Xo̱jo̱n Salmoo̱ 35 - Xo̱jo̱n eén Néná

Néná ntꞌié nga ndokjo̱a̱a̱

Só xi katsꞌénda Ndabii̱.

¹ Ji Ne, ndokjo̱e̱tije̱ ji xi an ndyi̱chji̱a̱tijo̱na, kó ti̱xkénje̱ ji xi an ndyi̱kjánjo̱na.

² ¡Chjábé jí ni xi ꞌbíchjaá ni xi ndajiín, kó ndibékasíke̱jení!

³ ꞌNaxié ji yáyojoó, kó tꞌíchjée̱ xota̱ ndyi̱mongatji̱ngina. Tꞌíyetjénní nga jí boá ko̱ꞌna̱xiéꞌéní.

⁴ Ti̱ꞌinkjeꞌe ji kjo̱a̱soboá ko̱jo ti̱ꞌintsobéjìi̱n xota̱ xi mejeén sa̱ꞌínkꞌiénna, ti̱ꞌinkjí nginí ji nga̱xto̱n ko̱jo ti̱ꞌintsobéjìi̱n xota̱ xi mejeén nga ndajín ka̱mana.

⁵ ¡Bo̱a̱ ngatamaa̱ xikó maá xtjié xí fíjo̱ tjo̱o̱! ¡Kó ndítsjiee̱ Néná tsá ngatangatji̱ngii̱!

⁶ ¡Ngatamajñó ndi̱ya̱à, ko̱jo ńdó ngatama! ¡Kó ndítsjiee̱ Néná ngatangatji̱ngii̱!

⁷ Ngatꞌa̱ nde jmí kjo̱a̱jiín nga chja̱ya̱ íjñána, ko̱jo nde jmí kjo̱a̱jiín nga ngo ti̱xa̱ katsꞌéndana.

⁸ ¡Ngatjandibánié ni xi ndajín ngindiee̱ nga sku̱i̱e̱! ¡Ngatꞌákayà ti̱ kuii̱ chja̱ya̱ xi kui íjñá, kó ki̱a̱ ngatꞌákayà nga on ka̱maa̱!

⁹ Achichí tsjá ka̱mana kjo̱a̱a̱ Néná, achichí tsjá ka̱mana kjo̱a̱a̱ kjo̱a̱ꞌnaxiéꞌaá.

¹⁰ Ngayeje ńdana, bi̱ ka̱tso̱: «¡Ji Ne, jmíjín ingo Ne xi xikoó jí! Ji xi ꞌnaxiéꞌé ji xota̱ xi indaa̱, kjo̱a̱a̱ xota̱ xi ꞌniú ngasee̱, ko̱jo ꞌnaxiéꞌé ji xota̱ ni̱ma̱a̱ ko̱jo xi jmí nijiín, kjo̱a̱a̱ xota̱ xi foaꞌáxiín ni xi tjiín».

¹¹ Fostjíe̱n chistiko̱ xi ndajiín xi ndyi̱ꞌbindísótaꞌinna, kó ni xi nde bejín an bosíyána.

¹² Ndajín tsꞌén ndyi̱ꞌbíchjína kjo̱a̱a̱ ni nda xi katsꞌée̱n, kó achichí ndasen mana kjo̱a̱a̱ kui nii̱.

¹³ Ta̱nga kjiꞌanga kamáꞌoón kui, ngaskande ńjño tokjuie tsajá an, kó katsꞌenkjaꞌa an kjindiá yojona nga ndasen kamána, sꞌe̱ ni̱ma̱ kixian an nga tsíchji̱a̱a̱ Néná, ngaskande nga jatjosón ni xi tsíꞌáa̱.

¹⁴ Bo̱a̱ katsꞌenjo̱ an xikó niꞌánjo̱ ngo nda̱ xi nda yaꞌaná, ko̱jo tsi xikó niꞌánjo̱ ngo ntsꞌié, askjandátjé an xikó má tsꞌén ngo xi kjandátjé nga ꞌme na̱aa̱n, ndasen ko̱jo ni̱ma̱kjo̱a̱ ijñá an yojona.

¹⁵ Ta̱nga nga kamábe nga ndajín kamána, achichí tsjá kamaá, kó nijan kamátikó ko̱jo kje̱ꞌe xota̱, kui xi nde bejín an ꞌyá kuií bo̱a̱, kó ta̱soboá án ndyi̱mojnókiena.

¹⁶ Xikó maá xota̱ xi ndajín, nga chꞌo tsꞌén ndyi̱mojnókiena, ¡kó ngaskande iskjinieya má ṉꞌni̱u̱ nga chꞌo maa̱ an!

¹⁷ Ji Ndi̱a̱, ngaskande kjiꞌání nga to̱kó stsitsíjìi̱n kui nii̱. ¡ꞌNa̱xiéꞌé ji kjo̱a̱mindyionna, ngi̱ya tsja kui xota̱ xi ja̱kon xandi̱je̱ má koón!

¹⁸ An tsjaa̱ ndokꞌóchjì ngindyi̱ko̱n ngayeje xota̱ na̱xi̱ńdáa̱, An sa̱ꞌintsjaá ngi̱jii̱n kui xota̱ na̱xi̱ńdáa̱ xí achichí kjín maá.

¹⁹ Ngata̱ mojnókiejínna kui xi nde jmí kjo̱a̱jiín nga kondra̱na kjima, ti̱nde ngatꞌa̱ ꞌbíchjándsójín ndyi̱ko̱n kui xi nde jmí kjo̱a̱jiín nga an sa̱ꞌínchꞌóna.

²⁰ Jmí tsi kjo̱a̱a̱ kjo̱a̱xió xi chji̱a̱, ta̱sá éndísó tsꞌénda kondraa̱ xota̱ xi ntꞌiéꞌén xi síndo nga̱sondiee̱.

²¹ Kjíxꞌá tiyá tiyá tsꞌoa nga bi̱ tsó kondra̱ tsa̱ꞌa̱n: «¡Ja, ja, ja, ndyikón má ji̱n xi ndyi̱be!»

²² ¡Ji Ne! Ti̱ tiye jí kui nii̱ nga, kuíni nga, ¡ngata̱ xiójín mindyin ji! ¡Ji Ndi̱a̱ ngata̱ niꞌínkjinjínní yojòo̱!

²³ ¡Tindyie ndyikin, kó ti̱ndyinde ji nga ko̱ꞌna̱xiéꞌéní! ¡Ji Ne, ji Ndi̱a̱, tꞌenjindaje̱ní kjo̱a̱a̱ ni xi kjimana!

²⁴ Ji Ne xi tsa̱ꞌa̱n, tatíjéní tsi ndajín katsꞌen an, xikótsꞌèn kixi̱ ji. ¡Ngata̱ boeꞌéndièjíi̱n nga ko̱jno̱chana!

²⁵ Ngata̱ bi̱jín ꞌmíjnú ngi̱jin ini̱ma̱jnú: «¡Jè jatjosón ni xi kamámejénná! ¡Jé kiniꞌánkjié ndo̱jò ndójo̱ò!»

²⁶ Ngatjaꞌa kjo̱a̱soboá, ko̱jo ngatama sibéjón yojoo̱ ngayeje xota̱ xi tsja maa̱ nga ndajín kjimana, soboá ngatamaa̱ ko̱jo ngatama tsobéjii̱n kui xi yiꞌi ngase maá yojoo̱, kó ta̱kjo̱a̱ maa̱ an.

²⁷ Nga sie ko̱jo tsjangatamaa̱ kui xi tsja maa̱, xikótsꞌèn kixi̱ tjíniꞌánjo̱na an. Kó ngatsjéni̱xtjin nga bi̱ nga tsó: «¡Achichí kjo̱a̱je tjiín Néná! ¡Ngatꞌa̱ mongase nga nda tsꞌén kꞌuijñá xota̱ xi mosoo̱!»

²⁸ Kó najen án ku̱i̱chji̱a̱ kjo̱a̱a̱ kjo̱a̱kixi̱i̱, kó nga ngo ni̱xtjii̱n nga ji sa̱ꞌintsjaá.