Xo̱jo̱n Salmoo̱ 20 - Xo̱jo̱n eén Néná

Néná bosikójo ree̱

Só xi katsꞌénda Ndabii̱.

¹ Néná ngatsꞌénseén jí kjiꞌanga ndajínkjiꞌi ni xi ka̱maa̱. Nee̱ Jakoo̱b ngatꞌaxiéꞌaá.

² Ngatsangiyaa̱ kjo̱a̱bosíko̱joo̱ ndeskande na̱ngo̱xi̱ ndikoón, kó ndeskande na̱xi̱ńdáꞌniú Sioo̱n ngatsjangáꞌniuú.

³ Néná ngatjaꞌátsjiee̱n ngayeje kjo̱a̱tjó xi tiboeꞌé ji, kó tsjangatamaa̱ nga skjíbé cho̱ xi nganda tsi̱ꞌe̱ ꞌbítí ji.

⁴ Ngatsjaá ni xi ngayeje ini̱ma̱a̱ nga tichjiéꞌée̱, kó ngatsꞌénkjátjosón ngayeje ni xi mejeén si̱ꞌin ji.

⁵ ¡Achichí ꞌniú tsjá ka̱majne̱ kjiꞌanga kꞌo̱xiéꞌaá, kó chjanínkꞌájne̱ bandera̱jne̱ nga si̱ꞌantsjajne̱ Néná! ¡Néná ngatsjaá ngayeje ni xi chji̱e̱ꞌèe̱!

⁶ Ngotꞌe̱ ꞌne̱ nga be an nga Néná ꞌboxiéꞌá kui xi je jaꞌájin kui, kó ndeskande nínga síndo nkꞌajmii̱ sa̱ꞌínseén, nga sa̱ꞌínkjién ngaꞌniuú tjia kixi̱i̱ kui xi ꞌboxiéꞌáná.

⁷ Tjín xí karro̱ xi fíjo̱ kjo̱a̱xchán kjimaꞌniátakón, kó kje̱ꞌe xí ndi̱je̱e̱ kjimaꞌniátakón, ta̱nga ji̱n, jaꞌeén Néná boá xí kjimaꞌniátakónjne̱.

⁸ Kui xotaa̱ ndyi̱tsꞌènxkꞌién, kó kjiꞌbixó, ta̱nga ji̱n ndyi̱bistjíe̱n nginíjne̱, kó ꞌniú tindyionjne̱.

⁹ ¡ꞌNa̱xiéꞌéjne̱, ji Ne! ¡Ree̱ ngatsꞌénsénná kjiꞌanga ko̱ndókjo̱a̱a̱!