Xo̱jo̱n Salmoo̱ 30 - Xo̱jo̱n eén Néná

Kjo̱a̱tsja kiniꞌín ji kjo̱a̱ndasenna

Só xi katsꞌénda Ndabii̱ kjiꞌanga kiniꞌánkꞌasꞌien na̱ngo̱xi̱i̱.

¹ Tsjaa kjo̱a̱je ji Ne, ngatꞌa̱ jí boá xi kiniꞌínkjastji̱nní, kó tiboeꞌéndièjín ji nga ndyi̱mojnókiena kondra̱na.

² Ji Ne xi tsa̱ꞌa̱n, jí boá xi ni̱ma̱ kixiaan nga tsíchji̱a̱joo, kó kiniꞌíndayéní.

³ Ji Ne, jí boá xi kaꞌnaxiéni ki̱a̱ kjo̱a̱bo̱yaa̱, kó kjiꞌanga je ko̱ya án katsaki, kiniꞌínkꞌijñí nginíní.

⁴ Jún xi xota̱ tsjiee̱ Néná, ndàjnúu̱ salmo̱ Néná, kó te̱ꞌéjnúu̱ ndokꞌóchji̱ì kjo̱a̱a̱ kjo̱a̱tsjie xi tjiín.

⁵ Ngatꞌa̱ ta̱ ngotjón tsí bo̱a̱ nga tsꞌénxchán, ta̱nga ngatsjéni̱xtjin nga nda xota̱ ma. Xchaꞌára̱ nga ni̱xtji̱e̱e̱n, ta̱nga nga kamángindyiojoón jè tsjá kꞌuiéna.

⁶ Kjiꞌanga nda kisꞌijña an, bi̱ tsꞌén katsꞌenkjó án: Jmíni̱xtjin nga tjín xí sa̱ꞌíntíyána.

⁷ Ngatꞌa̱ ta̱ngatꞌanii̱ kjo̱a̱ndàa̱ ji Ne, nga ꞌniú ikꞌíjñíní xikoó ngo na̱xi̱ xi ꞌniú tikón. Kjiꞌanga ngiti̱ kiniꞌínsénjínní, achichí katsakjon an.

⁸ Kósꞌe̱ ji tsíchji̱a̱a̱, ji Ne, kó achichí ni̱ma̱ kixian an, nga bi̱ kixiaan:

⁹ Mí ni xi si̱ꞌin ji tsi ko̱yà án, kjiꞌanga si̱ꞌankjatjajenna ki̱a̱ ngi̱ya nga̱tsjo̱ó, a sa̱ꞌíntsjaári chojoo̱, kó a ku̱i̱chji̱a̱ kjo̱a̱a̱ kjo̱a̱kixi̱i̱.

¹⁰ Ji Ne, ¡ndaꞌyéní, kó ngatamani̱ma̱a̱ an! ¡Ji Ne, jí boá xi tasíke̱jechiíní!

¹¹ Jí boá xi akasíkje ji kjo̱a̱ndasenna, kó kjo̱a̱chá kiniꞌín ji. Kachjeꞌéxín ji ńjño xa̱ꞌya̱ xi yajà an, sꞌe̱ ńjño xi chajá nga ma sꞌué kiniꞌínkajéní,

¹² tsi̱ꞌe̱ nga najén án si̱eé salmo̱, kó nga jmíni̱xtjin nga xió kꞌuijñá ngase. Ji Ne tsa̱ꞌa̱n, ngatsjéni̱xtjin nga ji xi sa̱ꞌintsjaá.