Xo̱jo̱n Salmoo̱ 147 - Xo̱jo̱n eén Néná

Néná boá xi tsoboaá nga si̱ꞌantsjaa̱

¹ ¡Si̱ꞌantsjàa̱ Néná! Nga ja̱koxi̱ achichí tsjákjiꞌi nga ko̱nda̱á só Néná, achichí tsjákjiꞌi ko̱jo kixi̱ kjiꞌi nga ko̱nda̱á só Néná.

² Néná boá xi je katsꞌéndaya nginí na̱xi̱ńdáꞌniú Jerusale̱n. Néná boá xi katsꞌénkjindibaꞌóyá nginí xota̱ Israee̱l kui xi xota̱ Babiloniaa̱ kijíjo̱ꞌniú mára.

³ Néná katsꞌéndaya nínga oo̱n xota̱ xi je ngiti̱ jmí kjo̱a̱chiyá kisꞌiejiín.

⁴ Néná boá xi tsáyà kótjín ńño chjiéngá kꞌuié, kó be kuí kó ꞌmí jaꞌeén nga ngo nga ngo.

⁵ Achichí kjo̱a̱je tjiín Néná, kó achichí ngaꞌniú xí tjiín, ¡jmíni̱xtjin kju̱i̱e̱ kjo̱a̱kjíntakoón!

⁶ Néná tsꞌénkjastjíe̱n xota̱ xi ni̱ma̱kjo̱a̱a̱, ta̱nga ni̱ma̱kjo̱a̱ ꞌbíndo xota̱ xi ꞌniú ndajiín.

⁷ Ko̱ndáa̱ Néná nga si̱ꞌankjién arpaa̱, ko̱ndáa̱ só nga ko̱e̱ꞌée̱ ndokꞌóchji̱ì.

⁸ Néná boá xi ṉdi̱ boꞌmáni nkꞌajmii̱. Néná boá xi tsꞌénkáꞌá stseé nga̱són tꞌanangii̱. Néná boá xi tsꞌénxchá kꞌijñá ki̱a̱ nga̱són na̱xi̱i̱.

⁹ Néná boá xi tsjaá nichinie cho̱ tamaá, ko̱jo ndií ni̱sie kuerboo̱ kjiꞌanga míꞌaá nichinie.

¹⁰ Jmí tsi ngaꞌniuú ndi̱je̱e̱, ko̱jo tsi ngaꞌniuú xota̱ nga̱sondiee̱ xi tsꞌénchjínií Néná,

¹¹ Ni xi tsꞌénchjínií Néná, kuí boá nga xota̱ nga̱sondiee̱ ntꞌiéꞌeén, ko̱jo nga ma maꞌniátakón kjo̱a̱tjoó.

¹² Na̱xi̱ńdá Jerusale̱n, ¡ti̱ꞌintsjée̱ Nèe̱!

¹³ Néná boá xi ꞌniú ꞌbijñá ki̱cha̱ xi ꞌbíchjáni nga̱ntjo̱a̱a̱ na̱xi̱ńdáa̱. Néná boá xi tsꞌénchíkonñé ngayeje xota̱ na̱xi̱ńdáa̱.

¹⁴ Néná boá xi tsꞌéntsjaá nga kꞌuieé kjo̱a̱xió, kó tsie nichinie tsꞌéntsjaá.

¹⁵ Néná boá xi tsjaá ngo kjo̱a̱ tꞌanangii̱, kó ti̱ kjiꞌa fotjosón kjo̱a̱ xi tsjá.

¹⁶ Néná boá xi tsꞌénkixó nga̱són tꞌanangii̱ nchꞌaàn ko̱jo stséxa̱a̱.

¹⁷ Néná boá xi tsꞌénkixó ndókoaá, xikó maá tsi xi̱i̱ ndi̱jo̱. ¡Nchꞌàn xí tsangiya nde ngojín xi chikjoaá!

¹⁸ Ta̱nga Néná tsjá ngo kjo̱a̱, kó ma ńdá nchꞌaàn, ¡kuí boá xi tsꞌén nga botsié tjo̱o̱, kó monga nginí ndáfoaa̱!

¹⁹ Néná boá xi akoó xota̱ Israee̱l kjo̱a̱botíxomaa̱ ko̱jo kjo̱a̱bokoyaá.

²⁰ Nde ingojín kje̱ꞌe na̱xi̱ńdá xí katsjaá eén. ¡Si̱ꞌantsjàa̱ Néná!