Xo̱jo̱n Salmoo̱ 40 - Xo̱jo̱n eén Néná

Néná boá xi ꞌbijñándéna

Só xi katsꞌénda Ndabii̱.

¹ Askoyá sakon sakòo̱n Néná, kó asiénnijonna nga tsintꞌié nga ni̱ma̱ kixiáa̱n nga tsíchji̱a̱a̱.

² Kó tsꞌaxiéna nga tsꞌénkayà an ki̱a̱ ti̱xa̱ nínga nda̱ máná, ki̱a̱ ngi̱jin ndásee̱ chi̱ndyiaa̱. Kuí boá xi ngo ndi̱jo̱je asién són ndsa̱ko án, kó ꞌniú nda katsꞌénkjítsoꞌbána.

³ Kósꞌe̱ ngo só tja̱tsi̱e̱ íjñá ngi̱ya ndso̱ꞌba án, ngo só xi nda nga niꞌántsjaá Néná. Achichí má xota̱ xi sku̱i̱e̱ kui nii̱, kó sku̱i̱e̱ndikón, kó kamáꞌniátakón Néná.

⁴ Achichíra̱tsjaa̱ kui nda̱ xi Néná kjimaꞌniátakón, kui xi ki̱a̱jín kotsijee̱n xota̱ xi nkꞌakoo̱n ko̱jo xota̱ xi ki̱a̱ fítji̱ngi ni xi Nénájín.

⁵ Ji Ne xi tsa̱ꞌa̱n, jè kiniꞌín kjín ngase ji kjo̱a̱ndikóo̱n, ko̱jo ni xi kiniꞌín ji nganda tsa̱ji̱n. Jmíjín xi kjo̱chótji̱ngii̱ ji. Tsi xiyà an ngayeje kui nii̱ nde jmíjín xi ka̱maxki̱i̱.

⁶ Tsjájín maá kjo̱a̱tjoó ko̱jo ni xi niꞌánkꞌasꞌiee̱n. Jè kachjéxꞌé jí tji̱bo̱a̱nijón án, kichjiéꞌéjín ji nga cho̱ kꞌuítií, ko̱jo tsi chji̱e̱ xi niꞌánkꞌasꞌien kjo̱a̱a̱ jeé.

⁷ Kuíni nga bi̱ xiaan: «Kꞌi̱e̱ tikón an kꞌi̱e̱e̱». Jè kjitꞌa ki̱a̱ chꞌo̱ xo̱jo̱o̱n nínga bi̱ tsó kjo̱a̱a̱ an:

⁸ Ji Ne tsa̱ꞌa̱n, nga tsꞌenkjatjosón an ni xi mejeén ji, kuí nii̱ xi tsie ngase kjo̱a̱tsja tsjána, ¡kó kjo̱a̱bokoyáa̱ ngi̱jin ini̱ma̱na tikónjin!

⁹ Jè kixiya an én tja̱tsi̱e̱ xi chji̱a̱ kjo̱a̱a̱ kjo̱a̱kixi̱i̱, ngindyi̱ko̱n xota̱ kjiín. Jè ye ji Ne, nga yikjojín an ndso̱ꞌba án.

¹⁰ Ti̱nde iꞌmajín an kjo̱a̱kixi̱i̱ ngi̱jin ini̱ma̱na, jè kixiya an kjo̱a̱ꞌniátakóo̱n, ko̱jo kjo̱a̱ꞌnaxiéꞌáa̱, kó ngindyi̱ko̱n xota̱ kjiín tsꞌénꞌbijñáꞌmájín, kjo̱a̱ni̱ma̱takóo̱n ko̱jo kjo̱a̱kixìi̱.

¹¹ Kó ji Ne, te̱ꞌéní kjo̱a̱ni̱ma̱takóo̱n, ko̱jo kjo̱a̱ndàa̱, ko̱jo kjo̱a̱ꞌniátakóo̱n ngatsjéni̱xtjin.

¹² Ngatꞌa̱ achichí má ni xi ndajín xi je jaꞌatjiyajonna, jè katsꞌénna kui ni xi ndajiín, nde ngiti̱ májín kjininkꞌá an ndyikón án, kjín ngase ma ta̱bo̱a̱jiín xikó kjiꞌi ma tsja tokó án, kó ini̱ma̱na je ngiti̱ chikjo̱a̱jiín.

¹³ ¡Ji Ne, ngo kjo̱a̱nda míꞌaá, ꞌna̱xiéjinní kuí nii̱! ¡Ji Ne, ngo kjo̱a̱nda míꞌaá, tsá ndibékasíke̱jechiíní!

¹⁴ Ti̱ꞌintsobéjìi̱n ko̱jo te̱ꞌée̱ kjo̱a̱soboá ngayeje xota̱ xi mejeén sa̱ꞌínkꞌiénna, ti̱ꞌin ji nga ko̱nga nga xcha̱ja ngayeje xota̱ xi mejeén nga ndajín ka̱mana.

¹⁵ Ti̱ꞌìi̱n, kó ti̱ꞌinkjeꞌe ji kjo̱a̱soboá kui xota̱ xi ndyi̱mojnókiena nga éa éa ndyi̱tsó.

¹⁶ ¡Tsjangatamaa̱ kó tsjangatꞌieé ngatꞌaa̱ ji ngayeje xi ji ndyi̱mongasee̱! Ngatsjéni̱xtjin bi̱ nga tsó xota̱ xi tsja maa̱ kjo̱a̱ꞌnaxiéꞌáa̱: «¡Achichí ngaꞌniú tjiín Néná!»

¹⁷ Kó an ki, ndatsi ndasen tikón an, ko̱jo ndatsi ni chjiénna, ¡Néná boá xi kjo̱a̱ꞌátsjiee̱n an! Ji Ne, jí boá xi bosíke̱jení, jí boá xi ꞌnaxiéꞌéní, ¡ngata̱ niꞌínkꞌandíyejín ji, ngo kjo̱a̱nda!