Xo̱jo̱n Salmoo̱ 135 - Xo̱jo̱n eén Néná

Kjo̱a̱niꞌántsjaà Néná

¹ ¡Si̱ꞌantsjàa̱ Néná! ¡Ti̱ꞌantsjàjnúu̱ jún, xota̱ xi ntꞌiéꞌeén kuí!

² ¡Ti̱ꞌantsjàjnúu̱ jún, xi ngatsjéni̱xtjin nga tindyiónjnú ki̱a̱ ndi̱tsen na̱ngo̱xi̱i̱ Néná!

³ ¡Si̱ꞌantsjàa̱ Néná, ngatꞌa̱ achichí nda tsꞌénjo̱ná! ¡Ko̱ndáa̱ só ngatꞌa̱ achichí ndaxota̱!

⁴ ¡Néná boá xi jaꞌájin na̱xi̱ńdá Israee̱l, tsi̱ꞌe̱ nga ngatsjéni̱xtjin nga kui xi ka̱ma xota̱ na̱xi̱ńdaá!

⁵ Jè be an nga Néná tjín ngasee̱ ngaꞌniú ta̱bo̱a̱jiín ngayeje ne xi ngasee̱.

⁶ Néná tsꞌén ni xi mejeén sa̱ꞌín, ki̱a̱ nkꞌajmii̱ ko̱jo kꞌi̱e̱ nga̱sondiee̱, ko̱jo ngi̱jin nínga ꞌniú na̱nga̱a̱ ndáchíkoón.

⁷ Néná ndibájo̱ná ṉdi̱i̱, ndeskande nínga ꞌniú kjinnii̱ tꞌanangii̱. Néná tsangiya nga foaꞌatꞌee̱, kui xi tsáyà nga je ko̱a̱ꞌa stseé. Néná ꞌboxiéni tjo̱o̱ ki̱a̱ ngi̱ndie nínga tikóntjoó.

^8-9 Ki̱a̱ nangi Ejipto̱ katsꞌénꞌoón nga katsꞌénkꞌién ndí tjoón nga ngo nga ngo xtín xota̱ ndiꞌa, kó ti̱ katsꞌénkꞌién ndí tjoón cho̱ tji̱e̱é kui xotaa̱ nga. Katsꞌén chi̱bo̱a̱ ko̱jo kjo̱a̱ndikón, kondraa̱ ree̱ ko̱jo xota̱ xi nkꞌa xaá xi tsꞌénxájo̱,

¹⁰ katsꞌénꞌoón nga katsꞌénkꞌién kjín xota̱ na̱xi̱ńdá, kó katsꞌénkjié re xi tjiín ngaꞌniú:

¹¹ katsꞌénkꞌién Sijoo̱n, nda̱ ree̱ xi xota̱ Amoo̱r, katsꞌénkꞌién Oo̱j, nda̱ ree̱ nangi Basaa̱n, ¡katsꞌénkjié ngayeje já re xi chji̱a̱ni xota̱ Kanaa̱n!

¹² Xota̱ Israee̱l kui xi xota̱ na̱xi̱ńdaá katsꞌénkꞌasꞌiee̱n tꞌanangii̱ kui já ree̱, tsi̱ꞌe̱ nga tsi̱ꞌe̱ kui xotaa̱ ka̱ma ngatsjéni̱xtjin.

¹³ Ji Ne, ¡ngatsjéni̱xtjin nga tindyin ji!

¹⁴ Jí boá xi ꞌnaxiéꞌé ji xota̱ na̱xi̱ńdáa̱, kó ni̱ma̱ maa̱.

¹⁵ Nee̱ xota̱ xi kje̱ꞌe nangii̱, ni xi katsꞌénda tsja xota̱ nga̱sondiee̱ boá, ¡ne xi to̱ntiboa ko̱jo xi to̱nsinié boá!

¹⁶ Nde jmí ni chjíjiín nga tjín tsꞌoa, ngatꞌa̱ májín chji̱a̱, tjín ndyi̱ko̱n, ta̱nga májín be,

¹⁷ tjín tji̱bo̱a̱nijon, ta̱nga májín ntꞌié, ¡nde májiín kjiendá!

¹⁸ ¡Ngatꞌa̱ xikó má kón kui nee̱, bo̱a̱ má kón kui xi katsꞌéndaa̱ nga, ko̱jo kui xota̱ xi sꞌijii̱n kui nii̱!

¹⁹ Jún xota̱ Israee̱l, ¡nda ndókjo̱a̱jnú kjo̱a̱a̱ Néná! Jún xi chináꞌmijnú, ¡nda ndókjo̱a̱jnú kjo̱a̱a̱ Nee̱ xota̱ Israee̱l!

²⁰ Jún xota̱ tji̱e̱e̱ Lebii̱, ¡nda ndókjo̱a̱jnú kjo̱a̱a̱ Néná! Jún xi ndaꞌyáꞌénjnúu̱ Néná, ¡nda ndókjo̱a̱jnú kjo̱a̱a̱ Nee̱ xota̱ Israee̱l!

²¹ ¡Si̱ꞌantsjàa̱ Néná, kui Néná xi tikón ki̱a̱ na̱xi̱ńdáꞌniú Jerusale̱n! ¡Si̱ꞌantsjàa̱!