Xo̱jo̱n Salmoo̱ 27 - Xo̱jo̱n eén Néná

Jí boá xi tichínní

Só xi katsꞌénda Ndabii̱.

¹ Néná boá ndiꞌí xí tsꞌentsíjenna ko̱jo xi ꞌboxiéꞌána. ꞌYá xí stsakjòo̱n. Néná boá xi tsjangaꞌniúna nga tikón an. ꞌYá xí ku̱i̱ndyiándikónna.

² Kjiꞌanga ítikó yojoo̱ xota̱ xi ndajiín, ko̱jo kondra̱na, tsi̱ꞌe̱ nga sa̱ꞌínkjiéna katsaki, ta̱sá kuí xi kastingí ko̱jo xi ixó.

³ Ndatsi ngo xtín jájún kjo̱a̱ꞌatjiyajonna nga ka̱ma mejeén skjánjo̱na, stsa̱kjonjín ini̱ma̱na, kó ndatsi tjín xí mejeén kjo̱a̱xchán sa̱ꞌínjo̱na, ta̱nga an, jè be an ꞌyání xi ꞌniáko̱n an.

⁴ Ta̱ ngo tsí ni xi je tsíꞌáa̱ Néná, kó kuí boá ni xi kongase an: Nga ki̱a̱ kotíjña̱ an ndiꞌaa̱ Néná ngayeje ni̱xtjin nga kotíjña̱ an nga̱sondie, tsi̱ꞌe̱ nga skuie an kjo̱a̱tsjakjiꞌii̱ Néná, ko̱jo nga ki̱a̱ sa̱ꞌinkjó án ki̱a̱ na̱ngo̱xi̱i̱.

⁵ Ngatꞌa̱ kjiꞌanga kji̱ndi̱bá ni̱xtjin xi ndajiín, kuí boá xi skónna ki̱a̱ ngi̱ndie ꞌniú nínga tikón, kó ki̱a̱ ku̱i̱ꞌíjñaꞌmana nínga tikón ndiꞌandikoón. Ki̱a̱ nkꞌaa̱ ngo ndi̱jo̱je ku̱i̱ꞌíjñasónna.

⁶ Sꞌe̱ skjinínkꞌá tokó án, nga an xi katsꞌée̱n kondra̱na, kó ki̱a̱ ndiꞌandikoón sa̱ꞌinkꞌasꞌièe̱n kjo̱a̱tjó nga tsjakꞌuiéna, kó siee só, jo̱o̱n, sièe̱ só Néná.

⁷ Ji Ne, ndaꞌyéní kjiꞌanga ji xi kuichjiaá, ngatamani̱ma̱a̱ an, kó ti̱ꞌinsénní.

⁸ Ngo ni tsꞌénchji̱a̱ ini̱ma̱na xi bi̱ tsó kjo̱a̱a̱ ji: «¡Ti̱ndyi̱sé ji Néná!» Kuíni nga an, ji boá kongasee, Ne tsa̱ꞌa̱n.

⁹ Ngata̱ mindyinꞌmíjínní, ti̱nde ngata̱ niꞌínxchínjín ji nga si̱ꞌinchꞌi ji kui mosoo̱ xi̱ꞌbi̱. ¡Jí boá xi tibosíke̱jení, ngata̱ ꞌbíjñísoboéjínní! ¡Ji Ne xi ꞌboxiéꞌána!

¹⁰ Ndatsi ku̱i̱ꞌíjñámasienna xi xchána, ta̱nga Néná boá xi ndí xí tsi̱ꞌe̱ sa̱ꞌínna.

¹¹ Ji Ne, takoyèní ndi̱yàa̱, kó ngo ndi̱yà xí kixi̱ tꞌenje̱ní, ta̱ngatꞌanii̱ kui kondra̱ xi ndyi̱kondaꞌmana.

¹² Ngata̱ boeꞌéndièjín ji nga kondra̱na ta̱ ni xi mejénrií sa̱ꞌínjo̱na. Ngatꞌa̱ chistiko̱ ndiso ko̱jo xota̱ xi tsꞌén ni xi ndajiín je jatjokjà kondra̱ tsa̱ꞌa̱n.

¹³ ¡Ta̱nga sꞌijinna nga skuie an kjo̱a̱ndaa̱ Néná ki̱a̱ ngi̱jii̱n xota̱ xi síndo ngasee̱!

¹⁴ Kuíni nga chiyékjo̱e̱e̱ Néná. «¡Ti̱ꞌingaꞌní jí, kó te̱ꞌéngaꞌníi̱ ini̱ma̱a̱! ¡Jo̱o̱n, chiyékjo̱e̱e̱ Néná!»