Xo̱jo̱n Salmoo̱ 49 - Xo̱jo̱n eén Néná

Ngata̱ kjo̱a̱cho̱o̱njín ꞌnítakín ji

Só xi katsꞌénda xota̱ ngo ndiꞌaa̱ Koree̱.

¹ ¡Ndaꞌyájnú kui nii̱ ngayeje jún xota̱ na̱xi̱ńdá! ¡Ndaꞌyájnú jún xota̱ xi chji̱a̱ni kui nga̱sondiee̱!

² Ko̱jo jún xota̱ xi ni̱ma̱, ko̱jo jún xota̱ xi ni̱ma̱kjo̱a̱, ko̱jo jún xota̱ xi cho̱n, ko̱jo jún xota̱ xi tjiín ngaꞌniú, ¡ndaꞌyájnúꞌun nga!

³ Én xí tjiín kjo̱a̱kjíntakón boá xi ku̱i̱chji̱a̱ ndso̱ꞌba án, kó ni xi tjiín kjo̱a̱kjínkón boá xi sꞌi̱jin ngi̱jin ini̱ma̱na.

⁴ Kosiennijòo̱n énkjínkoón, kó tji̱e̱nga kjifonie arpaa̱ xiyàjnúꞌun mí nii̱ bo̱a̱.

⁵ Míkjo̱a̱a̱ nga stsakjon an ni̱xtjin xi ndajiín, kjiꞌanga je jaꞌatjiyajonna ni xi ndajín xi mejeén sa̱ꞌínjo̱na kondra̱na,

⁶ kui xi kjo̱a̱cho̱o̱n boá xi kjimaꞌniákón, kó nkꞌa ꞌboxié yojoo̱ kjo̱a̱a̱ to̱n xi bo̱a̱ nda tjiín.

⁷ Nde ngojín kui xotaa̱ xi ka̱maa̱ kꞌo̱xiéꞌá ngo ntsꞌi̱e̱, ti̱nde ka̱májiín ku̱i̱ꞌíchjií Néná tsi̱ꞌe̱ nga kꞌo̱xiéꞌá,

⁸ ngatꞌa̱ kjo̱a̱ꞌnaxiéꞌaá kjo̱a̱mindyioo̱n achichí chjí, kó nde ngojín to̱n xi ka̱ma ku̱i̱je̱nnii̱.

⁹ Tsi̱ꞌe̱ nga kꞌuijñá ngatsjéni̱xtjin, kó nga jmíni̱xtjin kjo̱tsòn.

¹⁰ Ngatꞌa̱ sku̱i̱e̱ nga ngaskande xota̱ xi kjínkoón fesón nga, kó ti̱ fesón xota̱ xi jmí ni bejín, ko̱jo xi kitikjo̱a̱a̱ nga, kó kjo̱a̱cho̱o̱n kje̱ꞌe xí ꞌbijñaá.

¹¹ Katsꞌénkjó nga ndiꞌaa̱ ngatsjéni̱xtjin nga kꞌuijñá, ko̱jo nga ngi̱ndiee̱ kꞌuijñá ta̱kjiꞌání, kó ngaskande tꞌanangii̱ jaꞌeén je índoni.

¹² Ta̱nga xota̱ nga̱sondiee̱ jmí tsi ngatsjéni̱xtjin nga xcha̱ndikón, ngatꞌa̱ xikónií cho̱o̱ nga fesón nga.

¹³ Kjo̱a̱kitikjo̱a̱ boá xi ndi̱ya̱à kui, kó xota̱ xi yajángií kui tsja maa̱ ni xi tsó.

¹⁴ Ti̱ kuíní bo̱a̱ xi je síndonda nga xikó maá xtín cho̱tsa̱nga̱ nga fí nga̱tsjo̱ó, kó kjo̱a̱bo̱yaa̱ boá xi fotsoꞌbátjoón, kó fí kixi̱ kixi̱ nga̱tsjo̱ó, kósꞌe̱ chaja yojoo̱, nga̱tsjo̱ó boá nínga ndiꞌaa̱ ka̱ma.

¹⁵ Ta̱nga Néná boá xi kꞌo̱xiéꞌána an ngi̱ya tsja kjo̱a̱bo̱yaa̱, ngatꞌa̱ kuí boá xi ko̱e̱je̱jona.

¹⁶ Ngata̱ nda̱jín maá kjiꞌanga tjín xí kjimacho̱n, ko̱jo kjiꞌanga ꞌbikítsie maá ni tsjakon ndiꞌaa̱,

¹⁷ ngatꞌa̱ ta̱jmìjín ni xi ko̱e̱je̱jo kjiꞌanga ko̱yà, kjo̱a̱cho̱o̱n kjo̱a̱ꞌajayajín ki̱a̱ nga̱tsjo̱ó.

¹⁸ Ndatsi tji̱e̱nga tikón ti̱ kuii̱ ini̱ma̱a̱ sa̱ꞌínchikonñé, kó nda ko̱ndókjo̱a̱ kjo̱a̱a̱ kui ngatꞌa̱ nda katjoninkꞌaa̱ yojoo̱,

¹⁹ ta̱nga nga kjo̱chó ni̱xtjin, ki̱a̱ ko̱e̱je̱ nínga síndo xi xchaá, kó ngiti̱ nginijánjín sku̱i̱e̱ ndiꞌií.

²⁰ Kui nda̱ xi yandikoón, kó makjínjín kui nii̱, ti̱ bo̱a̱ ti̱ kjiꞌinii̱ xikoó cho̱ xi fesoón.