Xo̱jo̱n Salmoo̱ 139 - Xo̱jo̱n eén Néná

Jè yení án Ne

Só xi katsꞌénda Ndabii̱.

¹ Ji Ne, jè yé cha̱n cha̱nní, ¡jè yé ji kó kón an!

² Yé jí kjiꞌanga botíjña̱ an, ko̱jo kjiꞌanga fostjíe̱n an, ¡ta̱ kjin makjínnii̱ ni xi tjíjinko̱n an!

³ Yé jí ni xi tsꞌen an, ko̱jo ni xi tsꞌenjín an, ¡ngayeje nii̱ xi ye ji!

⁴ Nde kji̱e̱ chjiájín an, kó jè yé ji mí ni xi kuichjiá an.

⁵ Jè ikꞌíchjéꞌyé ndo̱jò ndójo̱ní, ¡jí boá xi botíxoméní!

⁶ ¡Jmí ni̱xtjin ka̱makjínna xikó kjiꞌi nga fíndikónna kjo̱a̱kjíntakóo̱n! ¡Jmí ni̱xtjin ka̱makjínna!

⁷ ¡Jmí ni̱xtjin ka̱mana sa̱ꞌinkjìi̱n yojona A̱si̱énni̱xtjìi̱n, ko̱jo tsi kjin konga an nínga tindyin ji!

⁸ Tsi ka̱mara̱na nga kjuín án nkꞌajmii̱, ki̱a̱ sa̱kóna ji, tsi ka̱mara̱na kjuínjáya an ngaskande nínga ꞌniú na̱nga̱a̱ tꞌanangii̱, ti̱ ki̱a̱ sa̱kóna ji nga.

^9-10 Tsi kjuíntji̱e̱n an xtji̱e̱e̱n nínga fotjo tsꞌueé, ndse̱ kixi̱ ji, ki̱a̱ ko̱kóna ndi̱yà, Tsi ki̱a̱ kotíjña̱ an ki̱a̱ xtji̱e̱e̱n nínga ꞌbosꞌien tsꞌueé, ti̱ ki̱a̱ ko̱si̱ke̱jení nga.

¹¹ Tsi an xi mejénna nga je ka̱majñó, tsi̱ꞌe̱ nga ki̱a̱ kotíjña̱ ꞌma an nínga jñoó, ¡nde jmí ni ka̱machjíjiín kui nii̱!

¹² ¡Ji jmí ndasénjiín tsi nínga tsijee̱n ko̱jo tsi nínga jñoó! ¡Ngaskande nga jñoó tsꞌentsíjen ndiꞌií tsꞌueé, kjimaa̱ ji!

¹³ Ji Ne, jí boá xi kiniꞌíndení ki̱a̱ ngi̱ya ndo̱bo̱a̱ndií na̱ana. Jí boá xi kiniꞌínde ji nga ngo nga ngo ndieè yojona.

¹⁴ Án boá ngo ni xi ta̱nisién tsjákjiꞌi xi ji kiniꞌínde ji, kó kuíni nga an tsjañaa ndokꞌóchji̱ì. Achichí tsjákjiꞌi ngayeje ni xi niꞌín ji, ¡jè be an nga bo̱a̱ kjiꞌi kui nii̱!

^15-16 Jí boá xi kamáyè ji nga yojona inda inda kamánda, nga kjindibáni ki̱a̱ nínga ꞌniú na̱nga̱a̱ tꞌanangii̱, ¡nde kji̱e̱ ngo ni̱xtjin botíjña̱ an, kó jí jè bo̱a̱ kase ji kótjín ni̱xtjin ka̱mana nga kotíjña̱ an nga̱sondiee̱! ¡Jè ikítꞌe ji ki̱a̱ xo̱jo̱n xi tikoón!

^17-18 Ji Ne, ¡achichí niꞌín mána nga makjínna kjo̱a̱kjíntakóo̱n! ¡Ta̱nga achichí niꞌín ngase ka̱mana tsi kꞌuixki̱ an! ¡Kjín ngase má ta̱bo̱a̱jiín tsomií ndáchíkoón! ¡Kó ndatsi ka̱mana kꞌuixki̱ an, kjófé an, kó nga kjo̱a̱ꞌána, kó ji, to̱kó ki̱a̱ra̱ tindyintꞌení!

¹⁹ Ji Ne, ¡achichí mejénna nga kui xota̱ xi tsꞌenkꞌién ini̱ma̱a̱ xín si̱ꞌinkjeꞌéní katsaki! ¡Achichí mejénna nga si̱ꞌinkꞌin ji katsaki!

²⁰ Nde jmí kjo̱a̱jiín kui xotaa̱, nga chꞌo tsó nga chji̱a̱taꞌii̱n, kó kondra̱ tse̱ ꞌbíndoni.

²¹ Ji Ne, chꞌóna kui xota̱ xi chꞌoo̱ ji, tsꞌenchꞌó an xota̱ xi tsꞌenchꞌoó ji.

²² ¡Achichí ꞌniú tsꞌenchꞌó an! ¡Kondra̱ mána kondra̱ tse̱!

²³ Ji Ne, tsitsíjìi̱n ngi̱jin ini̱ma̱na, kó chjátꞌeyékín ji kjo̱a̱niꞌánkjóna.

²⁴ Tꞌíyéní tsi tsjajín maá ni xi tjítsꞌen an, kó takoyèní kótsꞌèn mejeén nga kotíjña̱ an.