Xo̱jo̱n Salmoo̱ 39 - Xo̱jo̱n eén Néná

Ta̱ ngotjón tindyión

Só xi katsꞌénda Ndabii̱ ko̱jo Jendutuu̱n.

¹ An bi̱ kixian an: Skóo̱n ni xi sa̱ꞌin an, tsi̱ꞌe̱ nga sa̱ꞌinjéjín an najén án, kokjo an ndso̱ꞌba án tji̱e̱nga xota̱ xi ꞌniú ndajiín ki̱a̱ síndo ngindyikón án.

² Xikoó tsi kamáni̱ma̱ an nga xió kisꞌijña an, yikjo an ndso̱ꞌba án, kó nde ngo ni xi nda tsíchji̱a̱jín an, kó kamáꞌniú ngase xi so xi ndakjanna.

³ ¡Ini̱ma̱na xikoó tsi kitíngajon ngi̱jin yojona! Kó tji̱e̱nga ꞌniú ngase katsꞌenkjó án, kamáꞌniú ngase kui ndiꞌií, kósꞌe̱ katsꞌenkjién án najén án, kó bi̱ kixian an:

⁴ «Ji Ne, tꞌíyéní kótsꞌèn kju̱i̱e̱tꞌa ni̱xtjinna, kó kjíꞌí chi̱bo̱a̱ xi je tikoón ni̱xtjinna, tsi̱ꞌe̱ nga ti̱ aa̱n xi skuie an nga tsiejín kꞌo̱ndíyána kui nga̱sondiee̱.

⁵ Xikoó tsi ndse̱ tichꞌíchi̱bo̱e̱ ji ni̱xtjin xi katseꞌéní, kó nde nijín bo̱a̱ ngindyikin ji nó xí tjínna. Ja̱koxi̱ boá nga ta̱kjo̱a̱ndaní nga ꞌbíjñá nga̱sondie ngo xota̱.

⁶ Ta̱ xikónií tsi ngo ni xi ja̱koxi̱, nga síndo xotaa̱ kui nga̱sondiee̱, ta̱kjo̱a̱ndaní nga ki̱a̱ mongatji̱ngii̱ tjo̱o̱, ngatꞌa̱ tsie kjo̱a̱cho̱n foaꞌátjó, ta̱nga nde bejín ꞌyá xota̱ xi tsi̱ꞌe̱ ka̱ma kui nii̱.

⁷ »Kó ngotꞌe̱ ꞌne̱ Ne, mí xí skoya ngasèe̱ an. ¡Jí boá xi kjo̱a̱chiyána ji!

⁸ Ti̱ꞌindéní kjo̱a̱a̱ ngayeje ni xi ndajín xi katsꞌen an, ¡ngata̱ boeꞌéndièjín ji nga xota̱ xi kitikjo̱a̱a̱ ko̱jno̱kiena!

⁹ »Xikoó tsi kamáni̱ma̱, iskjíxꞌájín an ndso̱ꞌba án, ¡ngatꞌa̱ jí boá xi bo̱a̱ kase ji nga bo̱a̱ ka̱ma!

¹⁰ Ngiti̱ niꞌínjéjínní ngase, ngatꞌa̱ ndse̱ boá xi tjítsꞌénꞌónna.

¹¹ Jí boá xi niꞌínjée̱ xotaa̱, kó niꞌínchji̱ni̱ ji kjo̱a̱a̱ ni xi ndajín xi ndyi̱tsꞌèn, kó xikoó xobií nga niꞌínkjatsén jí kjo̱a̱tsjakjiꞌii̱. Nga Ja̱koxi̱, ta̱kjo̱a̱ndaní bo̱a̱ xota̱ nga̱sondiee̱.

¹² »Ndaꞌyé ji nga kuichjiaá ji Ne, kó tasínijin ji nga ni̱ma̱ xiaán, ngata̱ xiójín mindyin ji nga ko̱nda̱ꞌyé ji nga skjandá an. Ngatꞌa̱ jè xikoó tsi ngo xota̱ xi xín chji̱a̱ni kjimaa an, ngo xota̱ xi kꞌi̱e̱jín chji̱a̱ni xikoó ngayeje xota̱ xi xchána.

¹³ Xín ti̱ꞌinkjeꞌéní kjo̱a̱niꞌánxcháa̱n, tsi̱ꞌe̱ nga sa̱kóngaꞌniúna, ngindiee̱ nga kjuín án, kó ngiti̱ kotíjña̱jín an».