Xo̱jo̱n Salmoo̱ 143 - Xo̱jo̱n eén Néná

Néná boá xi ꞌniáko̱n an

Só xi katsꞌénda Ndabii̱.

¹ Ji Ne, ¡ndaꞌyéní nga kuichjiaá! ¡Ti̱ꞌinsénní nga ꞌniú kuichjiaá! Jí boá ngo Ne xi kixi̱: ¡ti̱ꞌinsénní!

² Ngata̱ niꞌínje̱jínní xki̱ ngindyikin ji, ngatꞌa̱ kui nga̱sondiee̱ jmíjín xi ndaxota̱ kꞌo̱xié yojoo̱.

³ Kondra̱na mejeén sa̱ꞌínkꞌiénna, jè íchjáꞌyána, xikó má niꞌánjo̱ xota̱ xi je jesoón.

⁴ Jè ngiti̱ tsꞌéntíyàjín ini̱ma̱na, ¡jè tjítsꞌénkjié an kjo̱a̱!

⁵ Foaꞌátsjienna ni xi kamá ngasꞌe̱ kó tsꞌénkjó án, ngayeje ni xi kiniꞌín ji, ¡foaꞌátsjien ndá ndána ngayeje ni xi kiniꞌín ji!

⁶ ¡Mejen an ndsa̱ án xtji̱e̱e̱n nínga tindyin ji, ngata̱ achichí chjiénna ji, xikó má tsꞌén chjieén ndáfoaa̱ tꞌanangi kixií!

⁷ Ji Ne, ¡tsá ti̱ꞌinsénní, ngata̱ jè kjiꞌme an! ¡Ngata̱ ꞌbíjñímasínjínní, ngatꞌa̱ xikónií tsi je kꞌien an tsobo̱a̱!

⁸ Jí boá xi ꞌniákoo̱n, ¡jí boá xi tsꞌénchji̱a̱a̱! Ndyiojón ndyiojón takéní nga tjoó an, ¡tꞌíyéní mí xí sa̱ꞌin an!

⁹ Ji Ne, ꞌna̱xiéꞌéní ngi̱ya tsja kondra̱na, ngatꞌa̱ jí xí tsꞌénmongasee̱ nga xchínní.

¹⁰ Jí boá xi Néna ji. ¡Takéní mí ni xi mejeén nga sa̱ꞌin an! ¡Te̱ꞌéndièní nga A̱siénni̱xtjin ndàa̱ ko̱síko̱jona tsi̱ꞌe̱ nga nda sa̱ꞌin an!

^11-12 Ji Ne, jí boá ngo Ne xi kixi̱ ji, ¡ti̱ꞌinkjie ji kondra̱na! ¡Ti̱ꞌinkjie ji xota̱ xi ndyi̱mongatji̱ngina! Jí boá ngo Ne xi tjiín kjo̱a̱tjó, kó xáa̱ boá xi tjítsꞌen an, ¡take ji ngaꞌniú xí tjiín, kó te̱ꞌéndièní nga kotíjña̱ ngase an! ¡Tasíke̱jení kjo̱a̱a̱ kjo̱a̱niꞌin xi tsꞌénfoaꞌatio an!