Xo̱jo̱n Salmoo̱ 141 - Xo̱jo̱n eén Néná

¡Ji Ne, chínní!

Só xi katsꞌénda Ndabii̱.

¹ Ji Ne, án boá xi tsꞌénchji̱a̱a̱: ¡Ti̱ꞌinsénní, kó tsá ndibékasíke̱jení!

² ¡Ngatjachó énna xikoó ngo kjo̱a̱tjó xi sije̱n! ¡Kjininkꞌaá án ndsa̱ án xikoó tsi ngo kjo̱a̱tjó xi niꞌánkꞌasꞌien nga ma ngixoón!

³ Ji Ne, ¡ngata̱ boeꞌéndièjín ji nga ngo ni xi ta̱ chiboa kuichjiá an!

⁴ ¡Ngata̱ boeꞌéndièjín ji nga ni xi ndajín sa̱ꞌinkjó án, ko̱jo tsi ni xi ndajín sa̱ꞌin an! ¡Ngata̱ boeꞌéndièjín ji nga ki̱a̱ nijan kotíjña̱jìi̱n sꞌué xí ndyi̱tsꞌèn xota̱ xi ꞌniú ndajiín!

⁵ Ndakjíꞌí nga sa̱ꞌínxchánjo̱na ko̱jo tsi ku̱i̱ꞌéna ngo xota̱ xi kixi̱, xikó maá tsi ndásíje̱n xi nda ka̱mana nga ꞌniú ku̱i̱chji̱a̱jona. Ji Ne, ngatsjéni̱xtjin tsꞌénmíꞌaá nga ko̱ti̱jée̱ xota̱ xi ꞌniú ndajiín.

⁶ Ngije kiniꞌánkjié xota̱xá xí botixómá xi ꞌniú ndajiín, kjo̱a̱ꞌátsjiee̱n ni xi kixiáa̱n, kó sku̱i̱e̱ nga tsjatsꞌèn tsíchji̱a̱jo an.

⁷ Kósꞌe̱ bi̱ ka̱tso̱ xotaa̱: «Ńdaa̱ jè ki̱a̱ kisꞌiyojo tꞌanangii̱».

⁸ Kó xi tji̱e̱nga an ki, ji Ne, ta̱ngatꞌanií ji nga tikón an, kó jí boá xi mongasee̱ nga xchínní. ¡Ngata̱ boeꞌéndièjín ji nga si̱ꞌankꞌienna!

⁹ ¡Xín ti̱ꞌinkjeꞌéní kui chja̱ya̱ xi ndyi̱ꞌbíndona kui xota̱ xi ꞌniú ndajiín!

¹⁰ ¡Ti̱ꞌin ji nga ti̱ kuii̱ ku̱i̱xo̱ya kui chja̱ya̱ xi ndyi̱ꞌbíndo! Ta̱nga an ki, ¡ꞌna̱xiéꞌéní, kó tꞌíjñitꞌaxínní!