Xo̱jo̱n Salmoo̱ 144 - Xo̱jo̱n eén Néná

Néná boá xi tsꞌénkónna

Só xi katsꞌénda Ndabii̱.

¹ ¡Ngatamachikonñé ji Ne, ji xi Néna, ko̱jo ji xi tichínní! ¡Jí boá xi bokoyéní kótsꞌèn bixkán ko̱jo kótsꞌèn kꞌoxiéꞌá an yojona!

² ¡Jí boá xi niꞌíntjéní ko̱jo xi chínní! Jí boá xi xikoó tsi ngo ngi̱ndie nínga ma botíjña̱ ꞌma an, tichínní xikoó ngo ni xi ꞌbíchjaá ni xi ndajín, ¡ngo Ne xi katsjandièna nga an kotixomáa̱ xota̱ na̱xi̱ńdána!

³ Ji Ne, ꞌyání bo̱a̱ ji̱n tsi̱ꞌe̱ nga kjoyéxki̱jne̱. ꞌYání bo̱a̱ xota̱ nga̱sondiee̱ tsi̱ꞌe̱ nga si̱ꞌinsenjne̱.

⁴ Bo̱a̱ má kónjne̱ xikoó ngo ni xi niꞌánkjiín takón, ¡achichí tsá chajajne̱ xikoó ngo tji̱nkꞌi̱én!

⁵ Ji Ne, ndibéjéyé ji kꞌi̱e̱ tꞌanangii̱, ti̱ꞌinje̱ ji na̱xi̱i̱ kó ngatjoo̱ ṉdi̱.

⁶ Ti̱ꞌinkjaꞌatꞌe ji, kó ti̱ꞌin ji nga ngatanga kondraa̱.

⁷ ¡Tjinní ndse̱ ndeskande ki̱a̱ nkꞌajmii̱, kó ꞌna̱xiéjinní ngi̱jii̱n ngaꞌniuú kui ndáfoaa̱! ¡Ngata̱ boeꞌéndièjín ji nga ki̱a̱ kꞌo̱ka an ngi̱ya tsja xota̱ xi ꞌniú ndajín xi chji̱a̱ni kje̱ꞌe nangi!

⁸ Kui xotaa̱ ta̱soboá éndísó xí chji̱a̱ kjiꞌanga kjíxꞌá tsꞌoa, kjininkꞌá tsja kixi̱ kó ngiboanéná tsó nga ꞌbindísó.

⁹ Ji Ne, ngo só tja̱tsi̱e̱ siee, siee só, nga kjo̱ni̱e̱ arpaa̱.

¹⁰ Jí boá xi niꞌín ji nga tsꞌén já ree̱, jí boá xi boeꞌéndièjín ji, nga ki̱cha̱ si̱ꞌankꞌienni re Ndabii̱.

¹¹ ¡ꞌNa̱xiéꞌéní ko̱jo an nga! ¡Ngata̱ boeꞌéndièjín ji nga ki̱a̱ kꞌo̱ka an ngi̱ya tsja xota̱ xi ꞌniú ndajín xi chji̱a̱ni kje̱ꞌe nangi! Kui xotaa̱ ta̱soboá éndísó xí chji̱a̱ kjiꞌanga kjíxꞌá tsꞌoa, kjininkꞌá tsja kixi̱ kó ngiboanéná tsó nga ꞌbindísó.

¹² Te̱ꞌéndiè ji nga nda ka̱maxchá xo̱ngò ndíjne̱, ꞌniú ngatama, kó nda ngatꞌíndo, xikó maá xka̱ xi ꞌbé ngo ngi̱ndie nínga ꞌbítji̱e̱ ni. Te̱ꞌéndiè ji nga ndí xi ínchjínjne̱ tsjakon ngatama, xikó maá yáseé ngo ndo̱bo̱a̱xa̱á.

¹³ Ti̱ꞌin ji nga ngi̱ndie nínga chjaꞌátjójne̱ ni xi ma xchájne̱ tsie nichinie ngatꞌié. Ti̱ꞌin ji nga ngatamakjín cho̱tsa̱nga̱jne̱ ki̱a̱ ngi̱jin kꞌijñá nínga síndo, ngaskande nga ngiti̱ ka̱májín kꞌuíxki̱jne̱.

¹⁴ Te̱ꞌéndiè ji nga cho̱yojo xi̱ꞌinjne̱ nga kjifé karreta̱ xi tjikítsie maá nichinie. Ngiti̱ boeꞌéndièjín ji nga ko̱kján nginí xó xí tjíchjáꞌyáni na̱xi̱ńdájne̱, ti̱nde nga ngiti̱ mongínjo̱jínjne̱ kje̱ꞌe na̱xi̱ńdá, ti̱nde nga ngiti̱ ndaꞌyájín ngi̱ya ndi̱yàtiéjne̱ nga tjín xí skja̱ndáyà nga nda̱ kjimaa̱.

¹⁵ ¡Jí boá xi niꞌínchikonñí nangi nínga kjifotjosón ngayeje kui nii̱! ¡Jí boá xi niꞌínchikonñí nangi xi bendikoón nga ji xi Nee̱ ji!