Xo̱jo̱n Salmoo̱ 52 - Xo̱jo̱n eén Néná

Ni xi ka̱maa̱ xota̱ xi ndajín

Ndabii̱ katsꞌénda kui soó kjiꞌanga nda̱ xi xota̱ tji̱e̱e̱ Endoo̱n xi ꞌmí Ndoee̱ kijíkoón Sauu̱l nga bi̱ katsoó: «Ndiꞌaa̱ Ayimelee̱k jè kijí Ndabii̱ ki».

¹ Ji nda̱ chꞌokon, míkjo̱a̱a̱ nga nkꞌakon ꞌnaxié yojòo̱ kjo̱a̱a̱ ni xi ndajín xi niꞌín ji. Kjo̱a̱ni̱ma̱takoón Néná tikón síkijí boá.

² Ni xi tsꞌenkjiéná boá xi chji̱a̱ najen ji, kó xikó maá ngo ki̱cha̱ xi yojó má nga chji̱a̱ éndísó.

³ Tsja ngase maa̱ ni xi ndajín niꞌín, ta̱bo̱a̱jiín ni xi ndaa̱, tsja ngasee̱ éndísoó, ta̱bo̱a̱jiín kjo̱a̱kixi̱i̱.

⁴ Kó ji najen xi chji̱a̱ éndísó, ngayeje to̱ko̱ya én xí tsꞌénꞌónná boá xi ndokjo̱e̱ ji.

⁵ ¡Ta̱nga Néná boá xi sa̱ꞌínkjié kjin kjii̱n! Skjifeé kó ko̱ngatji̱ngii̱ ndiꞌàa̱, ¡kuí boá xi skji̱níyánii̱ kui nga̱sondie nínga síndo xotaa̱!

⁶ ¡Achichí stsa̱kjonní xota̱ xi kixi̱i̱ nga sku̱i̱e̱ kui nii̱, kó ko̱jno̱kie má nga bi̱ ka̱tso̱:

⁷ «¡Tsitsíjenjnúu̱ kꞌi̱e̱e̱ kui nda̱ xi jmí tsi Néná tsangase nga tsja̱angaꞌniuú! ¡Ta̱sá kjo̱a̱cho̱n tsiee̱ xi kamáꞌniátakón, kó ꞌniú ngase kamá nga katsꞌén ni xi ndajín!»

⁸ Ta̱nga an, xikó maá ngo yáꞌolibo̱ xi tikón tsingá tsingá ka̱ma nga kotíjña̱ an ki̱a̱ ndiꞌaa̱ Néná, ngatꞌa̱ kjo̱a̱ni̱ma̱takoón Néná boá xi ngatsjéni̱xtjin nga kjimaꞌniátakón an.

⁹ Ji Ne, ngatsjéni̱xtjin nga tsjaa ndokꞌóchjì kjo̱a̱a̱ ngayeje ni xi je kiniꞌín ji, kó skoya sakon sakoo̱n ji ngatsjéni̱xtjin, ngatꞌa̱ achichí nda kui nii̱ ngindyi̱ko̱n xota̱ na̱xi̱ńdá tsjièe̱.