Xo̱jo̱n Salmoo̱ 48 - Xo̱jo̱n eén Néná

Na̱xi̱ńdáꞌniuú Néná

Só xi katsꞌénda xota̱ ngo ndiꞌaa̱ Koree̱.

¹ Achichí ngaꞌniú xí tjiín Néná, kó tsoboárií nga ꞌniú si̱ꞌantsjaa̱. Ki̱a̱ na̱xi̱ńdáꞌniuú Néná, ki̱a̱ na̱xi̱ ndikoón.

² Achichí tsjákjiꞌi kui na̱xi̱ nkꞌaa̱, kui xi kjo̱a̱tsjaa̱ ngayeje nga̱sondiee̱, na̱xi̱ Sioo̱n, ki̱a̱ nínga fetꞌanii̱ xtji̱e̱e̱n ta̱ꞌii̱n, kuí boá xi na̱xi̱ńdáꞌniuú kui Re xi tjiín ngaꞌniuú.

³ Néná ngi̱jii̱n kui ndo̱bo̱a̱xa̱á, ya xikoó ngo tarié xi ꞌniú.

⁴ Re xi tjín nga̱sondiee̱ katsꞌéngo yojoo̱ tsi̱ꞌe̱ nga skjánjo̱ xota̱a̱ na̱xi̱ńdáꞌniuú,

⁵ ta̱nga ngije kamábe na̱xi̱ńdáꞌniuú, kijíndikoón, kó nde ngiti̱ kamábejín ni xi sa̱ꞌín, kó tsangandikón.

⁶ Kó kjindibánié ngo kjo̱a̱ndi̱ko̱n, achichí on kamaá xikó maá tsi̱ndi̱o̱o̱ nga je stse̱n ngo ndí.

⁷ Xikoó tji̱ xi ndibání xtji̱e̱e̱n na̱ngi, nga akakjen ji tjotso yiꞌii̱ nangi Tarsii̱.

⁸ Xikótsꞌèn kandaꞌyájne̱ kui nii̱, bo̱a̱ má tsꞌén kamáyàjne̱, ki̱a̱ na̱xi̱ńdáꞌniuú Néná xí tsi̱ꞌe̱ jájuún, ki̱a̱ na̱xi̱ńdáꞌniuú Nejne̱, kuí boá xi sa̱ꞌín, nga kui na̱xi̱ńdáꞌniuú ꞌniú kꞌuijñá.

⁹ Jaꞌátsjienjne̱ kjo̱a̱ni̱ma̱takóo̱n ji Ne, ki̱a̱ ngamasiee̱n na̱ngo̱xi̱i̱.

¹⁰ Xikoó jaꞌée̱n ji Ne, bo̱a̱ má kjiꞌi kjo̱a̱yandikóo̱n nga fochó ngaskande nínga fetꞌanii̱ nga̱sondiee̱, kó ndse̱ kixi̱ ji tjikítsie maá kjo̱a̱kixi̱.

¹¹ Tsjangatamaa̱ na̱xi̱ Sioo̱n, tsjangatamaa̱ xota̱ tji̱e̱e̱ Jundáa̱ ta̱ngatꞌanii̱ nga kixi̱ niꞌínjé jí.

¹² ¡Tangínjnú nga ngo foaꞌatjiyajoo̱n na̱xi̱ńdá Sioo̱n! ¡Kó tsitsíjenjnúu̱ kótjín tarié tjiín!

¹³ ¡Tsitsíjenjnúu̱ xó xí tjíchjáꞌyáni, kó tꞌíndikónjnú ndiꞌa yiꞌi xi tjiín! Tsi̱ꞌe̱ nga kꞌuiyájnúu̱ xota̱ tji̱e̱ xi jaskan kꞌuieé.

¹⁴ ¡Nga bo̱a̱ kjiꞌi ni xi tsꞌén Néná, ngatsjéni̱xtjin ko̱jo ta̱kjiꞌání! ¡Néná boá xi kꞌuíjñatjónná ngaskande nínga kjín ngasenii̱ kjo̱a̱bo̱yaa̱!