Xo̱jo̱n Salmoo̱ 138 - Xo̱jo̱n eén Néná

Achichí ndaxota̱ Néná

Só xi katsꞌénda Ndabii̱.

¹ Ji Ne, ¡mejénna sa̱ꞌintsjaá ngayeje ini̱ma̱na! ¡Mejénna siee só ngindyi̱ko̱n kje̱ꞌe ne!

² Mejénna kosien an tikóna, kó kuichjiaá nga skotsijen an xtji̱e̱e̱n nínga tikón na̱ngo̱xi̱i̱, mejénna sa̱ꞌintsjaá ta̱ngatꞌanii̱ nga ngatsjéni̱xtjin tjoó an. Kjo̱a̱a̱ ngayeje kui nii̱, jè akake ji kjo̱a̱jèe̱, jè kiniꞌínkjatjosén ji ée̱n.

³ Ji tsíchji̱a̱a̱, kó kiniꞌínsénní, kó katseꞌé nginí ngaꞌniú.

^4-5 Ji Ne, ¡achichí ngaꞌniú xí tjiín! Sa̱ꞌíntsjaá ngayeje já ree̱ kui nga̱sondiee̱ kjiꞌanga ku̱i̱ntꞌiè ée̱n, ko̱jo nga sku̱i̱e̱ ngayeje ni xi je kiniꞌín ji.

⁶ Ji Ne, ki̱a̱ tindyin ji nkꞌajmii̱, kó tichìi̱n xota̱ xi ni̱ma̱a̱, ta̱nga xota̱ xi nkꞌakoo̱n niꞌínkjìi̱n yojòo̱.

⁷ Kjiꞌanga ngo kjo̱a̱xti tjínna, jí boá xi boeꞌé nginí ngaꞌniú. Boke ji ngaꞌniú jèe̱, kó ꞌnaxiéꞌéní ngi̱ya tsja kondra̱na.

⁸ Ji Ne, jí boá xi si̱ꞌinkjatjosén ngandana ni xi je kiniꞌínkjé jí nga si̱ꞌin ji. Bosíkjejín ji xikó kjiꞌi nga tjoó an, ngatꞌa̱ ti̱ jíní bo̱a̱ xi kiniꞌíndení. ¡Ngata̱ ꞌbíjñímasínjínní!