Xo̱jo̱n Salmoo̱ 5 - Xo̱jo̱n eén Néná

Nga kónná Néná

Só xi katsꞌénda Ndabii̱.

¹ Ji Ne, ndaꞌyé ji énna, kó chꞌi̱e̱ ji xki̱ ni xi si̱e̱n si̱e̱n tsꞌénchji̱a̱ an,

² ji Re ko̱jo Ne xi tsa̱ꞌa̱n, ti̱ꞌinsénní kjiꞌanga ni̱ma̱ xián án, ngatꞌa̱ jí boá xi kuichjiaá.

³ Ji Ne, ta̱ niꞌin si̱sién, kó ko̱nda̱ꞌyé ji nda̱na, kó nga ta̱jño̱ó kjuín án ngindyikin ji, kó skoya an.

⁴ Ngatꞌa̱ ji Ne, tsjajín maá ni xi ndajiín. Kuíni nga xota̱ xi ndajiín ki̱a̱jín nijan kꞌuíndotꞌaa̱.

⁵ Xota̱ xi nkꞌakoo̱n ka̱májín ki̱a̱ kjo̱chó ngindyikin ji, chꞌoóri ngayeje xota̱ xi tsꞌén ni xi ndajiín.

⁶ ¡Jí boá xi niꞌínkjié ji xota̱ xi ꞌbindísoó, kó niꞌínchꞌí ji xota̱ xi tsꞌenkꞌién ini̱ma̱a̱, ko̱jo xi ꞌboṉcha̱a̱!

⁷ Ta̱nga an ki, kꞌosꞌi̱e̱n an ndiꞌáa̱ ta̱ngatꞌanii̱ kjo̱a̱ni̱ma̱takón jèe̱, kó nga bendikoón jí, kosien an tikóna ki̱a̱ xtji̱e̱e̱n na̱ngo̱xi̱i̱.

⁸ Ji Ne, tꞌenje̱ní ndi̱ya̱à kjo̱a̱kixi̱i̱, kó ta̱ngatꞌanii̱ xota̱ xi kondra̱na, ti̱ꞌinna̱xe̱ ji kje̱n án ndi̱yàa̱.

⁹ Ngatꞌa̱ jmí kjo̱a̱kixi̱jiín ni xi chji̱a̱ tsꞌoa kui xotaa̱, ni xi ndajín boá ngayeje ni xi ndyi̱a̱ nga̱ntsꞌo̱a̱, nga̱tsjo̱ó xí tji̱e̱nti̱xa̱ boá na̱xo̱o̱, kó ta̱soboá ni ndiso boá xi chji̱a̱ na̱je̱n.

¹⁰ ¡Ti̱ꞌinjée̱ Ne! ¡Ti̱ kuii̱ ni xi atíxoma xi ngatixóni! ¡Ngachaja ta̱ngatꞌanii̱ nga ꞌniú katsꞌénjé, ngatꞌa̱ achichí ꞌniú ndyi̱kjánjo̱o̱ ji!

¹¹ Ta̱nga tsjangatamaa̱ ngayeje xota̱ xi ꞌniákoón jí, ¡ngatsjéni̱xtjin nga tsjatsꞌèn nga sie, ngatꞌa̱ jí boá xi ꞌnaxiéꞌé ji! ¡Ngatsjaá kjo̱a̱tsja ji, ngayeje xota̱ xi tjoó ji!

¹² Ji Ne, jí boá xi niꞌínchikonñí xota̱ xi kixi̱i̱, kó kjo̱a̱nda xi tjiín ji foaꞌatjiyajoo̱n kui, xikoó ngo ni xi ꞌbíchjaá ni xi ndajín.