Xo̱jo̱n Salmoo̱ 38 - Xo̱jo̱n eén Néná

¡Ndibékasíke̱jení!

Só xi katsꞌénda Ndabii̱, xi nda nga niꞌánkꞌasꞌien kjo̱a̱tjoó ni sije̱e̱n.

¹ Ji Ne, tsi tiniꞌínxchín jí, ngata̱ niꞌínxchínje̱jínní, kó tsi xtii̱, ngata̱ niꞌínjéjínní.

² Ngatꞌa̱ án boá xi kasatiena yáyojóo̱, kó ti̱ án boá xi je kiniꞌínkjìnní ndse̱.

³ Nde ngiti̱ chiíjiín nínga nda ngase yojona, ta̱ngatꞌanii̱ nga achichí ꞌniú tiniꞌínxchín jí, jè ngiti̱ ndajín ńdana, ta̱ngatꞌanii̱ jé xí katsꞌen an.

⁴ Ngatꞌa̱ ni xi ꞌniú ndajín xi katsꞌen an je kamáꞌniúnié an, kó xikó maá tsi ngo chꞌià é kjimá xi ngiti̱ chikjo̱a̱jínna.

⁵ Nínga onna je chꞌoje̱n, kó je tjitjoó ndátjítsi̱é, ta̱ngatꞌanii̱ kjo̱a̱tsobéna.

⁶ Jè tjitíkoyá má yojona, jè ni̱ma̱kjo̱a̱ tikòn an, nga ngo ni̱xtjii̱n nga ndasen tsoꞌbá an.

⁷ Ngatꞌa̱ achichí je bojójón yojoyìtsꞌe̱n an, ngayeje yojona nga jè on.

⁸ Jè kamáꞌinda an, kó achichí jè onna, ni̱ma̱ tꞌíxián an, ta̱ngatꞌanii̱ ni xi kjimaa̱ ini̱ma̱na.

⁹ Ji Ne, ngindyikin ji je tikón ngayeje ni xi mejénna, kó tjiꞌmájiín kjo̱a̱chaꞌána.

¹⁰ Ini̱ma̱na ꞌniú tsꞌénkjínkꞌá, jè ngiti̱ jmí ngaꞌniújínna, kó ngaskande ndyikón án jè kjima xa̱.

¹¹ Amingo̱na ko̱jo xota̱ xi nda yaꞌana, jè katsꞌénkjinna yojoo̱ ta̱ngatꞌanii̱ nínga onna, ko̱jo xota̱ xingi̱ án ti̱ je katsꞌénkjinna yojoo̱ nga.

¹² Xota̱ xi mejeén sa̱ꞌínkꞌiénna chja̱ya̱ ndyi̱ꞌbijñána, xota̱ xi mejeén nga ndajín ka̱mana chꞌo tsó kondra̱na, kó nga ngo ni̱xtjii̱n nga ndyi̱ꞌbínda ni xi ndiso.

¹³ Ta̱nga an ntꞌiejáa̱n, xikoó tsi xtiya an, ko̱jo kjíxꞌájín an ndso̱ꞌba án, xikoó tsi ni̱ma̱ an.

¹⁴ Kjénní nga xikoó tsi ngo nda̱ xi ntꞌiéjín je kamá an, ko̱jo ngo nda̱ xi xi jmíjiín ni xi ka̱tso̱.

¹⁵ Ngatꞌa̱ jí boá xi tsꞌénkoyaa̱ ji Ne. Ji Ne, ji Ndi̱a̱ jí boá xi ko̱ndókjo̱e̱jení.

¹⁶ Kuíni nga bi̱ xian an: Ngata̱ tsjajín májnú kjo̱a̱a̱ an, kó tsi ko̱ngajon an, ngata̱ ánjín mojnóchàjnúꞌun.

¹⁷ Ngatꞌa̱ jè mejeén kꞌo̱ka an, ngatꞌa̱ kui xi so xi ndakjaa̱n ngiti̱ xixiójín.

¹⁸ Kuíni nga chjiéngá xiyaá ni xi ndajín xi katsꞌen an. Kó ndasen kotíjña̱ an kjo̱a̱a̱ jé xí katsꞌen an.

¹⁹ Kondra̱na to̱kó síndo boá, kó achichí ngaꞌniú tjiín, kó achichí je kamákjín xi chꞌoo̱ an kjo̱a̱a̱ ni xi kjimana.

²⁰ Ndajín ndyi̱ꞌbíchjína ni nda xi katsꞌée̱n, kó kondra̱na kjima, ngatꞌa̱ ni xi ndaa̱ boá xi tsꞌénfítji̱ngi an.

²¹ Ji Ndi̱a̱ ko̱jo Ne, ngata̱ ꞌbíjñímasínjínní, kó ngata̱ kjinjín niꞌínní yojòo̱.

²² Tsá tasíke̱jechiíní, Ji Ne, jí boá xi kjo̱a̱ꞌnaxiéꞌána.