l, kósꞌe̱ ngo ti̱xa̱na̱xi̱ kijíkꞌíjñaꞌma.

¹ ¡Ngatamani̱ma̱a̱ an, ji Ne! ¡Ngatamani̱ma̱a̱ an! ¡Ngatꞌa̱ jí boá xi kjimaꞌniátakoón, kó ki̱a̱ kotíjña̱ nga xchínní ngindie tji̱nkꞌi̱e̱én nga̱a̱, ngaskande nga kjo̱a̱ꞌa ni xi ndajiín!

² Néná xí tikón nkꞌajmii̱ boá xi ꞌniú kuichjiáa̱, ngatꞌa̱ kuí boá xi ngatsjéni̱xtjin nga bosikójona.

³ Kuí boá xi ndeskande nkꞌajmii̱ kꞌo̱xiéꞌána, kjo̱a̱a̱ xota̱ xi ndajín tsꞌénjo̱na. ¡Néná boá xi sa̱ngíyá kjo̱a̱ni̱ma̱takoón ko̱jo kjo̱a̱kixi̱i̱!

⁴ Jè ngaskande xikoó tsi ngi̱jii̱n xandi̱je̱ je tikón kjo̱a̱mindyionna, jè ki̱a̱ kjiꞌijña an ki̱a̱ ngi̱jii̱n xota̱ xi ndiꞌí tsꞌénkjasó, kui xi ṉꞌni̱u̱ ja̱kon yáyojó xi niꞌánkꞌién xota̱ má kon, ko̱jo na̱je̱n ja̱kon ki̱cha̱ndojó xi yojó má kon.

⁵ ¡Ngachjaninkꞌa jaꞌée̱n ndeskande nga̱soón nkꞌajmii̱ ji Ne! ¡Kjo̱a̱je xi tjiín ngasꞌie ngayeje nga̱sondiee̱!

⁶ Ngo chja̱ya̱ íjñá tsi̱ꞌe̱ nga ki̱a̱ kꞌo̱ka an nga kjo̱a̱ꞌa an, kó ini̱ma̱na achichí nda̱ kamaá, ngo ti̱xa̱ katsꞌénda ngindyikón án, ta̱nga ta̱sá ti̱ kuii̱ xi ixóyà.

⁷ Ji Ne, ini̱ma̱na jè tikónnda nga mejeén si̱eé só, kó si̱eé só ko̱jo salmo̱.

⁸ ¡Jè mejénna nga kjo̱a̱ꞌána! ¡Kó sa̱ꞌinkjanie an arpaa̱ ko̱jo salterioo̱! ¡Ta̱jñó kjo̱stjíe̱n an!

⁹ Sa̱ꞌintsjaá ngi̱jii̱n nangii̱ ji Ne, kó si̱eé salmo̱ ngi̱jii̱n na̱xi̱ńdaá.

¹⁰ Ngatꞌa̱ achichí je kjo̱a̱ni̱ma̱takóo̱n nga ngaskande nkꞌajmii̱ fochó, kó ngaskande ngi̱jin ṉdi̱i̱ fochó kjo̱a̱kixi̱i̱.

¹¹ ¡Ngachjaninkꞌa jaꞌée̱n ndeskande nga̱soón nkꞌajmii̱ ji Ne! ¡Kjo̱a̱je xi tjiín ngasꞌie ngayeje nga̱sondiee̱!