Xo̱jo̱n Salmoo̱ 148 - Xo̱jo̱n eén Néná

Ngayeje xi ngatsꞌèntsjaà Néná

¹ ¡Ti̱ꞌantsjàjnúu̱ Néná ndeskande ki̱a̱ ndiꞌakꞌajmii̱! ¡Ti̱ꞌantsjàjnúu̱ ki̱a̱ nínga nkꞌaa̱!

² ¡Ti̱ꞌantsjàjnúu̱ ngayeje jún xi chji̱ni̱e̱ꞌe̱én kuí jún! ¡Ti̱ꞌantsjàjnúu̱ ngayeje jún xi jájuún kui!

³ ¡Ti̱ꞌantsjàjnúu̱ Néná jún sá ko̱jo tsꞌué! ¡Ti̱ꞌantsjàjnúu̱ Néná jún ngayeje ńño xi ꞌna̱!

⁴ ¡Ti̱ꞌantsjàjnúu̱ Néná jún ngayeje nkꞌajmii̱, kó ti̱ ngatsꞌèntsjaà ko̱jo ndáfoa xi tikón nga̱soón nkꞌajmii̱ nga!

⁵ Ti̱ꞌantsjàjnúu̱ jaꞌeén Néná, ngatꞌa̱ ta̱ ngo tsí kjo̱a̱ katsjá kó kamánda ngayeje ni xi tjiín.

⁶ Néná boá xi ꞌniú íjñá nga kisꞌińdo ngatsjéni̱xtjin ngayeje nii̱, kó jè katsjá ngo kjo̱a̱ xi ka̱májín ko̱síkjo.

⁷ Ti̱ꞌantsjàjnúu̱ Néná ndeskande ki̱a̱ tꞌanangii̱, ngatsꞌèntsjaà ngayeje cho̱ xi tjín ngi̱jin ndáchíkoón nga,

⁸ ko̱jo ndiꞌií, ko̱jo ndókoaá, ko̱jo nchꞌaàn, ko̱jo ṉdi̱xa̱a̱, ngatsꞌèntsjaà tjo̱ꞌniuú nga kui xi ntꞌiéꞌeén kjo̱a̱ xi tsjá.

⁹ Ngatsꞌèntsjaà na̱xi̱i̱ ko̱jo tji̱ngi̱i̱, ko̱jo yá xí tsjá too̱, ko̱jo yákoón nga,

¹⁰ ko̱jo cho̱ tamaá, ko̱jo ngayeje cho̱ tjieé, ko̱jo cho̱ xi ꞌbifé yojoo̱, ko̱jo ni̱sie xi tjiín tsja̱nga̱a̱.

¹¹ Ngatsꞌèntsjaà já re xi tjín kuí tꞌanangii̱, ko̱jo xota̱ na̱xi̱ńdá xí tjín ngayeje nga̱sondiee̱, ko̱jo xota̱xá xí botixómaá, ko̱jo ngayeje nendiꞌamasien xi tjín kuí tꞌanangii̱.

¹² Ngatsꞌèntsjaà já xo̱ngo̱ò, ko̱jo ínchjiín xo̱ngo̱ò, ko̱jo xota̱ xi xchaá, ko̱jo jákjíndií nga.

¹³ ¡Ti̱ꞌantsjàjnúu̱ jaꞌeén Néná, ngatꞌa̱ ta̱kuítsí jaꞌeén xi jmíjín xi kjo̱chótji̱ngi! Kjo̱a̱botíxomaa̱ Néná nkꞌa ngase tikón ta̱bo̱a̱jiín nkꞌajmii̱ ko̱jo tꞌanangii̱.

¹⁴ ¡Néná boá xi katsjaá ngaꞌniú xota̱ na̱xi̱ńdaá! ¡Kuíni nga ngayeje xota̱ tsjiee̱ xi ngatsꞌèntsjaà, kui xi xota̱ Israee̱l, kui xota̱ na̱xi̱ńdá xí ꞌniú tjoó kui! ¡Bo̱a̱ kjiꞌi!