Xo̱jo̱n Salmoo̱ 24 - Xo̱jo̱n eén Néná

Ree̱ ngayeje nga̱sondiee̱

Só xi katsꞌénda Ndabii̱.

¹ Néná boá xi tsi̱ꞌe̱ tꞌanangii̱, ko̱jo ngayeje ni xi tjiín, ko̱jo ti̱ kuí tsi̱ꞌe̱ nga̱sondiee̱ ko̱jo ngayeje xota̱ xi ki̱a̱ síndoo̱.

² Ngatꞌa̱ kuí boá xi katsꞌénda tꞌanangii̱ ki̱a̱ nga̱són ndáfoaa̱ ndáchíkoón, kó ti̱ ꞌniú íjñá ki̱a̱ nga̱són ndáfoa xi tsꞌénmongaa̱.

³ Kó, ꞌyání xi ka̱maa̱ ko̱e̱je̱ tji̱ngi̱ nínga tikón Néná. Kó, ꞌyání xi ka̱maa̱ nga ki̱a̱ kꞌuijñá ngi̱ndie tsjiee̱ Néná.

⁴ Ta̱kuítsí xota̱ xi tsjie tsjaa̱, ko̱jo xi tsjie ini̱ma̱a̱, kui xi jmíjéjiín, ko̱jo kui xi jmí tsi ta̱xkiya ndyi̱tsꞌéndíkón ni xi jmí ni chjíjiín, ti̱nde índisojín nga sa̱ꞌínkjatjosón ngo ni.

⁵ Kuí bí kui xotaa̱ xi sa̱ko̱ó kjo̱a̱niꞌánchikonñeé Néná, kó ti̱ kꞌuieé kjo̱a̱kixi̱i̱ kui Néná xí tsꞌaxiéꞌaá.

⁶ Bo̱a̱ kjiꞌi ni xi maa̱ ngayeje tji̱e̱e̱ xota̱ xi kui ndyi̱mongase. Kui xota̱ xi mongase kje̱n ji, ji Nee̱ Jakoo̱b.

⁷ «¡Chjáxꞌájnú yojojnú jún nga̱ntjo̱a̱a̱ na̱xi̱ńdáꞌniú! ¡Chjanínkꞌájnú yojojnú jún nga̱ntjo̱a̱ xi síndo ngatsjéni̱xtjin! ¡Ngatꞌa̱ jè kꞌo̱sꞌien Re xi tsi̱ꞌe̱ ngayeje kjo̱a̱jee̱!»

⁸ «Kó ꞌyání bo̱a̱ kui Re xi tsi̱ꞌe̱ ngayeje kjo̱a̱jee̱.» «¡Néná boá, kui xi tjiín ngaꞌniuú, ko̱jo xi tsakjónjín maá! ¡Néná boá, kui xi tjiín ngaꞌniú nga kjaán!»

⁹ «¡Chjáxꞌájnú yojojnú jún nga̱ntjo̱a̱a̱ na̱xi̱ńdáꞌniú! ¡Chjanínkꞌájnú yojojnú jún nga̱ntjo̱a̱ xi síndo ngatsjéni̱xtjin! ¡Ngatꞌa̱ jè kꞌo̱sꞌien Re xi tsi̱ꞌe̱ ngayeje kjo̱a̱jee̱!»

¹⁰ «Kó ꞌyání bo̱a̱ kui Re xi tsi̱ꞌe̱ ngayeje kjo̱a̱jee̱.» ¡Néná xí tsi̱ꞌe̱ jájuún boá! ¡Kui Re xi tsi̱ꞌe̱ ngayeje kjo̱a̱jee̱!»