Xo̱jo̱n Salmoo̱ 140 - Xo̱jo̱n eén Néná

Néná tsꞌénkónna

Só xi katsꞌénda Ndabii̱.

¹ Ji Ne, ¡ꞌna̱xiéꞌéní ngi̱jii̱n xota̱ xi ꞌniú ndajiín! ¡Chínní ngi̱jii̱n xota̱ xi ndajiín,

² kui xi ta̱soboá ni xi ndajín xí mejeén sa̱ꞌín, kó ngatsjéni̱xtjin nga kjo̱a̱xti ndyi̱mongase!

³ Jmí tsi ja̱kon xota̱ kon, ja̱kon ye̱ kón, chji̱a̱, kó eén tsꞌénꞌónná, xikoó tsi xaán ye̱ tjiín.

⁴ Ji Ne, ꞌna̱xiéꞌéní ngi̱jii̱n kui xota̱ xi ꞌniú ndajiín, chínní ngi̱jii̱n kui xota̱ xi ndajiín, kui xi ta̱ mején tsií nga ndajín ka̱ma ni xi sa̱ꞌin an.

⁵ Xota̱ xi nkꞌakon boá. Ki̱a̱ nínga jaꞌa an índo chja̱ya̱, tsi̱ꞌe̱ nga ki̱a̱ kꞌo̱kayà an katsaki.

⁶ Ta̱nga be án nga jí boá xi Ne ngototona, ¡ngo kjo̱a̱nda míꞌaá, ndaꞌyéchiíní nga ꞌniú kuichjiaá!

⁷ Jí boá xi Néna ji, jí boá Ne xi tjiín ngaꞌniú xí ꞌboxiéꞌána, jí boá xi ko̱ꞌna̱xiéꞌéní ni̱xtjin nga ka̱ma kjo̱a̱xcha̱án.

⁸ Ji Ne, ngata̱ boeꞌéndièjín ji nga xota̱ xi ꞌniú ndajiín, ka̱ma ni xi mejeén sa̱ꞌín, ngata̱ boeꞌéndièjíi̱n, nga kjo̱tjosón ni xi je índa.

⁹ ¡Ti̱ꞌin ji nga kondra̱na kꞌo̱kanieé ngayeje ni xi ndajín xi mejeén kui nga ka̱mana!

¹⁰ ¡Ngatixónieé xꞌué xí tjítíngá! ¡Ngatixóyà ti̱xa̱ ndáńchꞌi̱ xi na̱nga̱, kó nga nginijánjín fotjoni kui ngi̱ndiee̱!

¹¹ ¡Nginijánjín ꞌbé ngase kui nga̱sondiee̱ xota̱ xi ndiso! ¡Ngatjie ni xi ꞌniú ndajiín, ko̱jo kui xota̱ xi ꞌniú ndajiín nga!

¹² Ji Ne, ngo ni xi ta̱nisién ja̱koxi̱ mana: ¡nga jí boá xi ꞌnaxiéꞌé ji, ko̱jo xi kixi̱ niꞌínsée̱n xota̱ xi ni̱ma̱, ko̱jo xi ndasen síndo!

¹³ Kuíni nga xota̱ xi kixi̱i̱ tsꞌéntsjaà, kó ki̱a̱ nijan síndojoo̱.