Xo̱jo̱n Salmoo̱ 132 - Xo̱jo̱n eén Néná

Ni xi Néná katsóyàtjón nga sa̱ꞌínjo̱ Ndabii̱

^1-2 Ji Nee̱ na̱xi̱ńdá Israee̱l xi tjiín ngaꞌniú, ngatjaꞌátsjiee̱n Ndabii̱ ko̱jo kjo̱a̱ni̱ma̱ xi jaꞌatio, ngatjaꞌátsjiee̱n ni xi katsóyàtjoón kui:

^3-5 «Ji Nee̱ na̱xi̱ńdá Israee̱l xi tjiín ngaꞌniú, nde ngo ndsa̱ko án kosienjín an ndiꞌana, ti̱nde ngo ni̱xtjin sa̱ꞌinkjaꞌyájín an, nde kjóféjín an ngotjón chií, ti̱nde kꞌuichjajín an ndyikón án, tji̱e̱nga sa̱kójínna ngo ngi̱ndie nínga sa̱ꞌinda an na̱ngo̱xi̱i̱».

⁶ Kjiꞌanga kixindyión na̱xi̱ńdá Efrata̱ kandaꞌyá nga kandokjo̱a̱ kjo̱a̱a̱ koxa̱a̱ kjo̱a̱ꞌbíndaa̱, kó nga fetꞌani kasakoná ki̱a̱ na̱xi̱ńdá Kiriaa̱t-Jearii̱n.

⁷ Kósꞌe̱ bi̱ kiꞌmí: «¡Tjián na̱ngo̱xi̱i̱ Néná! ¡Tjiankindyiá tikóná ngindyi̱ko̱n kui!»

⁸ Ji Ne, ¡ja̱bíꞌi̱n kó ndibéje̱ ji koxa̱a̱ kjo̱a̱ꞌbíndàa̱, kui xi bokó ngaꞌniú xí tjiín, ki̱a̱ na̱ngo̱xi̱ nínga ngatsjéni̱xtjin nga ku̱i̱ndyin ji!

⁹ Já chináꞌmìi̱ ko̱a̱ja̱ ńjño xi bokó kjo̱a̱kixi̱i̱, kó xota̱ na̱xi̱ńdáa̱ tsjangatamaa̱ nga si̱eé.

^10-11 Ji Ne, jí boá xi kachjeꞌéjin ji Ndabii̱, tsi̱ꞌe̱ nga kui xi ka̱ma rejne̱, ¡tasíke̱je ji! Ti̱ katseꞌée̱ ndso̱ꞌbe nga kiꞌmíyetjée̱n kui nii̱, kó be án nga si̱ꞌinkjatjosén ji nga bi̱ kasèe̱: «Re ka̱ma xota̱ tji̱e̱e̱, ¡án boá xi sa̱ꞌin an nga kui xi ko̱tíxoma!

¹² Tsi sa̱ꞌínkjatjosón ni xi inda an ko̱jo kjo̱a̱kitina, ko̱jo ndií xi re ka̱ma nga, kó ngatsjéni̱xtjin nga kui ko̱tíxoma ngi̱ndièe̱».

¹³ Jí boá xi kachjeꞌéjin ji na̱xi̱ńdáꞌniú Jerusale̱n tsi̱ꞌe̱ nga ki̱a̱ ku̱i̱ndyin ji ngatsjéni̱xtjin. Kó bi̱ kase ji:

¹⁴ «Kꞌi̱e̱ bí nínga kꞌuijñá an na̱ngo̱xi̱na. Kꞌi̱e̱ bí nínga ngatsjéni̱xtjin kotixoma an, ngatꞌa̱ jè bo̱a̱ tsꞌén kamámejénna an.

¹⁵ Achichí ꞌniú sa̱ꞌínchikonñé an ngayeje nichinie xi kꞌuieé kui na̱xi̱ńdáꞌniuú, kó achichí nichinie kꞌuié, tsi̱ꞌe̱ nga sa̱ꞌinkꞌíxió an kjindiaá xota̱ ni̱ma̱a̱.

¹⁶ Ńjño xi chajá nga ma sꞌué sa̱ꞌínkajá an já chináꞌmii̱, kó achichí tsjá ka̱maa̱ xota̱ na̱xi̱ńdaá nga si̱é.

¹⁷ Kꞌi̱e̱ bí nínga sa̱ꞌin an nga ku̱i̱ꞌítsꞌi̱ya nginií ngaꞌniú xí kꞌuieé Ndabii̱, kui re xi an jaꞌajin an, kꞌi̱e̱ bí nínga ngatsjéni̱xtjin nga ko̱tíxoma xota̱ tji̱e̱e̱.

¹⁸ Kondra̱a̱ sa̱ꞌintsobéjìi̱n, ta̱nga Ndabii̱ nga kui xi re, xcha̱ndikón ngase xikótsꞌèn ko̱tíxoma».