Xo̱jo̱n Salmoo̱ 2 - Xo̱jo̱n eén Néná

Néná ko̱jo ree̱

¹ Ánní nga kjo̱a̱xti ndyi̱ꞌboxié kon xota̱ na̱xi̱ńdaá. Míkjo̱a̱a̱ nga ni xi jmí ni chjíjiín xi ndyi̱tsꞌènkjó kón.

² Kjo̱stjíe̱n re xi tjín ngayeje nga̱sondiee̱, kó nijan ku̱i̱ꞌínda xtín ko̱jo xota̱ xi botixómaá, kótsꞌèn nga skjánjo̱ Néná ko̱jo kui xi jaꞌájin kui, nga bi̱ ndyi̱tsó:

³ ¡Xchjátindsó ńꞌniúki̱cha̱ xi tjitáꞌniúnií ñá! ¡Si̱ꞌandé yojoná kjo̱a̱a̱ kui ńꞌniú xí tjitáꞌniúnií ñá!

⁴ Ta̱nga Néná kui xi botixómá ki̱a̱ ndiꞌakꞌajmii̱ mojnó, kó mojnókie kui xotaa̱.

⁵ Jaskan tsꞌénxchán, kó ꞌniú chji̱a̱jo, ꞌniú tsꞌénxchán, kó mindyiandíkoón.

⁶ Kó bi̱ tsó Néná nga mindyiandíkoón: «Án má xi je jaꞌajin an ngo re xi ko̱tíxoma ki̱a̱ tji̱ngi̱ Sioo̱n, kui xi na̱xi̱ ndikónna».

⁷ Án boá xi xiyà an kjo̱a̱botíxoma xi Néná katsóyàna, nga bi̱ katsóna: «Jí boá xi ndína ma ji, ndeskande koó ngotꞌe̱ ꞌne̱ nga na̱ꞌmíi̱ ma an.

⁸ ¡Chji̱e̱ꞌéní, kó an tsjaa nga tse̱ ka̱ma ngayeje na̱xi̱ńdaá, ko̱jo nga ti̱ tse̱ ka̱ma ngaskande nínga fetꞌanii̱ nga̱sondiee̱!

⁹ Tajá tsꞌén ko̱ti̱xomée̱ xota̱ na̱xi̱ńdaá nga si̱ꞌinkjìn jí ndse̱ xikoó tsi ki̱cha̱, ¡ko̱jo nga si̱ꞌinxi̱ ji xikó maá tsi ngo ti̱jì!»

¹⁰ Kó kuíni nga jún xi rejnú, nda ti̱ꞌánjnú nga si̱ꞌankjiénjnú kjo̱a̱kjínkónjnú. Kó jún xi niꞌánjéjnú, te̱ꞌéndièjnú nga tjín xí sa̱ꞌínchji̱ni̱e̱jnú.

¹¹ Ndikóntsꞌèn ti̱ꞌánjnú xaá Néná, kó tsja ngatamajnú nga xcha̱ndikónjnú kuí.

¹² ¡Ti̱ꞌantsjàjnúu̱ Néná, tatíndsoꞌájnú sé ndií, ngatꞌa̱ tsita̱ sa̱ꞌínxchán, kó sa̱ꞌínkꞌiénjnú ngi̱ya ndi̱ya̱à, ngatꞌa̱ ta̱niján má ꞌniú tsꞌénxchán! ¡Achichíra̱tsjaa̱ ngayeje xota̱ xi kui mongase nga kui xi skoón!