Xo̱jo̱n Salmoo̱ 28 - Xo̱jo̱n eén Néná

Ji Ne, jí boá xi ngaꞌniuú xota̱ na̱xi̱ńdáa̱

Só xi katsꞌénda Ndabii̱.

¹ Ji Ne, jí boá xi tsꞌénchji̱a̱a̱, ji xi xikoó ngo ndi̱jo̱je ji, ngata̱ xiójín mindyin ji, nga kuichjiaá, ngatꞌa̱ tsita̱ ngiti̱ si̱ꞌinsénjínní, kósꞌe̱ bo̱a̱ kon ka̱ma an xikoó xota̱ xi je jesoón.

² Ndaꞌyéní kjiꞌanga ni̱ma̱ xián án nga kuichjiaá, ko̱jo kjiꞌanga skjininkꞌa an ndsa̱ án ki̱a̱ xtji̱e̱e̱n nínga tikón ndiꞌandikón tsjièe̱.

³ Ngata̱ ki̱a̱jín nijan chjaféní ngi̱jii̱n xota̱ xi ꞌniú ndajiín, kui xi ni xi ꞌniú ndajín ndyi̱tsꞌe̱én, ngatꞌa̱ kui xotaa̱, kjo̱a̱a̱ kjo̱a̱xioó ndyi̱chji̱a̱jo xota̱ xi xkjín, ta̱nga ngi̱jin ini̱ma̱a̱ je tikoón ni xi ndajiín.

⁴ ¡Bo̱a̱ tsꞌén tꞌíchjíi̱ xikó katsꞌén, ko̱jo xikó kjiꞌi ni xi ndajín xi ndyi̱tsꞌèn! ¡Bo̱a̱ tsꞌén te̱ꞌéchjíi̱ kjo̱a̱a̱ xikó kjiꞌi ni xi katsꞌén tsja! ¡Te̱ꞌée̱ xikó tsꞌén tsoboaá!

⁵ Kó kjo̱a̱a̱ nga tsaꞌaxki̱jín ni xi je katsꞌén Néná, ko̱jo ngayeje ni xi katsꞌénda, Néná boá xi sa̱ꞌínkjié, kó ngiti̱ sa̱ꞌínkjastjíe̱njín ngase.

⁶ ¡Ngatamachikonñé Néná, ngatꞌa̱ tsintꞌié nga ni̱ma̱ kixian an nga tsíchji̱a̱a̱!

⁷ Néná boá xi ngaꞌniúna, kó kuí boá xi tsꞌénkónna, xikoó ngo ni xi ꞌbíchjaá ni xi ndajín. Kuí boá xi kamáꞌniátakón ini̱ma̱na, kó kuí boá xi asíko̱jona. Kuíni nga achichí tsjá maá ini̱ma̱na, kó tsꞌéntsjaà, nga siee sóna.

⁸ Néná boá xi ngaꞌniuú xota̱ na̱xi̱ńdaá, kó kuí boá xi ngi̱ndie xi ꞌniú, nínga ko̱ꞌna̱xiéꞌá xi jaꞌájin kui.

⁹ ¡ꞌNa̱xiéꞌé ji xota̱ na̱xi̱ńdáa̱, kó ti̱ꞌinchikonñí ji xota̱ xi tse̱! ¡Takée̱ ndi̱yà xikoó ngo nda̱ xi koo̱n cho̱tsa̱nga̱, kó ngatsjéni̱xtjin nga chíi̱n!