Xo̱jo̱n Salmoo̱ 4 - Xo̱jo̱n eén Néná

Néná boá xi tsjáná kjo̱a̱xió

Só xi katsꞌénda Ndabii̱.

¹ Ji Ne, ji xi tjiín kjo̱a̱kixi̱i̱, ¡ti̱ꞌinsénní kjiꞌanga kuichjiáa̱! Kjiꞌanga achichí nda̱ kamána jí boá xi katseꞌéní ngaꞌniú, ¡ngatamani̱ma̱a̱ an, kó ndaꞌyé ji nga kuichjiaá!

² Jún xi xota̱ nga̱sondiee̱ jún, ngaskande kjiꞌání nga to̱kó kjo̱a̱soboá si̱ꞌánjnú kjo̱a̱jena, ngaskande kjiꞌání nga to̱kó si̱ꞌantjójnú ni xi jmí ni chjíjiín ko̱jo ngaskande kjiꞌání nga to̱kó ku̱i̱ndyi̱séjnú kjo̱a̱ndisoo̱.

³ Ta̱ ngo ndi̱yà ngatamayajnú, nga Néná jè jaꞌájin xota̱ xi kixi̱i̱, kuíni nga: ¡Néná ntꞌiéna kjiꞌanga chjiáa̱!

⁴ ¡Ngatjatsiémájnú, kó nga niꞌánjéjínjnú! Kjiꞌanga tsjayójojnú, ti̱ꞌankjójnú ni xi kiniꞌánjnú, kó xió ti̱ndyiónjnú.

⁵ Ti̱ꞌankꞌasꞌiénjnúu̱ Néná ngo kjo̱a̱tjó xi kjo̱a̱kixi̱i̱, kó ngatama ꞌniátakónjnú kuí.

⁶ Kjín má xota̱ xi bi̱ tsꞌén bosíyá: ꞌYá xí ko̱kóna ni xi ndaa̱. Ji Ne tsa̱ꞌa̱n, takejne̱ ndiꞌií kje̱n ji, kó kuí xí ngatsꞌéntsíjenjne̱.

⁷ Jí boá xi katseꞌée̱ kjo̱a̱tsja ini̱ma̱na, tsꞌatio ngase katseꞌée̱ ta̱bo̱a̱jiín kui xotaa̱, ndatsi tsie to ndso̱ko̱a̱n ṉño̱pan ko̱jo bino̱ tjiín.

⁸ Tjínna kjo̱a̱xió nga kjojña an, ko̱jo nga ko̱e̱ꞌéńjñána, ngatꞌa̱ ta̱ jí tsí xi kjimaꞌniátakoón ji Ne.