Xo̱jo̱n Salmoo̱ 14 - Xo̱jo̱n eén Néná

Xota̱ xi ndajiín tsꞌenchꞌó Néná

Só xi katsꞌénda Ndabii̱.

¹ Xota̱ xi kitikjo̱a̱a̱ bi̱ tsó nga chji̱a̱jo ini̱ma̱a̱: «Jmí Nénájín». Kui xotaa̱ jè jatson, kó ngayeje ni xi tsꞌén, ni xi chꞌo boá, ¡nde ngojín xota̱ xi ni xi ndaa̱ tsꞌén!

² Néná ndeskande ndiꞌakꞌajmii̱ kotsijee̱n xota̱ nga̱sondiee̱, tsi̱ꞌe̱ nga sku̱i̱e̱ tsi ta̱ꞌaa̱ tjín ngo xota̱ xi makjiín, kó mongase Néná.

³ Ta̱nga ngayejee̱ nga je kje̱ꞌe ndi̱yà kijí, ngayejee̱ nga je jatson ini̱ma̱a̱. Nde jmíjín xi tsꞌén ni xi ndaa̱, nde ngojín.

⁴ A jmíjínrií kjo̱a̱niꞌánkjó ngayeje xota̱ xi tsꞌén ni xi ndajiín, kui xi tsꞌenkjié nga kjinie xota̱ na̱xi̱ńdána, xikoó tsi pan xi ndyi̱kjinie, kó a chji̱a̱jínrií Néná.

⁵ Ki̱a̱ boá nínga kjo̱tsièndíkón májnú, ngatꞌa̱ Néná kjo̱a̱ndaa̱ xota̱ xi kixi̱i̱ boá xi tikón.

⁶ Akajnóchájnú ni xi mejeén sa̱ꞌín xota̱ ni̱ma̱a̱, ta̱nga Néná boá xi koo̱n kui xotaa̱.

⁷ ¡Achichíra̱ ndakjiꞌi tsi ki̱a̱ na̱xi̱ńdáꞌniú Jerusale̱n kjo̱tjoni xi kꞌo̱xiéꞌá xota̱ Israee̱l! ¡Kjiꞌanga Néná sa̱ꞌíndé xota̱ na̱xi̱ńdaá kui, xi tsangínjo̱ ꞌniuú, achichí tsjá ka̱maa̱ xota̱ tji̱e̱e̱ Jakoo̱b, ko̱jo ngayeje xota̱ Israee̱l!