Xo̱jo̱n Salmoo̱ 44 - Xo̱jo̱n eén Néná

Kjo̱a̱ndé xí je jaꞌa ko̱jo kjo̱a̱chjatꞌayákón xi kjima ngotꞌe̱

Eén xí bokoyáná ngo ni, xi katsꞌénda xota̱ ngo ndiꞌaa̱ Koree̱.

¹ Ji Ne, tji̱bo̱a̱nijón má ji̱n xi je tsintꞌié, kó xota̱ xi xchájne̱ katsóyàjne̱, ni yiꞌi xi ꞌniú fíndikónná xi kiniꞌín ji ni̱xtjin xcháján.

² Jí má bo̱a̱ xi ikiyitji̱ngìi̱ kui xota̱ na̱xi̱ńdaá, tsi̱ꞌe̱ nga ki̱a̱ ikꞌínde ji xota̱ xi xchájne̱, kiniꞌínkjié ndo̱jò ndójo̱ jí kui nangii̱, kó katseꞌéndièe̱ nga ki̱a̱ kisꞌiee̱ ja̱ma̱ xota̱jne̱.

³ Jmí tsi ki̱cha̱ndojoó katsꞌénkjién nga kasakoo̱ tꞌanangi, ti̱nde jmí tsi tsja katsꞌénkjién nga katsꞌén. ¡Ngaꞌniuú ndse̱ boá xi katsꞌénni, ko̱jo ndiꞌí xí akóni kje̱n ji boá, ngatꞌa̱ kiniꞌíntjé ji kui xotaa̱!

⁴ Jí boá xi rena ko̱jo xi Néna ji. ¡Te̱ꞌékjo̱e̱ ji nga ko̱ꞌna̱xiéꞌá xota̱ tji̱e̱e̱ Jakoo̱b!

⁵ Tsi ji ko̱si̱ke̱jejne̱ ka̱majne̱ si̱ꞌanjne̱ kondra̱jne̱, ¡jaꞌée̱n boá xi si̱ꞌankjiénjne̱ nga ko̱jna̱niéjné kui kondraa̱!

⁶ Ka̱maꞌniátakónjín an yáchjonyána ko̱jo yáyojóna, ti̱nde kuijín ki̱cha̱ndojóna xi sa̱ꞌín nga sa̱ꞌin an.

⁷ ¡Ngatꞌa̱ jí boá xi ꞌnaxiéꞌéjne̱ kjo̱a̱a̱ xota̱ xi ndajín tsꞌénjo̱jne̱, ko̱jo jí boá xi niꞌínkjeꞌe ji kjo̱a̱soboá xota̱ xi chꞌoo̱ ji̱n!

⁸ ¡Néná boá xi ko̱e̱ꞌéjne̱ kjo̱a̱je nga ngo ni̱xtjii̱n! ¡Kó ngatsjéni̱xtjin nga si̱ꞌantsjajne̱ jaꞌée̱n!

⁹ Ta̱nga ngotꞌe̱ ꞌne̱ jè kiniꞌínchꞌíjne̱ ko̱jo kiniꞌíntsobejinjne̱. Jè ngiti̱ nijan ꞌmije̱jín ji jájúnjne̱.

¹⁰ Jí boá xi niꞌín ji nga miyondikónjne̱ kondraa̱, ¡kó kondra̱jne̱ foaꞌáxínjne̱ ngayeje ni xi tjínjne̱!

¹¹ Kiniꞌínkꞌasꞌinjne̱ xikoó cho̱tsa̱nga̱ xi tjífíniꞌánkꞌién, kó kiniꞌíntsojoboajne̱ kje̱ꞌe na̱xi̱ńdá.

¹² Ta̱kjo̱a̱ndaní nga akatíñí ji xota̱ na̱xi̱ńdáa̱, kó nde jmí chjí kichjiéꞌéjín ji kjo̱a̱a̱ kui.

¹³ Jí boá xi kiniꞌín ji nga tsajnókiejne̱ xota̱ xi síndotꞌajne̱, kó kjo̱a̱mojnóchaá ko̱jo kjo̱a̱soboaá kui xota̱ je kamájne̱.

¹⁴ Jí boá xi kiniꞌín ji nga ndyi̱chji̱a̱taꞌinjne̱ na̱xi̱ńdaá, xikó maá ni xi mojnóchà kjimajne̱ ngi̱jii̱n kui xota̱ na̱xi̱ńdaá.

¹⁵ Ndyiojón ndyiojón nga achichí soboá mána, kó nde ngiti̱ mejénjínna koko an kje̱n án,

¹⁶ ta̱ngatꞌanii̱ nga kjandayàjo̱na kui xi mojnókiena ko̱jo xi bendikónjínna, ko̱jo ta̱ngatꞌanii̱ kondraa̱ ko̱jo xi tsꞌéngojoo̱.

¹⁷ Ngayeje kui nii̱ xi je kjindibániéjne̱ ta̱nga kji̱e̱ niꞌánchíyájínjne̱ ji, kó to̱kó kjimaꞌniátakónjne̱ kjo̱a̱ꞌbíndàa̱,

¹⁸ ini̱ma̱jne̱ kji̱e̱ ngo ndi̱yà fíni nga̱xto̱n, ti̱nde ndsa̱kojne̱ kji̱e̱ ngo ndi̱yà ndyi̱ꞌbijñámasien ndi̱yàa̱.

¹⁹ Kó ndatsi bo̱a̱ kjiꞌi ni xi je kamájne̱, jè kiniꞌínni̱ma̱kjo̱a̱jne̱ kó ki̱a̱ ikꞌíndejne̱ xikoó ngindiee̱ cho̱ chakaa̱l, kó ngi̱ndie nínga jñoó kjo̱a̱bo̱yaa̱ ikꞌíjñiníjne̱.

²⁰ Tsi je kiniꞌánchíyájne̱ jaꞌeén Nejne̱, ko̱jo tsi kje̱ꞌe ne je kiniꞌántsjájne̱,

²¹ kó Néná, a mí tsí je kamákjiín kui nii̱ tsobo̱a̱, ngatꞌa̱ kui jè be ni xi tjiꞌmaá ini̱ma̱a̱.

²² Ta̱nga ta̱ngatꞌanií ji nga ndyiojón ndyiojón niꞌánkꞌiénjne̱, kó bo̱a̱ mataꞌinjne̱ xikoó cho̱tsa̱nga̱ xi mongínjo̱ nínga niꞌánkꞌién.

²³ ¡Ti̱ꞌinkjeꞌée̱ yojòo̱ Ndi̱a̱, kó ngata̱ tsjaféjín ji! ¡Tindyiendyikin ji, kó ngata̱ ꞌbíjñímasínjínjne̱ ngatsjéni̱xtjin!

²⁴ Ánní nga mindyinꞌmí kon ji. Ánní nga niꞌínchíyé kon ji kjo̱a̱ndasenjne̱, ko̱jo kjo̱a̱ni̱ma̱ xi ndyi̱bitjatiójne̱.

²⁵ Ngatꞌa̱ ini̱ma̱jne̱ jè kiniꞌánchaja kjin kjinjne̱, jè ngaskande tꞌanangii̱ ndyi̱ꞌbíféjne̱ yojojne̱.

²⁶ ¡Ti̱sítji̱n ji kó ndibékasíke̱jejne̱ ꞌne̱! ¡ꞌNa̱xiéꞌéjne̱ ta̱ngatꞌanii̱ kjo̱a̱ni̱ma̱takóo̱n!