Xo̱jo̱n Salmoo̱ 56 - Xo̱jo̱n eén Néná

Ma ꞌniáko̱n an ni xi kiꞌmíyetjén

Ndabii̱ katsꞌénda kui soó kjiꞌanga xota̱ Filisteaa̱ katsoboá ki̱a̱ nangi Ngaa̱nd.

¹ Ji Ne, ngatamani̱ma̱a̱ an, ngatꞌa̱ xota̱ nga̱sondiee̱ mejeén skji̱ni̱e̱na. Kjánjo̱na, kó ngatsjéni̱xtjin nga mongatji̱ngina.

² Nga ngo ni̱xtjii̱n nga ndyi̱tsjániéna kondra̱na, ¡achichí má xi nkꞌakon maa̱ yojoo̱ nga ndyi̱kjánjo̱na!

³ Ni̱xtjin nga tsakjon má an, jí boá xi kjimaꞌniákoo̱n, ji Ne.

⁴ Néná boá xi tsꞌéntsjaà, kjo̱a̱a̱ eén, Néná boá xi kjimaꞌniátakón an, kó ngiti̱ tsakjonjín an. ¡Mí ni xi ka̱ma sa̱ꞌínjo̱na xota̱ nga̱sondiee̱!

⁵ Nga ngo ni̱xtjii̱n nga ndyi̱bosíkjo énna, kó ta̱soboá ndyi̱tsꞌènkjó nga ni xi ndajín mejeén sa̱ꞌínjo̱na.

⁶ Ndyi̱ꞌbitíkó yojoo̱, ko̱jo ndyi̱kondaꞌmana, kó ndyi̱kotsijee̱n ni xi tsꞌen an, ¡achichí mejeén nga sa̱ꞌínkꞌiénna!

⁷ Ji Ne, a ka̱márií kjo̱tjongii̱ yojoo̱ kjo̱a̱a̱ ni xi ndajín xi tsꞌén, ¡ji Ne, nga si̱ꞌinxchín jí, ti̱ꞌinkjie ji kui xota̱ na̱xi̱ńdaá!

⁸ Jè tjixkíi̱ xikó kjiꞌi ndi̱yà jè tsanga an, ki̱a̱ tindyie ji ndándyíkón án ki̱a̱ ngi̱yaa̱ chi̱tsée̱n, a jèjín ki̱a̱ kjitꞌa ki̱a̱ xo̱jo̱o̱n kui nii̱.

⁹ Ni̱xtjin nga kuichjiaá nga ko̱si̱ke̱jení, ko̱ngandikón kondra̱na. Jè be an kui nii̱, ngatꞌa̱ Néná boá tikón kjo̱a̱nda tsa̱ꞌa̱n.

¹⁰ Ji Ne ta̱ngatꞌanii̱ ée̱n nga tsꞌéntsjaà, Ji Ndi̱a̱, ta̱ngatꞌanii̱ ée̱n nga tsꞌéntsjaà.

¹¹ Néná boá xi kjimaꞌniáko̱n an, kó stsakjonjín an. ¡Mí ni xi ka̱maa̱ sa̱ꞌínjo̱na xota̱ nga̱sondiee̱!

¹² Ji Ne, foaꞌátsjienna ni xi kixiyatjoón nga sa̱ꞌinkjatjosón an, kó kꞌuichjíñaá nga tsjaa̱ kjo̱a̱tjó nga sa̱ꞌintsjaá.

¹³ Ngatꞌa̱ jí boá kaꞌnaxiéꞌéní ngi̱ya tsja kjo̱a̱bo̱yaa̱, kó akasíke̱jení nga tsꞌákajín an, tsi̱ꞌe̱ nga ki̱a̱ kotíjña̱ an ngindyikin ji ki̱a̱ nínga tikón ndiꞌií kjo̱a̱mindyioo̱n.