Xo̱jo̱n Salmoo̱ 51 - Xo̱jo̱n eén Néná

Ji Ne, ti̱ꞌinjetakínní

Ndabii̱ katsꞌénda kui soó jaskan ngije kisꞌiejo̱ na̱ Besabee̱. Xota̱ chji̱ni̱e̱ꞌén xi ꞌmí Nataa̱n katsꞌénxchánjo̱ kjo̱a̱a̱ nga katsꞌéntꞌaa̱ kjo̱a̱ chjo̱ón.

¹ Ngatamani̱ma̱a̱ an Ne, xikó kjiꞌi kjo̱a̱ni̱ma̱takón xi tjiín, kó ti̱ꞌinkjie ji ni xi ndajín xi katsꞌen an, xikó kjiꞌi kjo̱a̱ni̱ma̱takón tsie xi tjiín.

² ¡Taníjín ngase ji ni ndajín xi katsꞌen an, kó ti̱ꞌintsjiejín ji jéna!

³ Ngatꞌa̱ be án ni xi ndajín xi tsꞌen an, kó ngatsjéni̱xtjin nga kje̱n án tikón jéna.

⁴ Ta̱ soboá kondra̱ tse̱ boá nga katsꞌenjé án, ndajínkjiꞌi ni xi katsꞌen an ngindyikin ji, kó kuí boá kui nii̱ xi bokó nga kixi̱ ji nga botíjé jí, ko̱jo nga tsjie boá kui kjo̱a̱kixi̱ xi niꞌín ji.

⁵ Ja̱koxi̱ boá nga ngi̱jii̱n ni xi ndajiín nga kamánda an, ko̱jo nga jè tjínna jé nga nga yeꞌéna na̱anna.

⁶ Ja̱koxi̱ boá nga mejeén xchi̱e̱ ji ni xi tjiꞌmaá, kuíni nga ꞌma ꞌma te̱ꞌéní kjo̱a̱kjínkóo̱n.

⁷ Isopo̱ ti̱ꞌinkjìn jí nga ti̱ꞌintsjiejínní, kó ka̱matsjiejón an, Taníjínní kó tsjie ngase ka̱ma an ta̱bo̱a̱jiín nchꞌaàn.

⁸ Te̱ꞌéndièní nga kuintꞌièe̱ kjo̱a̱tsjaa̱ ko̱jo kjo̱a̱mojnoó, kó tsja ka̱ma nginií kui ńda xi kiniꞌínꞌíi̱n.

⁹ Ngata̱ ki̱a̱jín tsitsijìi̱n ni xi ndajín tsꞌen an, kó ti̱ꞌinkjie ji ngayeje ni xi ndajín xi katsꞌen an.

¹⁰ Ji Ne, ngo ini̱ma̱ xi tsjie ti̱ꞌindení, kó ngo a̱siénni̱xtjin xi kixi̱ tꞌíjñijìnní.

¹¹ Ngata̱ kjinjín niꞌínkjeꞌéní ngindyikin ji, ¡Ti̱nde ngata̱ chjeꞌéxínjínní A̱siénni̱xtjin tsjièe̱!

¹² Te̱ꞌé nginí kjo̱a̱tsja xi tjiín kjo̱a̱ꞌnaxiéꞌáa̱, kó ngo a̱siénni̱xtjin xi nda ngatasikójona.

¹³ Kó bo̱a̱ tsꞌén nga ka̱ma kokoyáa̱ xota̱ xi kitikjo̱a̱a̱ ndi̱yàa̱, kó xota̱ jeé sa̱ꞌínkꞌoyà yojoo̱, kósꞌe̱ ji sa̱ꞌínseén ngijee̱.

¹⁴ Ti̱ꞌindení kjo̱a̱a̱ nga ini̱ma̱ niꞌánkꞌieén, ji Ndi̱a̱, ko̱jo ji Ne xi ꞌboxiéꞌána, kó najén án si̱é kjo̱a̱a̱ kjo̱a̱kixi̱i̱.

¹⁵ Ji Ndi̱a̱ chjáxꞌé jí ndso̱ꞌba án, kó ndso̱ꞌba án si̱eé só nga sa̱ꞌíntsjaá.

¹⁶ Ngatꞌa̱ ji mejénjiín kjo̱a̱tjó xi an sa̱ꞌínkꞌasꞌiee̱n katsaki, kó chjábéjín ji kjo̱a̱tjó xi an sa̱ꞌinkꞌasꞌiee̱n.

¹⁷ Kjo̱a̱tjó xi tsja maa̱ Néná kuí boá ngo a̱siénni̱xtjin xi ni̱ma̱kjo̱a̱ tikón. Ji Ne, niꞌínchꞌíjín ji ngo ini̱ma̱ xi je katsꞌénkꞌoyá yojoo̱ ko̱jo xi ni̱ma̱kjo̱a̱ tikón.

¹⁸ Nda ti̱ꞌinje̱ ji na̱xi̱ńdá Sioo̱n ta̱ngatꞌanii̱ kjo̱a̱ndaxota̱a̱, kó chjanínkꞌé nginí ji xó xí foaꞌatjiyajoo̱n na̱xi̱ńdáꞌniú Jerusalee̱n.

¹⁹ Kósꞌe̱ kjiꞌá boá nga tsja ka̱maa̱ nga si̱ꞌankꞌasꞌiee̱n kjo̱a̱tjó xi kjo̱a̱kixi̱i̱, ko̱jo chji̱e̱, ko̱jo kjo̱a̱tjó xi ꞌbítí yeje, kósꞌe̱ si̱ꞌankꞌasꞌien ki̱a̱ nga̱són ṉcháa̱n ndií cho̱yojo.