Xo̱jo̱n Salmoo̱ 46 - Xo̱jo̱n eén Néná

Néná tsꞌénkónná

Én xí katsꞌénda xota̱ ngo ndiꞌaa̱ Koree̱.

¹ Néná boá xi kónná ko̱jo xi tsjangaꞌniúná, kuí boá xi tsá bosikójoná kjiꞌanga nda̱ kjimáná.

² Kuíni nga ko̱ndoko̱njín ñá ndatsi kjo̱tsiè tꞌanangii̱, ko̱jo ndatsi na̱xi̱i̱ ko̱e̱je̱ngandá ngamasiee̱n ndáchíkoón,

³ ko̱jo ndatsi kjo̱ni̱e̱ ko̱jo tsi kjo̱ni̱e̱ngí ndáfoaa̱ ndáchíkoón, ko̱jo ndatsi sꞌi̱tsanieyá na̱xi̱i̱ ta̱ngatꞌanii̱ ngaꞌniuú ndáfoaa̱.

⁴ Tikón ngo ndejèꞌ xi ndáfoaa̱ tsꞌéntsjaá na̱xi̱ńdáꞌniuú Néná, nínga tikón ndiꞌandikoón, nínga tikón Néná xí tsi̱ꞌe̱ nkꞌajmii̱.

⁵ Néná boá xi tikón ngamasiee̱n kui na̱xi̱ńdáꞌniuú, kó jmíni̱xtjin kju̱i̱e̱, Néná boá xi ko̱síko̱jo kjiꞌanga si̱si̱eén.

⁶ Achichí nda̱ kamaá xota̱ na̱xi̱ńdaá, jatsiéndíkón má ngi̱ndie nínga botíxomaa̱, nga kandaꞌyá nda̱a̱ Néná, kamáńdá má tꞌanangii̱.

⁷ Néná xí tsi̱ꞌe̱ jájuún ñá boá xi tikónjinná, Néná boá xi kónná, Nee̱ Jakoo̱b.

⁸ ¡Ndibájnú, kó tꞌíndikónjnú ni yiꞌi xi je katsꞌén Néná, jè íjñátiya ngayeje nga̱sondiee̱!

⁹ Kuí boá xi tsꞌénkꞌíxió kjo̱a̱xcha̱án ngaskande nínga fetꞌanii̱ tꞌanangii̱, kuí boá xi kjítꞌó yáchjonyaá ko̱jo yáyojoó, kó ꞌbítí karroo̱.

¹⁰ Kó bi̱ katsó Néná: «Xió ti̱ndyiónjnú, kó ngatamayajnú nga an boá xi Ne an, kó si̱ꞌandikónna ngi̱jii̱n ngayeje na̱xi̱ńdaá, ko̱jo xcha̱ndikónna ngayeje tꞌanangii̱.»

¹¹ Néná xí tsi̱ꞌe̱ jájuún kꞌi̱e̱ tikónjinná, Néná boá xi kónná, Nee̱ Jakoo̱b.