Xo̱jo̱n Salmoo̱ 21 - Xo̱jo̱n eén Néná

Néná asíko̱jo nga katsꞌén ree̱

Só xi katsꞌénda Ndabii̱.

¹ Ji Ne, nda̱ ree̱ achichí tsjátjiín kjo̱a̱a̱ ngaꞌniú xí tjiín ji, kó kjo̱a̱a̱ kjo̱a̱ꞌnaxiéꞌáa̱, ¡achichí tsjá maá!

² Jí boá xi katseꞌée̱ ni xi ꞌniú kamámejeén ini̱ma̱a̱, kó katseꞌée̱ ni xi tsíꞌaá nga tsíchji̱a̱a̱.

³ Kꞌinchjeꞌéyindiye jí nga katseꞌée̱ kjo̱a̱niꞌánchikonñé xi je kachjeꞌéjin ji, kó ngo korona̱ to̱nsinié xi nda ikꞌíꞌé ji to̱ko̱.

⁴ Ji tsíꞌaá nga kꞌuijñá nga̱sondie, kó jo̱ꞌo kasée̱, sꞌe̱ achichí kjín nó katseꞌée̱ nga kisꞌijña, ngatsjéni̱xtjin ko̱jo ta̱kjiꞌání.

⁵ Achichí kjo̱a̱je tjiín kjo̱a̱ꞌnaxiéꞌáa̱, Jí boá xi katseꞌée̱ kjo̱a̱yandikón ko̱jo kjo̱a̱je.

⁶ Ngatsjéni̱xtjin nga niꞌínchikonñí ji, kó sꞌikitsie maá kjo̱a̱tsja, nga ki̱a̱ tindyinjìi̱n.

⁷ Tsi kui nda̱ ree̱ xi ji kjimaꞌniátakoón ji Ne, ta̱ngatꞌanii̱ kjo̱a̱ni̱ma̱takóo̱n nga ꞌniú kꞌuijñáni.

⁸ Ndse̱ boá xi sa̱ꞌínkjié ngayeje kondra̱a̱, ndse̱ kixi̱ boá xi sa̱ꞌínkjié ngayeje xi chꞌoo̱ ji.

⁹ Ngo orjno̱ xi tjítíngá má si̱ꞌin ji, kjiꞌanga kjo̱chó ni̱xtjin nga si̱ꞌinxchín jí. Néná sa̱ꞌínkjié kjiꞌanga sa̱ꞌínxchán, kó ndiꞌí ku̱i̱ꞌítíni.

¹⁰ Si̱ꞌinkjieni ji kui nga̱sondiee̱ ngayeje ndií, ko̱jo xota̱ tji̱e̱e̱ si̱ꞌinkjieni ji ngi̱jii̱n ngayeje xotaa̱.

¹¹ Ngatꞌa̱ katsꞌénkjó ni xi ndajín kondra̱ tse̱, kamámejeén índa nga ndajín sa̱ꞌínjoo̱, ta̱nga kjo̱tjosónjín ni xi mejeén sa̱ꞌín.

¹² Ngatꞌa̱ jí boá xi ku̱i̱yítji̱ngíi̱ kjiꞌanga sku̱i̱e̱ yáchjonyáa̱, ko̱jo kjiꞌanga kjuinjìn ji kje̱n.

¹³ ¡Take ji ngaꞌniú jèe̱ ji Ne, kó ko̱ndájne̱ só ko̱jo si̱ꞌantsjajne̱ ji kjo̱a̱a̱ ngaꞌniú xí tjiín!