Xo̱jo̱n Salmoo̱ 37 - Xo̱jo̱n eén Néná

Nga tsꞌén xota̱ xi ndaa̱, kó ngachaja xota̱ xi ndajiín

Só xi katsꞌénda Ndabii̱.

¹ Ngata̱ niꞌínxchínjín ji ta̱ngatꞌanii̱ xota̱ xi ndajiín, ti̱nde ngata̱ maꞌónjíntakín kjo̱a̱a̱ xota̱ xi ni xi ꞌniú ndajín ndyi̱tsꞌe̱én,

² ngatꞌa̱ bo̱a̱ si̱ꞌanjo̱ xikoó kꞌijñaá, nga tsá ku̱i̱chá, ko̱jo bo̱a̱ ka̱maa̱ xikoó kꞌijñá xí sa̱si̱e̱e̱ nga tsá xí.

³ Néná ti̱ꞌinꞌnítakín ji, kó ni xi nda ti̱ꞌin ji, ku̱i̱ndyin ji kui tꞌanangii̱, kó ni xi ja̱koxi̱i̱ ti̱ꞌinꞌnítakín ji.

⁴ Tsjangatamaa̱ ngatꞌaa̱ Néná, kó kuí boá xi tsja̱á ni xi mejeén ini̱ma̱a̱.

⁵ Ngi̱ya tsja Néná tꞌíjñí ji ndyi̱yà nínga tsꞌentje̱ ji, ti̱ꞌinꞌnítakín kui, kó kuí boá xi sa̱ꞌín ngayeje nii̱.

⁶ Ku̱i̱ꞌíjñá tsijen kjo̱a̱kixi̱i̱ xikó maá nínga tsijee̱n, kó kjo̱a̱ndàa̱ ku̱i̱ꞌíjñá tsijen xikó maá nga ma masien ndisꞌueé.

⁷ Ngata̱ ndokjo̱e̱jín ji ngindyi̱ko̱n Néná, kó chiyé sakon sakòo̱n nga ko̱síko̱joo̱, ngata̱ niꞌínxchínjín ji ta̱ngatꞌanii̱ xota̱ xi tjoninkꞌaa̱ yojoo̱, ko̱jo kjo̱a̱a̱ xota̱ xi ni xi ndajín ꞌbíndaa̱.

⁸ Tꞌíjñímasin ji kjo̱a̱xtindaa̱, kó kjin tjajmi ji kjo̱a̱tamaá, ngata̱ niꞌínxtíjíi̱n yojòo̱ nga ni xi ꞌniú ndajín xi si̱ꞌin ji.

⁹ Ngatꞌa̱ xota̱ xi ndajiín si̱ꞌankjie, ta̱nga xota̱ xi Néná ndyi̱koyaa̱, kuí boá xi sa̱ko̱ó tꞌanangii̱.

¹⁰ Jè ta̱ chiboa tsí ni̱xtjin chajaa̱ nga ngiti̱ kꞌuiéjín ngase xota̱ xi ndajín, ji stsitsíjin cha̱n cha̱a̱n ngi̱ndie nínga kisꞌińdo, ta̱nga jè ngiti̱ ki̱a̱jín kꞌuíndo.

¹¹ Ta̱nga xota̱ xi ntꞌiéꞌeén sa̱ko̱ó tꞌanangii̱, xi achichí tsjá ka̱maa̱ kjo̱a̱a̱ kjo̱a̱xió tsie xi kꞌuieé.

¹² Xota̱ xi ndajiín tsꞌénkjó ni xi ndajín xi mejeén sa̱ꞌínjo̱ xota̱ xi kixi̱i̱, kó ngaskande kjinieya má ṉꞌni̱u̱ kondraa̱ xota̱ xi kixi̱i̱,

¹³ ta̱nga Néná ta̱ mojnókie tsí kui xotaa̱, ngatꞌa̱ jè be nga je makjachó ni̱xtjii̱n.

¹⁴ Xota̱ xi ndajiín ꞌboxié ki̱cha̱ndojoó kó ꞌbíndonda yáchjonyaá ko̱jo yáyojoó tsi̱ꞌe̱ nga kꞌo̱jmingí xota̱ ni̱ma̱a̱, ko̱jo xi ni chjieén, ko̱jo tsi̱ꞌe̱ nga sa̱ꞌínkꞌién kui kixi̱ síndoo̱.

¹⁵ ¡Ta̱nga ti̱ kuii̱ ki̱cha̱ndojoó xi kjo̱a̱ꞌaxtikjaá ini̱ma̱a̱, kó chjátꞌó yáchjonyaá!

¹⁶ Nda ngase nda ni chií xi tjiín xota̱ xi kixi̱i̱, ta̱bo̱a̱jiín ni tsie xi tjiín kjín xota̱ xi ndajín.

¹⁷ Ngatꞌa̱ chjátꞌó tjiaa̱ xota̱ xi ꞌniú ndajiín, ta̱nga Néná boá ꞌniú tsꞌénkꞌijñá xota̱ xi kixi̱i̱.

¹⁸ Be Néná ni̱xtjii̱n xota̱ xi kixi̱i̱, kó xi katsóyàtjón Néná nga tsja̱á, ngatsjéni̱xtjin nga kui tsi̱ꞌe̱ ka̱ma.

¹⁹ Kjiꞌanga kji̱ndi̱bá ni̱xtjin xi ndajiín, jmí kjo̱a̱soboá kjo̱a̱ꞌajín, kó kjiꞌanga kji̱ndi̱bá ni̱xtjii̱n kjindiaá sa̱ko̱ó nichinie.

²⁰ Ta̱nga xota̱ xi ndajiín kju̱i̱e̱, ¡kó xota̱ xi kondraa̱ Néná kju̱i̱e̱, xikótsꞌèn fe xinieé cho̱tsa̱nga̱a̱, kó xcha̱ja ngi̱jinꞌa̱sie̱èn xikó maá ṉdi̱i̱!

²¹ Xota̱ xi ndajiín míyá, kó tsꞌénsónjín ni xi tsjiee̱n, ta̱nga xota̱ xi kixi̱i̱, tjiín kjo̱a̱ni̱ma̱takón kó tsie ni xi tsjá.

²² Ngatꞌa̱ xota̱ xi Néná jè katsꞌénchikonñé kuí boá xi sa̱ko̱ó tꞌanangii̱, ta̱nga xota̱ xi Néná jè bo̱a̱ katsó nga ndajín ka̱maa̱, si̱ꞌankjie.

²³ Néná boá xi nda tsꞌénkjí nínga fí kui nda̱ xi Néná tsjá maá ndi̱yà nínga tsoꞌbá.

²⁴ Kó ndatsi kꞌo̱ka, ta̱nga kjo̱stjíe̱n nginí, ngatꞌa̱ Néná boá xi kjiꞌiꞌniuú tsja.

²⁵ Jè jaꞌá nga kamáxo̱ngò án, kó jè xchá án ngotꞌe̱, ta̱nga kji̱e̱ sa bejín an nga xota̱ xi kixi̱i̱, síndomasien, ti̱nde kji̱e̱ sa bejín nga nichinie ndyi̱míꞌasón ndií.

²⁶ Ngatsjéni̱xtjin nga tjiín kjo̱a̱ni̱ma̱takón, kó tsꞌénkíyà, kó ndií, kjo̱a̱niꞌánchikonñé maá kje̱ꞌe xota̱.

²⁷ Ti̱xínboeꞌée̱ ni xi ndajiín, kó ni xi ndaa̱ ti̱ꞌin, kó ngatsjéni̱xtjin ki̱a̱ kꞌuieé ngi̱ndie nínga ku̱i̱ndyin ji.

²⁸ Achichí tsjá maá Néná ni xi kixi̱i̱, kó jmíni̱xtjin nga ꞌbijñámasien xota̱ xi kui ꞌniátakón. ¡Ngatsjéni̱xtjin nga kui skoón! Ta̱nga xota̱ tji̱e̱e̱ xota̱ xi ndajiín, si̱ꞌankjie.

²⁹ Xota̱ xi kixi̱i̱ boá xi sa̱ko̱ó tꞌanangii̱, kó ngatsjéni̱xtjin nga ki̱a̱ kꞌuíndo.

³⁰ Tsꞌoa xota̱ xi kixi̱i̱ kjo̱a̱kjíntakoón boá xi chji̱a̱, kó na̱je̱n kjo̱a̱kixi̱ boá xi chji̱a̱.

³¹ Kjo̱a̱kitii̱ Nee̱ ki̱a̱ tikónjin ngi̱jin ini̱ma̱a̱, kuíni nga jmíni̱xtjin mongajon se.

³² Xota̱ xi ndajiín kotsijenꞌmaá xota̱ xi kixi̱i̱, kó mején maá nga tsꞌenkꞌién,

³³ ta̱nga Néná tsja̱ndièjín nga ngi̱ya tsja xota̱ xi ndajiín kꞌo̱ka, ti̱nde tsja̱ndièjín nga si̱ꞌanjeé kjiꞌa xchítꞌa tsi nda ko̱jo tsi ndajín katsꞌén.

³⁴ Chiyéràa̱ nga ko̱síko̱joo̱ Néná, kó tꞌenra ji ndi̱ya̱à kui, ngatꞌa̱ kuí boá xi nkꞌa ku̱i̱ꞌíjñaá kjiꞌanga tsja̱á kui tꞌanangii̱, ¡Kó jí má xi xchi̱e̱ ji, kjiꞌanga si̱ꞌankjie xota̱ xi ndajiín!

³⁵ Án má xi je kamábe an nga xota̱ xi ndajín nkꞌa ꞌboxié yojoo̱, kó ma je xikó maá ngo yá xí tsingá tikón ki̱a̱ tꞌanangii̱.

³⁶ Ta̱nga kjiꞌanga ki̱a̱ bitja tꞌa nínga tikón, jè ngiti̱ ki̱a̱jín tikón, tsangase an, ta̱nga ngiti̱ kasakojínna.

³⁷ Nda nda má ti̱ꞌinkjé jí ko̱jo tsitsíjìi̱n xota̱ xi kixi̱i̱, ngatꞌa̱ achichí nda fetꞌani ni̱xtjii̱n kui nda̱ xi tjiín kjo̱a̱xioó,

³⁸ ta̱nga xota̱jeé, ta̱ ngo ndi̱yà si̱ꞌankjie ngayejee̱, kó ni xi sa̱ko̱ó nga kju̱i̱e̱tꞌani, kuí boá nga kju̱i̱e̱ ndo̱jò ndójo̱.

³⁹ Néná boá xi tsjaá kjo̱a̱ꞌnaxiéꞌá xota̱ xi kixi̱i̱. Néná boá xi tsja̱angaꞌniuú ni̱xtjin xi ndajiín.

⁴⁰ Néná boá xi bosikójo, ko̱jo xi tsꞌéndé, tsꞌéndé ngi̱ya tsja xota̱ xi ndajiín, kó ꞌboxiéꞌá, ngatꞌa̱ Néná boá xi askoo̱n kó kamáꞌniátakón kuí.