Xo̱jo̱n Salmoo̱ 33 - Xo̱jo̱n eén Néná

Nganiꞌántsjaá Néná xí katsꞌénda nga̱sondiee̱

¹ ¡Tsja ngatamajnú ngatꞌaa̱ Néná jún xota̱ xi kixi̱! Kjiꞌanga sie xota̱ xi kixi̱i̱, ndatsꞌèn ndaꞌyaá só xi ndaa̱ Néná.

² ¡Te̱ꞌéjnúu̱ ndokꞌóchji̱ì Néná nga si̱ꞌankjaniéjnúu̱ soó arpa̱! ¡Ndàjnúu̱ nga si̱ꞌankjaniéjnú salterioo̱ ko̱jo arpa̱ xi tie naxá tjiín!

³ Ndàjnúu̱ só tja̱tsi̱e̱ xi kji̱e̱ jmíni̱xtjin ndaꞌyá, Nda ti̱ꞌánjnú kui nii̱, kó tsja ngatamajnú nga si̱ꞌankjaniéjnú kui soó.

⁴ Ngatꞌa̱ kixi̱ boá eén Néná, kó ngayeje ni xi katsꞌénda bokó nga maꞌniátakón kuí.

⁵ Néná achichí tjoó kjo̱a̱kixi̱i̱, ko̱jo ni xi kixi̱i̱, kjo̱a̱ni̱ma̱takoón Néná tjikítsie má tꞌanangii̱.

⁶ Ta̱ngatꞌanii̱ én xí tsíchji̱a̱ Néná nga kamánda nkꞌajmii̱, ta̱ngatꞌanii̱ nda̱ xi jatjoo̱ tsꞌoa nga kamánda ngayeje ńñoo.

⁷ Néná boá xi ngo ndiè ꞌbitíkó ndáfoaa̱ ngayeje ndáchíkoón, kó ngo ni mindyiá ndáfoa xi tjín nínga ꞌniú na̱nga̱a̱.

⁸ ¡Ngayeje xota̱ xi tjín tꞌanangii̱, ngatamabendikón Néná! ¡Ngayeje xota̱ xi xi tjín nga̱sondiee̱, ngatjatsié má ngindyi̱ko̱n kui!

⁹ Ngatꞌa̱ kjiꞌanga kui xi tsíchji̱a̱, kamánda nii̱, kui katsjá ngo kjo̱a̱, kó jatjosón kui nii̱.

¹⁰ Néná tsꞌenkjié kjo̱a̱botíxomaa̱ na̱xi̱ńdaá, kó ꞌbíchjaá ni ndajín xi je tjíndaa̱ nga sa̱ꞌín xota̱ na̱xi̱ńdaá.

¹¹ Ta̱nga kjo̱a̱botíxomaa̱ Néná ngatsjéni̱xtjin nga tikón, kó kjo̱a̱niꞌánkjoó tikón ta̱kjiꞌání.

¹² ¡Achichíra̱tsjaa̱ na̱xi̱ńdá xí Néná boá xi Nee̱, kui xota̱ na̱xi̱ńdá xí Néná jaꞌájin tsi̱ꞌe̱ nga kui ku̱i̱chji̱a̱ni!

¹³ Néná tsꞌénkotsijenni ndeskande ki̱a̱ ndiꞌakꞌajmii̱, kó tsꞌénꞌbíndikón ngayeje xota̱ nga̱sondiee̱,

¹⁴ ndeskande ngi̱ndie nínga tikón kuí, tsꞌénkotsijee̱n ngayeje xotaa̱ kui nga̱sondiee̱.

¹⁵ Kui xi katsꞌénda ini̱ma̱a̱ ngayeje kui xotaa̱, tjítsꞌénkjó kjo̱a̱a̱ ngayeje ni xi ndyi̱tsꞌèn.

¹⁶ Jmíjín ngo re xi fotjoꞌa, tsi kjo̱a̱a̱ nga kjín jájún tjiín, ti̱nde jmíjín ngo nda̱ chꞌokon xi fotjoꞌaa̱ yojoo̱, tsi kjo̱a̱a̱ nga ta̱nisién tjiín ngaꞌniú.

¹⁷ Nde jmí ni chjíjiín ndi̱je̱e̱ tsi̱ꞌe̱ nga sa̱ꞌín ngo kjo̱a̱xchán, ngatꞌa̱ ndatsi tjiín ngaꞌniú, májiín ꞌboxiéꞌá ngo xota̱.

¹⁸ Ta̱nga Néná ngatsjéni̱xtjin nga tsꞌénkoón xota̱ xi bendikón kuí, ko̱jo xi ndyi̱koyaa̱ kjo̱a̱ni̱ma̱takoón.

¹⁹ Tsi̱ꞌe̱ nga kꞌo̱xiéꞌáni ngi̱ya tsja kjo̱a̱bo̱yaa̱, kó sa̱ꞌínkꞌíndora nga kjo̱chó ni̱xtjii̱n kjindiaá.

²⁰ Ji̱n boá xi ndyi̱chiyájne̱ Néná, kuí boá xi konjne̱ kó kuí boá xi ꞌbíchjaá ni xi ndajiín.

²¹ Kuíni nga ta̱ngatꞌanii̱ Néná nga achichí tsjá ka̱maa̱ ini̱ma̱jne̱, ngatꞌa̱ jaꞌén tsjiee̱ kjimaꞌniátakónjne̱.

²² Ji Ne, ngatꞌiéjne̱ kjo̱a̱ni̱ma̱takóo̱n ngatꞌa̱ kuí boá kui nii̱ xi ndyi̱chiyájne̱.