Xo̱jo̱n Salmoo̱ 12 - Xo̱jo̱n eén Néná

Ngatsjéni̱xtjin tichinjne̱

Só xi katsꞌénda Ndabii̱.

¹ ꞌNa̱xiéꞌéjne̱ Ne, ngatꞌa̱ jè kjife xota̱ xi ni̱ma̱ maa̱ kje̱ꞌe xota̱, ko̱jo jè kichajá xota̱ xi kixi̱i̱ ngindyikin ji.

² Kjo̱a̱ndiso boá xi chji̱a̱jo ja̱kꞌi̱e̱ ja̱ngaján xkjín, kó én tsjatsó, ko̱jo én jókje̱n boá xi chji̱a̱.

³ ¡Néná ngatsꞌenkjié kui ndso̱ꞌba xi chji̱a̱ én ixii̱, ko̱jo kui najen xi chji̱a̱ én nkꞌakoo̱n!

⁴ Kui xota̱ xi bi̱ tsoó: «Ko̱e̱ꞌéngaꞌniúu̱ najén, kó nga tjínná ndso̱ꞌbá. ¡ꞌYá xí ka̱maa̱ ko̱tíxománá!»

⁵ Ta̱nga ta̱ngatꞌanii̱ nga ndajín kjimataꞌin xota̱ ni̱ma̱a̱, ko̱jo ta̱ngatꞌanii̱ nga ni̱ma̱ ndyi̱tsó xota̱ xi ni̱ma̱kjo̱a̱a̱, kuíni nga bi̱ kase ji: «Ngotꞌe̱ ꞌne̱ kjo̱stjíe̱n mára an, tsi̱ꞌe̱ nga skóo̱n xota̱ xi tjímojnóchaá».

⁶ Én xí chji̱a̱ Néná, én xí tsjie boá, kó kuí boá xi xikoó to̱ntiboa xi yito ndi̱yà niꞌántsjieni ngi̱yaa̱ ngo orjno̱.

⁷ Jí boá xi xchínjne̱ ji Ne, kó ngatsjéni̱xtjin ko̱ꞌna̱xiéꞌéjne̱ kjo̱a̱a̱ kui xota̱ tji̱e̱ xi ndajiín.

⁸ Ta̱jñání ꞌbítso̱ma xota̱ xi ndajiín, kjiꞌanga ni xi ndajiín boá xi ndyi̱tsꞌèntsjaà xota̱ nga̱sondiee̱.