Xo̱jo̱n Salmoo̱ 19 - Xo̱jo̱n eén Néná

Ni xi katsꞌénda Néná ko̱jo eén

Só xi katsꞌénda Ndabii̱.

¹ Nkꞌajmii̱ ꞌbiníjmì kjo̱a̱jee̱ Néná, kó ngi̱jinꞌa̱sie̱èn tsáyà ngayeje ni xi je katsꞌénda.

² Ngo ni̱xtjii̱n tsáyaà én xi ingo ni̱xtjii̱n, kó ngo ni̱xtji̱e̱e̱n bokoó kjo̱a̱kjínkoón xi ingo ni̱xtji̱e̱e̱n.

³ Ndatsi nde chji̱a̱jín, ti̱nde jmí ni tsójín, ti̱nde ngo nda̱ ndaꞌyájiín,

⁴ eén ndaꞌyá ngayeje tꞌanangii̱, kó fochó ngaskande nínga fetꞌanii̱ nga̱sondiee̱. Ki̱a̱ nkꞌajmii̱, Néná katsꞌéndaa̱ ngo ndiꞌa tsꞌueé.

⁵ Kó tsꞌueé fotjoni ndiꞌaa̱ xikó maá ngo nda̱ xi ku̱i̱xan, tsjatjiín xikó maá ngo nda̱ xi xá mongani, xi je tikónnda nga ko̱nga ndi̱yà xí ko̱e̱je̱.

⁶ Ngo ndieè nkꞌajmii̱ fotjoni, kó fí ngaskande xi ingo ndieè nínga ꞌbosꞌienni, kó nde jmíjín xi ka̱maa̱ ko̱ngaa̱ sibeé.

⁷ Ta̱nisién ꞌniú nda kjo̱a̱kitii̱ Néná, kó kuí boá xi tsꞌendáyà ini̱ma̱a̱. ꞌNiú ꞌniátakón kjo̱a̱kitii̱, ngatꞌa̱ kuí boá xi tsjaá kjo̱a̱kjíntakón xota̱ xi nkꞌajín ꞌboxié yojoo̱.

⁸ Kixi̱ boá kjo̱a̱botíxomaa̱ Néná, kó kuí boá xi tsꞌéntsjaà ini̱ma̱a̱. Kui soboá soboá boá kjo̱a̱kitii̱ Néná, kó kuí boá xi tsꞌentsíjee̱n ndyikón.

⁹ Tsjie boá kjo̱a̱yandikoón Néná, kó ngatsjéni̱xtjin nga ꞌniú tikón. Kixi̱ ko̱jo ja̱koxi̱ boá kjo̱a̱botíjé xí tsjá Néná.

¹⁰ ꞌNiú ngase niꞌánmején ta̱bo̱a̱jiín to̱nsinieé, ta̱bo̱a̱jiín kjín to̱nsinié, kó ixi ngase ta̱bo̱a̱jiín ntsjieén, kui tín ntsjién xí fotjoo̱ ndo̱bo̱a̱a̱ cho̱ndo̱ꞌo̱sieèn.

¹¹ Kuí boá kui nii̱ xi niꞌínkjìn nga niꞌínxchínje̱ ji xota̱ xi tsꞌén xáa̱, kó tsi sa̱ꞌínkjatjosón kui kjo̱a̱botíxomaa̱, achichí ni xi nda sakoó.

¹² ꞌYá xí ka̱maa̱ nga ti̱ kuii̱ sku̱i̱e̱ soboá ni xi ndajín xi tsꞌén. ¡Ti̱ꞌinjetakínní ji Ne, kjo̱a̱a̱ kui jé xí bejín an nga tsꞌen an!

¹³ ¡Chje̱ꞌéxínní kjo̱a̱nkꞌakoo̱n nga! ¡Ngata̱ boeꞌéndièjín ji nga kui sa̱ꞌínna! Kósꞌe̱ kjiꞌá boá nga ngiti̱ sa̱ꞌinjéjín an, ko̱jo nga ngiti̱ jmí jé kꞌuiéjínna kjo̱a̱a̱ nga ta̱nisién ndajín katsꞌen an.

¹⁴ ¡Ti̱ꞌinjo̱ꞌo ji nga kjo̱chó ngindyikin ji ni xi chji̱a̱ ndso̱ꞌba án, ko̱jo ni xi tsꞌénkjó ini̱ma̱na! ¡Ji Ne, ji xi ndi̱jo̱ jena! ¡Jí boá xi kaꞌnaxiéꞌéní!