Xo̱jo̱n Salmoo̱ 22 - Xo̱jo̱n eén Néná

Só xi ndaa̱ Néná kjiꞌanga tjibítjatió kjo̱a̱ni̱ma̱

Só xi katsꞌénda Ndabii̱.

¹ Ji Ne tsa̱ꞌa̱n, ji Ne tsa̱ꞌa̱n, míkjo̱a̱a̱ nga ikꞌíjñímasinní. ¡Míkjo̱a̱a̱ nga kjin tindyinní, kó ndibéjín ji tsi̱ꞌe̱ nga ko̱ꞌna̱xiéꞌéní, ko̱jo nga ndaꞌyéjín ji nga tsꞌénchji̱a̱a̱, nga ni̱ma̱ tꞌíxiaán!

² Ji Ne tsa̱ꞌa̱n, nga ni̱xtjii̱n tsꞌénchji̱a̱a̱ nga ni̱ma̱ tꞌíxiaán, kó niꞌínsénjínní, tsꞌénchji̱a̱a̱ nga ni̱xtji̱e̱e̱n, kó nde jmí kjo̱a̱xiójínna.

³ Ta̱nga ngototo ji xi tsjie ji, ¡ji xi ki̱a̱ tindyin ji nínga ndyi̱tsꞌèntsjaà xota̱ Israee̱l!

⁴ Jí boá xi kamáꞌniátakoón xota̱ xi xchájne̱, kamáꞌniátakoón, kó kiniꞌíndé jí.

⁵ Ni̱ma̱ katsó nga tsíchji̱a̱a̱ ji, kó kiniꞌíndé jí, kamáꞌniátakoón, kó jmí kjo̱a̱soboá katseꞌéjìi̱n.

⁶ Ta̱nga an, xikónií tsi ngo chi̱ndo an, kó jmí tsi xota̱ an. Kjo̱a̱mojnóchaá xotaa̱ boá an, kó ngayeje xota̱ na̱xi̱ńdaá chꞌoo̱ an.

⁷ Ngayeje xota̱ xi kotsijenna, mojnókiena, tsꞌéntíyà maá tsꞌoa ko̱jo to̱ko̱ nga bi̱ tsó:

⁸ Néná boá xi kamáꞌniátakón kui xi̱ꞌbi̱, ¡ja̱ Néná ngatsꞌéndé, ja̱ Néná ngatꞌaxiéꞌá ꞌne̱! ¡Ngatꞌa̱ kuí boá xi katsjaá kjo̱a̱tsja!»

⁹ Ngatꞌa̱ jí boá xi kiniꞌíntsenní, jí boá xi katseꞌéní kjo̱a̱ꞌniátakón ndeskande nga tikón an nga̱són tjiaa̱ na̱anna.

¹⁰ Jí boá xi kiniꞌánkꞌasꞌienna ji, ndeskande nga tjiyá an ngi̱ya ndo̱bo̱a̱ndií na̱anna. Jí boá xi Néna ji.

¹¹ ¡Ngata̱ niꞌínkjinjínní yojòo̱! Ngatꞌa̱ ni xi ndajiín je tikón tiña, kó nde jmíjín xi bosikójona.

¹² Kondra̱na je jaꞌatjiyajonna, xikó maá kjín cho̱yojo toro̱ tamá xi chji̱a̱ni nangi Basaa̱n.

¹³ Xikó maá xandi̱je̱ xi tamá, xi kjíxꞌá tsꞌoa nga mejeén skji̱ni̱e̱na.

¹⁴ Xikó má maá ndáfoaa̱ nga tjon, bo̱a̱ má kjimana, ngayeje ńdana je jatjokjo, ini̱ma̱na je kjimańdá ngi̱ya jàn xikó maá ngo sién.

¹⁵ Jè ngiti̱ jmí ngaꞌniújínna, jè xikoó tsi kixíyà an, kó najén án je kisitꞌaꞌniú ńdaa̱ ndso̱ꞌba án. ¡Jè ki̱a̱ akjajñíní tꞌanangii̱, tsi̱ꞌe̱ nga ko̱ya án!

¹⁶ Ngo xtín xota̱ xi ndajín, xi xikó maá ńñá tamá, je jaꞌatjiyajonna, kó je ndyi̱kjiniejon ndsa̱ko án, ko̱jo ndsa̱ án,

¹⁷ ¡ngaskande je má má ꞌbixki̱ an ńdana! Tji̱e̱nga nga kondra̱na ndyi̱kotsijenna, kó ndyi̱kondana,

¹⁸ Katsꞌénkjaꞌasoón xkjín ńjñona, kó nga̱soón ńjñona katsaton kjo̱a̱chꞌáṉcha̱.

¹⁹ Ta̱nga ji Ne, ngata̱ niꞌínkjinjínní yojòo̱, ngatꞌa̱ jí boá xi ngaꞌniúna ji, ¡tsá ndibékasíke̱jení!

²⁰ ¡ꞌNa̱xiéꞌéní, kó ngata̱ boeꞌéndièjín ji nga ki̱a̱ si̱ꞌankꞌienna ki̱a̱ ngi̱ya tsja kui xota̱ xi ja̱kon ńñá má koón!

²¹ ¡ꞌNa̱xiéꞌéní ngi̱ya tsꞌoa kui xandi̱je̱ xi mejeén skji̱ni̱e̱na ko̱jo kui cho̱yojo toro̱ tamá xí mejeén sa̱ꞌínꞌónna! ¡Jè tiniꞌínsénní!

²² Kꞌuini̱jmìi̱ ntsꞌié án kjo̱a̱a̱ ji, kó sa̱ꞌintsjaá ji ngi̱jii̱n xota̱ xi matikó nga tsꞌéntsjaà.

²³ ¡Jún xi yandikónjnú Néná, ti̱ꞌantsjàjnúu̱ kui! ¡Jún xi xota̱ tji̱e̱e̱ Jakoo̱b, te̱ꞌéjnúu̱ kjo̱a̱je! Kó cha̱ndikónjnú jún, ngayeje xi xota̱ tji̱e̱e̱ Israee̱l.

²⁴ Ngatꞌa̱ jmí tsi katsꞌénchꞌó xota̱ xi jaꞌatio kjo̱a̱ndasee̱n, ti̱nde jmí tsi kisꞌijñaꞌmaa̱, ta̱sá katsꞌénseén kjiꞌanga ni̱ma̱ katsó nga tsíchji̱a̱a̱.

²⁵ Jí boá xi tsꞌenkjoó kjiꞌanga tsꞌéntsjaà ki̱a̱ ngi̱jii̱n xota̱ xi matikoó. Sa̱ꞌinkjatjosón an ni xi indajoo̱ ji ngindyi̱ko̱n xota̱ na̱xi̱ńdá xí bendikoón.

²⁶ Xota̱ ni̱ma̱a̱ skji̱ni̱e̱ ko̱jo kꞌuí, kó stsi̱e̱ cha̱n cha̱a̱n, kó xota̱ xi mongase Néná, ngatsꞌèntsjaà. ¡Ngatsjéni̱xtjin ngatꞌíjñá ini̱ma̱jnú!

²⁷ Ngayeje xota̱ xí tjín nga̱sondiee̱ kjo̱a̱ꞌátsjiee̱n Néná, kó kui ko̱e̱je̱kon nginií, kó ngayeje xtín xota̱ xi tjín na̱xi̱ńdaá, sa̱ꞌíndikoón nga ko̱siéntikoó.

²⁸ Ngatꞌa̱ Néná boá xi botixómá, kó kuí boá xi ko̱tíxomaa̱ ngayeje xota̱ na̱xi̱ńdaá.

²⁹ Xota̱ xi iskjinie nichinie ko̱jo xi kamáyiꞌi kui nga̱sondiee̱, ko̱siéntikoó ngindyi̱ko̱n Néná. Xota̱ xi je jesoón, ti̱ ko̱siéntikoó ndatsa kui nga, ko̱jo xota̱ xi je mején ma kjiesoón nga.

³⁰ Ngo xtín xota̱ tji̱e̱ xi je katjoꞌójin sa̱ꞌínseén, kó kui nii̱ xi kꞌuiníjmì ngi̱jii̱n ngaskande xota̱ tji̱e̱ xi jaskan kꞌuieé.

³¹ Kji̱ndi̱bá, kó ka̱tso̱yà kjo̱a̱kixi̱ xi katsꞌén, kó kui xota̱ na̱xi̱ńdá xí kji̱e̱ tsenjiín, kꞌuiyaá nga kuí boá xi katsꞌén kui nii̱.