Xo̱jo̱n Salmoo̱ 16 - Xo̱jo̱n eén Néná

Kjo̱a̱bokoyáa̱ boá xi bokóna ndi̱yà

Én xí katsꞌénda Ndabii̱.

¹ Ji Ne, chínní, ngatꞌa̱ jí boá xi mongasee̱ nga xchínní.

² Jè bi̱ kixiáa̱n Néná: «Jí boá xi Ndi̱a̱na ji, jí boá xi katseꞌéní ngayeje ni nda xi tjínna».

³ Xota̱ tsjie ko̱jo xota̱ xi kixi̱ xi síndo nga̱sondiee̱, kuí boá xi tsjána kjo̱a̱tsja.

⁴ Ta̱nga achichí kjo̱a̱ni̱ma̱ kjo̱a̱ꞌatio xota̱ xi ndyi̱fítji̱ngi kje̱ꞌe ne. ¡Jmí ni̱xtjin sa̱ꞌinkꞌasꞌièe̱n kjo̱a̱tjó ni xi nénájín! ¡Jmí ni̱xtjin sa̱ꞌinkaxoma an jaꞌeén!

⁵ Néná boá xi ngayeje ni xi tjínna, kuí boá xi tsie kjo̱a̱niꞌánchikonñé tsjána. Ngi̱ya ndse̱ boá nínga tikón kjo̱a̱mindyionna.

⁶ Achichí tsjachon ngi̱ndie xi kasakona, achichí tsjákjiꞌi kui tꞌanangi xi ji katseꞌéní.

⁷ Nda kuichjiá an kjo̱a̱a̱ Néná, kjo̱a̱a̱ kui kjo̱a̱botíxoma nda xi tsjána, ngatꞌa̱ ndatsi je jñó tsꞌendáyà ngi̱jin yojona.

⁸ Ngatsjéni̱xtjin nga Néná boá xi tjínjinkon an, ngatꞌa̱ ki̱a̱ tikóntꞌana tjia kixi̱na, kuíni nga jmíjín ni xi kꞌo̱jmina.

⁹ Kuíni nga achichí tsjá kamaá ini̱ma̱na, kó tsja maa ndso̱ꞌba án nga tsjaá kjo̱a̱je Néná, kó yojona sa̱ꞌínkjaꞌyá cha̱n cha̱n nga tjiín kjo̱a̱ꞌniátakón,

¹⁰ ngatꞌa̱ ki̱a̱jín kꞌuijñí ji ini̱ma̱na ngi̱ya nga̱tsjo̱ó, ti̱nde ko̱e̱ꞌéndièjín ji nga xota̱ tsjièe̱ sku̱i̱e̱ ni xi jatsoo̱n.

¹¹ Jí boá xi ko̱kéní ndi̱ya̱à kjo̱a̱mindyioo̱n. ¡Kjiꞌanga an tindyinjinní achichí tsjá ꞌbéna! ¡Kjiꞌanga ki̱a̱ tikóntꞌáa̱ nga kixi̱i̱, ngatsjéni̱xtjin nga tjínna kjo̱a̱tsja!