Xo̱jo̱n Salmoo̱ 145 - Xo̱jo̱n eén Néná

Achichí kjo̱a̱je tjiín Néná

Ndabii̱ katsꞌénda kui só xi niꞌántsjánii̱ Néná.

^1-2 Ji Ne, ji xi Rena, ¡ngatsjéni̱xtjin nga nda tsꞌén kuichjiá an kjo̱a̱a̱ ji, kó sa̱ꞌintsjaá ta̱ngatꞌanii̱ kjo̱a̱jèe̱!

³ ¡Achichí kjo̱a̱je xi tjiín ji Ne, tsoboaári nga si̱ꞌantsjajne̱! ¡Achichí kjo̱a̱je xi tjiín nga ngaskande nde makjínjínjne̱ kókjiꞌi!

^4-6 Ji̱n boá xi ko̱ndókjo̱a̱jne̱ kjo̱a̱a̱ ngaꞌniúu̱, ko̱jo kjo̱a̱tsjakjiꞌíi̱, ko̱jo kjo̱a̱jèe̱, ko̱jo kjo̱a̱a̱ ni xi fíndikónná xi kiniꞌín ji, achichí sa̱ꞌinkjó án kjo̱a̱a̱ kui nii̱, kó kuí má ndína xi xiyàa̱.

⁷ Ko̱ndókjo̱a̱jne̱ kjo̱a̱a̱ kjo̱a̱nda tsie xi tjiín, kó xchaꞌayàtsjámájne̱ nga kꞌuiyájne̱ nga jí boá ngo Ne xi kixi̱.

^8-9 Ji Ne, achichí tjoó ko̱jo ndaxota̱ niꞌínje̱jne̱ ji̱n, jmí tsi tsá niꞌínxchín jí, kó achichí je kjo̱a̱tjóo̱. Achichí nda niꞌínje̱ ji xi kiniꞌínde ji, kó ni̱ma̱ maa̱.

¹⁰ ¡Ngatsꞌèntsjaà xi kiniꞌínde ji! ¡Nda ngatíchji̱a̱ kjo̱a̱a̱ ji xota̱ na̱xi̱ńdáa̱ xi ji ꞌniátakoón!

^11-12 ¡Nda ngatíchji̱a̱ kjo̱a̱a̱ ngi̱ndie tsjakjiꞌi nínga botíxome ji, kó ngatamabendikón kjo̱a̱tsjakjiꞌíi̱ ko̱jo ngaꞌniúu̱! ¡Ngatíchji̱a̱ kjo̱a̱a̱ ni yiꞌi xi kiniꞌín ji, tsi̱ꞌe̱ nga ngayeje xota̱ nga̱sondiee̱ sku̱i̱e̱!

¹³ Ngatsjéni̱xtjin nga ji xi ko̱ti̱xome ji, ngatꞌa̱ ngatsjéni̱xtjin nga niꞌínkjatjosén ni xi ꞌmíyetjén ji, kó ngayeje nii̱ xi tjótsꞌèn niꞌínde ji.

¹⁴ Ji Ne, jí boá xi chjaninkꞌe ji xota̱ xi je ixoó, kó boeꞌée̱ ngaꞌniú xota̱ xi je jendaa̱.

¹⁵ Jí boá xi ndyi̱kotsijee̱n ngayeje xotaa̱, nga ndyi̱koya nga ji ko̱e̱ꞌée̱ nichinie.

¹⁶ Achichí tsjá maa̱ nga chjéxꞌé jí ndse̱, kó tsie nichinie boeꞌée̱ ngayeje xi síndo nga̱sondiee̱.

¹⁷ Ji Ne, ngatsjéni̱xtjin nga niꞌínkjatjosén ni xi ꞌmíyetjén ji, kó ngayeje nii̱ xi tjótsꞌèn niꞌínde ji.

¹⁸ Ngatsjéni̱xtjin nga tiña tindyintꞌée̱ kui xota̱ xi nga ja̱koxi̱ nga ji ndyi̱chji̱a̱a̱.

¹⁹ Jí boá xi niꞌínsée̱n nga ꞌniú chji̱a̱a̱ kui xota̱ xi bendikoón, kó boeꞌée̱ ni xi chjieén, kó ꞌnaxiéꞌé ji.

²⁰ Ngatsjéni̱xtjin nga tichìi̱n ngayeje xota̱ xi tjoó ji, ta̱nga niꞌínkjié jí xota̱ xi ꞌniú ndajiín.

²¹ ¡Ngatsjéni̱xtjin nga sa̱ꞌíntsjaá ndso̱ꞌba án! ¡Ngayeje xota̱ nga̱sondiee̱ nga nda ku̱i̱chji̱a̱ kjo̱a̱a̱ ji, ngotꞌe̱, ko̱jo ngatsjéni̱xtjin!