Xo̱jo̱n Salmoo̱ 45 - Xo̱jo̱n eén Néná

Kjiꞌanga ixán nda̱ ree̱

Én xí katsꞌénda xota̱ ngo ndiꞌaa̱ Koree̱ kjiꞌanga ixán ree̱.

¹ Ngi̱jin ini̱ma̱na fotjonii̱ én nda, kó nda̱ ree̱ boá xi siée̱ sóna. Najén án, xikónií ni xi tsꞌénꞌindóni ngo nda̱ xi tsꞌénda énkjínkón.

² Jí boá ngo nda̱ xi ꞌniú tsjákjiꞌi ngase ngi̱jii̱n ndií xota̱ nga̱sondiee̱, achichí kjo̱a̱nda tjiín én xí ndokjo̱e̱ ji. Ngatsjéni̱xtjin nga tjítsꞌénchíkonñeé Néná.

³ ¡Tjatꞌe ji ki̱cha̱ndojóo̱ ki̱a̱ ndáyáa̱, ji nda̱ chꞌokon, kó ngatꞌieé kjo̱a̱je ko̱jo kjo̱a̱yandikón!

⁴ Ngatꞌieé kjo̱a̱yandikón, kó ti̱ꞌin ji, ta̱ngatꞌanii̱ ni xi kixi̱i̱, ko̱jo kjo̱a̱ndaꞌyáꞌeén, ko̱jo kjo̱a̱kixi̱i̱, Kó ngaꞌniúu̱ boá xi kjo̱joo̱ nga si̱ꞌin ji ni xi yiꞌi.

⁵ Kjín nangi ku̱i̱xo̱ ngindie ndsa̱ki ji, kó yáyojóo̱ kjo̱a̱ꞌaxtikjaá ini̱ma̱a̱ xota̱ xi kondraa̱ ree̱.

⁶ Nínga botíxome ji Ne, ngatsjéni̱xtjin tikón, kó jmíni̱xtjin kju̱i̱e̱, kó kjo̱a̱botíxomàa̱ ni xi tjiín kjo̱a̱kixi̱ boá.

⁷ Kiniꞌíntjé ji kjo̱a̱kixi̱i̱, kó kiniꞌínchꞌí ji ni xi ndajiín, kuíni nga Néná kui xi Nèe̱ katsjáxaá, ¡kó ngo ndásíjee̱n kjo̱a̱tsja, tsie ngase indyiaá, ta̱bo̱a̱jiín já xí tsꞌentje̱je ji!

⁸ Ngi̱jin ńjñoo̱ foaꞌándá sije̱n sije̱n mirraa̱, ko̱jo aloee̱, ko̱jo kasiaa̱, kó ndeskande ki̱a̱ ndo̱bo̱a̱xa̱á xí ndi̱ja̱a̱ ki̱ña̱ kamándanii̱, ndaꞌyánii̱ soó arpa̱ xi ꞌbikítsie maá kjo̱a̱tsja.

⁹ Ngi̱jii̱n ínchjín xí ꞌniú tsjákón ngasee̱, ki̱a̱ síndojin ndí xí ínchjiín ree̱. Kó ki̱a̱ xtji̱e̱e̱n ndse̱ fojnií tikóntꞌa xi ka̱ma na̱ ree̱, xi yaꞌa ni to̱nsinié xi chji̱a̱ni na̱xi̱ńdáꞌniú Ofii̱r.

¹⁰ Ndaꞌyé jí tsa̱kjìn, tsitsíjin, kó tasínijin ji, ti̱ꞌinchíyé ji nangìi̱, ko̱jo ndiꞌaa̱ xi xcháa̱.

¹¹ Ree̱ ka̱mamejeén kjo̱a̱tsjakjiꞌii̱ yojòo̱, che̱ndikín jí, ngatꞌa̱ kuí boá xi Ndi̱a̱a̱ ka̱ma.

¹² Kó ínchjín xí chji̱a̱ni na̱xi̱ńdáꞌniú Tiroo̱ achichí ni tsjakon kji̱ndi̱bájo̱, kó xota̱ cho̱o̱n na̱xi̱ńdaá ni̱ma̱ ka̱tso̱ nga ku̱i̱ꞌaa̱ kjo̱a̱nda.

¹³ Achichí ndikón kjíꞌí tsa̱kji̱ín ree̱ nga tikón ki̱a̱ ngi̱yaꞌmaa̱, kó ngo ńjño xi to̱nsinié kamándani yajá.

¹⁴ Kó kui ńjño chji̱ni̱e̱ xi to̱nsinieé yajá nga kongínjo̱ ngindyi̱ko̱n ree̱, kó ínchjín xo̱ngo̱ò ko̱e̱je̱tji̱ngii̱, kó ínchjín xkjín kji̱ndi̱bájo̱o̱ ji.

¹⁵ Achichí kjo̱a̱tsja ko̱jo kjo̱a̱mojnó kꞌuié nga kongínjo̱, kó kꞌo̱sꞌien ndo̱bo̱a̱xa̱á nda̱ ree̱.

¹⁶ Ndíi̱ boá xi kꞌuíndo ngi̱ndiee̱ xi xcháa̱, kó kuí boá xi ko̱tíxomaa̱ ngayeje nga̱sondiee̱.

¹⁷ Kó an boá xi sa̱ꞌin an nga jaꞌée̱n si̱ꞌankjaꞌátsjien ta̱kjiꞌání, kó kuíni nga xota̱ na̱xi̱ńdaá ngatsjéni̱xtjin nga sa̱ꞌíntsjaá.