Xo̱jo̱n Salmoo̱ 42 - Xo̱jo̱n eén Néná

Néná boá xi kjimaꞌniátakón an

Én xí bokoyáná ngo ni, xi katsꞌénda xota̱ ngo ndiꞌaa̱ Koree̱.

¹ Xikó má maá nga ma xíndaá ngo ndi̱kꞌijñá, nga ma mejeén ndáfoaa̱ xo̱ngàndántꞌieé, bo̱a̱ má tsꞌén mongasee̱ ini̱ma̱na ji Ne.

² Ini̱ma̱na xíndaá nga mejeén sku̱i̱e̱ Néná, kui Néná xí tikoón. Kjiꞌání nga kjuín án na̱ngo̱xi̱i̱, kó kjóchó an ngindyikin ji.

³ Ndándyíkón án boá xi kamá ni chiniena ko̱jo ni xi katsꞌe an nga ni̱xtjin ni̱xtji̱e̱n, tji̱e̱nga nga ngo ni̱xtjii̱n nga bi̱ kiꞌmína: «¡Ñá tikón Nèe̱ ngotꞌe̱ ꞌne̱!»

⁴ Kjiꞌanga foaꞌátsjienna kui nii̱, achichí ndasen mana, kó foaꞌátsjienna kjiꞌanga kijí an ndi̱yà xí fí na̱ngo̱xi̱i̱ nga kistsoꞌbátjóo̱n xota̱ kjiín, foaꞌátsjienna sꞌué xí ꞌniuú, ko̱jo nga na̱xi̱ńdáa̱ askjandáyátsjá má nga katsꞌéntsjaà.

⁵ Míkjo̱a̱a̱ nga ngiti̱ kjimaꞌniútakínjín ji ndí ini̱ma̱. Míkjo̱a̱a̱ nga nda̱ kjimaa̱ ngi̱jin yojona. Chiyéràa̱ Néná, ngatꞌa̱ to̱kó sa̱ꞌintsjáñáa̱ ¡Néná boá xí ꞌboxiéꞌána, kó kuí boá xi Néna!

⁶ Achichí ni xi nda̱ kjimaa̱ ini̱ma̱na ngi̱jin yojona, kuíni nga kjo̱a̱ꞌátsjienna ji ndeskande tꞌanangii̱ ndejèꞌ Jorndaa̱n, ko̱jo ndeskande na̱xi̱ Ermoo̱n, ko̱jo na̱xi̱ Misaa̱r.

⁷ Ngo nínga nkꞌa chji̱a̱a̱ kje̱ꞌe nínga nkꞌa ngandaꞌyaá xikótsꞌèn fonie ngo ndejèꞌ sijén xi ꞌniú ꞌbóka ndáfoaa̱. Ngaꞌniuú ndáfoàa̱ an jaꞌaniéna.

⁸ Nga ni̱xtjii̱n Néná tsangiya kjo̱a̱ni̱ma̱takoón, kó nga jñoó kuintꞌièe̱ soó. Bi̱ tsꞌén chjiáa̱ Néná xí tsi̱ꞌe̱ kjo̱a̱mindyionna:

⁹ Bi̱ xiáa̱n kui: Ji xi ndi̱jo̱ jena. Míkjo̱a̱a̱ nga kiniꞌínchíyéní. Míkjo̱a̱a̱ nga tikón xa̱ꞌya̱ an, ta̱ngatꞌanii̱ nga kondra̱na ndajín tjítsꞌénjo̱na.

¹⁰ Kondra̱na tsꞌénkjánjo̱na xikó maá xi kjítꞌó ńdaná, kó ndyiojón ndyiojón bi̱ ndyi̱tsóna: «¡Ñá tikón Nèe̱ ngotꞌe̱ ꞌne̱!»

¹¹ Míkjo̱a̱a̱ nga ngiti̱ kjimaꞌniútakínjín ji ndí ini̱ma̱. Míkjo̱a̱a̱ nga nda̱ kjimaa̱ ngi̱jin yojona. Chiyéràa̱ Néná, ngatꞌa̱ to̱kó sa̱ꞌintsjáñáa̱ ¡Néná boá xí ꞌboxiéꞌána, kó kuí boá xi Néna!