Xo̱jo̱n Salmoo̱ 50 - Xo̱jo̱n eén Néná

Néná boá xi sa̱ꞌínjeé xota̱ xi ndajín

Só xi katsꞌénda Asaa̱f.

¹ Néná, kui Néná xí tjiín kjo̱a̱jee̱, tsꞌénchji̱a̱a̱ xotaa̱ kui nga̱sondiee̱, ndeskande nínga fotjo tsꞌueé, kó ngaskande nínga ꞌbosꞌien.

² Ndeskande na̱xi̱ńdá Sioo̱n, kui na̱xi̱ńdá tsjákjiꞌi ko̱jo xi ꞌniú ndaa̱, Néná tsjandiè nga ya ndiꞌií.

³ ¡Jè ndibá Néná! Ta̱nga jmí tsi xió tsꞌéndibá: Ngo ndiꞌí xi tjítsꞌénkjié ngayeje nii̱ tsꞌéndibátjoón, nga ngo foaꞌatjiyajoo̱n kui, tsꞌéndibá ngo tjo̱ꞌniú.

⁴ Ndeskande nkꞌa jàn tsꞌéntsáyaà nkꞌajmii̱ ko̱jo tꞌanangii̱, tsi̱ꞌe̱ nga kui xi sa̱ꞌínjeé xota̱ na̱xi̱ńdaá.

⁵ Kó bi̱ tsó: «Tꞌítikójnúꞌun xota̱ tsjiena kui xota̱ xi ngo ni je índajo̱na, kó je katsꞌénkꞌasꞌienna kjo̱a̱tjó».

⁶ Nkꞌajmii̱ ka̱tso̱yà kjo̱a̱kixi̱i̱ Néná, ngatꞌa̱ Néná boá xi Ne ndiꞌamasiee̱n.

⁷ Ti̱ kuíní Néná xi bi̱ katsó: «Tasiénijónjnúꞌun jún xota̱ na̱xi̱ńdána Israee̱l, ndaꞌyájnú, ngatꞌa̱ án boá xi kongítaꞌínjnúꞌun jún, án boá xi Néná, kui xi Nejnú.

⁸ Tsꞌenxchánjo̱jínjnúꞌun kjo̱a̱a̱ cho̱ xi niꞌánkꞌasꞌiénjnúꞌun, ko̱jo kjo̱a̱a̱ cho̱ xi ꞌbítíjnú ki̱a̱ nga̱són ṉchanna, kui ni xi ngatsjéni̱xtjin niꞌánjnú ngindyikón án,

⁹ ta̱nga skjíbéjín an ndií cho̱yojo xi chji̱a̱ni ndiꞌajnú, ko̱jo tsi ndií tindso̱ xi síndo ki̱a̱ nchꞌoájnú,

¹⁰ ngatꞌa̱ án tsa̱ꞌa̱n ngayeje cho̱ tamá xí tjín ngi̱jin kꞌijñaá, ko̱jo ngayeje mi̱ cho̱ xi tjín ngi̱jin na̱xi̱i̱.

¹¹ Jè be an ngayeje cho̱ xi tjiín tsja̱nga̱ xi tjín ngi̱jin na̱xi̱i̱, kó ngayeje xi tsꞌéntíyà ngi̱jin kꞌijñaá, án tsa̱ꞌa̱n nga.

¹² »Tsi an xi bojóna, nde jmí nichinie kuíꞌájínjnúꞌun, ngatꞌa̱ án tsa̱ꞌa̱n ngayeje nga̱sondiee̱, ko̱jo ni xi tjiín.

¹³ A sꞌijinjnú nga yojoo̱ cho̱yojo toro̱ xi kjíni̱e̱ an, ko̱jo nga jiín ndií cho̱tsa̱nga̱ xi ꞌbi an.

¹⁴ ¡Ta̱sá ndibájo̱jnúꞌun kjo̱a̱tjó xi niꞌánkꞌasꞌien nga niꞌántsjaá Néná, kó ti̱ꞌankjatjosónjnúꞌun ni xi kandokjo̱a̱tjónjnú nga si̱ꞌankjatjosónjnú!

¹⁵ ¡Kó ndókjo̱a̱jnúꞌun ni̱xtjin nga nda̱ ka̱majnú! An kꞌoxiéꞌájnúꞌun, kó jún si̱ꞌandikónjnúꞌun ngijee̱».

¹⁶ Ta̱nga Néná, bi̱ tsoó xota̱ xi ndajiín: «ꞌYá jií bo̱a̱ nga ji kon xi ko̱ndókjo̱e̱ ji kjo̱a̱kitina, ko̱jo nga ji kon xi ko̱ndókjo̱e̱ ji kjo̱a̱ꞌbíndana.

¹⁷ Ji xi chꞌoo̱ nga si̱ꞌanchji̱ni̱e̱e̱, ko̱jo nga ndasénjiín énna.

¹⁸ Nga tsi ye ji ngo xota̱ xi chejé, miyí má ji nga ki̱a̱ ꞌmitji̱ngíi̱, ko̱jo nga xota̱ xi ndyi̱tsꞌèntꞌaa̱ kjo̱a̱ xkjín, ki̱a̱ niꞌínkamaje̱ ji.

¹⁹ Kjo̱a̱a̱ ni xi ndajiín boá xi niꞌínkjìn jí ndso̱ꞌbe, kó najen ji éndísó boá xi chji̱a̱.

²⁰ Ngaskande mindyin má ji nga ndokjo̱e̱taꞌin ji ntsꞌie, kó ꞌbíndisetaꞌin ji ndií ti̱ kuii̱ na̱áa̱n.

²¹ Kuí bí kui nii̱ xi je kiniꞌín ji, kó a xió kotíjña̱ an. A kiniꞌínkjé jí nga bo̱a̱ kon an xikoó jí. Sa̱ꞌinxchánjo̱ñaá, kó koko an jée̱ ngindyikin ji.

²² »Nda má ngatamakjínjnú kui nii̱ jún xi niꞌánchíyájnú Néná, ngatꞌa̱ tsita̱ sa̱ꞌínxi̱jnú, kó nde jmíjín xi kꞌo̱xiéꞌájnú.

²³ Kui xi tsja̱ana ngo kjo̱a̱tjó xi niꞌánkꞌasꞌien nga boeꞌé ndokꞌóchjì, kuí boá xi tsꞌéndíkónna, kó kui xi kixi̱ ku̱i̱ꞌíndonda ndi̱yà xí tsoꞌbá, kuí boá xi kokóo̱ kjo̱a̱ꞌnaxiéꞌána».