Xo̱jo̱n Salmoo̱ 55 - Xo̱jo̱n eén Néná

Ngatsjéni̱xtjin nga Néná ꞌniáko̱n an

Só xi katsꞌénda Ndabii̱.

¹ Ji Ne, ndaꞌyé ji nga kuichjiaá, kó ti̱ꞌinsénní nga ni̱ma̱ xiaán.

² ¡Ngo kjo̱a̱nda míꞌaá, tꞌíyéní mí ni xi sa̱ꞌin an! Jè ngiti̱ ndajín tikón yojona, kó achichí nda̱ kjimana.

³ Achichí tsakjon má an nga ntꞌièe̱ nga chji̱a̱ kondraa̱, ko̱jo nga tsꞌénna kjo̱a̱ꞌniú xota̱ xi ndajiín, ngatꞌa̱ ni xi ndajín ꞌbíniéna, kó achichí ꞌniú mongatji̱ngina ngijee̱.

⁴ Achichí on kjimaa̱ ini̱ma̱na, kó ndikoón kjo̱a̱bo̱yaa̱ je tikónniéna.

⁵ Kjifotsié ndikón má an nga tsꞌéntsakjon an, ¡achichí ndikón jè ndyi̱a̱ an!

⁶ Kósꞌe̱ bi̱ xian an: ¡ꞌYá xí ka̱maa̱ tsja̱ana tsja̱nga̱a̱ tójo katsaki! Kjuíntji̱e̱nra̱ an, kó sa̱kóra̱na ngi̱ndie nínga sa̱ꞌinkjaꞌyá an!

⁷ Ja̱koxi̱ boá nga achichíra̱ kjin kjuín án, ¡kó ki̱a̱ra̱ kotíjña̱ an ki̱a̱ nangi kixií!

⁸ ¡Achichíra̱ tsá kongase an ngo ngindie nínga kotíjña̱ an, nínga jmí ni sa̱ꞌínjo̱jínna tjo̱o̱ ko̱jo stséꞌniuú!

⁹ Ti̱ꞌinkjatsén ji Ne, ti̱ꞌintsobéjìi̱n ni xi ndyi̱chji̱a̱, ngatꞌa̱ jè kamábe an nga ki̱a̱ ngi̱jii̱n na̱xi̱ńdáꞌniuú ta̱ kjo̱a̱bixkán ko̱jo ni xi ndajín tsí xi tjín.

¹⁰ Ni̱xtjin ni̱xtji̱e̱n nga ki̱a̱ ndyi̱foaꞌatjiyajoo̱n xó xí tjíchjáꞌyáni na̱xi̱ńdáꞌniúu̱, kó ni xi ndajiín ko̱jo ni xi jmíjiín kjo̱a̱kixi̱i̱, ngi̱yaa̱ na̱xi̱ńdáꞌniuú boá nínga tjín,

¹¹ kó ngi̱yaa̱ ti̱ tjín kjo̱a̱maña nga, kó ndi̱tse̱e̱n ki̱a̱ boá nínga tjín kjo̱a̱chꞌáṉchaa̱ ko̱jo kjo̱a̱ndisoo̱.

¹² Ánní nga jmí tsi ngo kondra̱ xi chꞌo tjítsóna, ngatꞌa̱ xchíkjo̱a̱ná katsaki, ti̱nde askjanjo̱jínna kui xi chꞌoo̱ an, ngatꞌa̱ tsi bo̱a̱ kamá, kisꞌijñaꞌmaraa̱.

¹³ Tsi ji xi ngo nda̱ ji xikoó án, xi nda yaꞌana, amingo̱na xi tjóna,

¹⁴ xi nijan kandokjo̱a̱ni̱jmì ngayeje ni xi ya, ko̱jo xi nijan tsangín ndiꞌaa̱ Néná.

¹⁵ ¡Ta̱niján má ngatjandibánié kjo̱a̱bo̱yaa̱, kó nga síndo ngase nga kjo̱tjajenni nga̱tsjo̱ó! Ngatꞌa̱ ni xi ndajín síndojii̱n, ko̱jo ti̱ tjín kuí nii̱ ki̱a̱ ngi̱ya ndiꞌaa̱ nga.

¹⁶ Ta̱nga an ki, Néná boá xi kuichjiáa̱, ¡kó kuí boá xi kꞌo̱xiéꞌána!

¹⁷ Nga ta̱jño̱ó, nga ka̱mangixoón, ko̱jo nga ka̱majñoó ni̱ma̱ xián án nga kuichjiáa̱ ¡kó kuí boá ku̱i̱ntꞌiè nda̱na!

¹⁸ Kui boá xi tsja̱ana kjo̱a̱xió nga kꞌo̱xiéꞌána nda tsi kjín má xota̱ xi ndyi̱kjánjo̱na,

¹⁹ Néná kui xi tikón ndeskande ngasꞌe̱, ku̱i̱ntꞌièna, kó ni̱ma̱kjo̱a̱ ku̱i̱ꞌíndo kondra̱na, ngatꞌa̱ kui xotaa̱ jmíni̱xtjin bosíkjoyá yojoo̱, ti̱nde tsꞌéndíkónjín Néná.

²⁰ Kui xota̱ xi ndajiín, iskjininkꞌaa̱ xota̱ xi nijan kisꞌiee̱ kjo̱a̱xió katsaki, katsꞌénkjatjosónjín ni xi índa.

²¹ Én xí katsꞌénkjién inda ngase kamá ta̱bo̱a̱jiín mantekiyaa̱, ta̱nga ngi̱jin ini̱ma̱a̱ kjo̱a̱xchán boá xi kisꞌiee̱, én xí tsíchji̱a̱ inda ngase kamá ta̱bo̱a̱jiín istii̱, ta̱nga kui boá xi ki̱cha̱ xi yojó ngajó ngaboaá kamá.

²² Ti̱ꞌinkꞌasꞌíi̱n Néná chꞌià é xí kichꞌé ji, kó kuí boá tsja̱angaꞌniuú. ¡Néná sa̱ꞌínkjastjíe̱n nginí xota̱ xi kixi̱i̱ xi je tsꞌákaa̱!

²³ Ji Ne, jí boá xi si̱ꞌinkjatjajin ji kui xotaa̱ ki̱a̱ ti̱xa̱ nínga xcha̱ja ngatsjéni̱xtjii̱n. Xota̱ xi ꞌniú ndajiín ko̱jo xi ꞌboṉcha̱a̱, nde masiee̱n kjo̱chójín ni̱xtjii̱n nga kꞌuíndo, ¡ta̱nga an ki, ngatsjéni̱xtjin nga ji ꞌniákoo̱n!