Xo̱jo̱n Salmoo̱ 119 - Xo̱jo̱n eén Néná

Soó eén Néná

^1-2 Ji Ne, jí boá xi niꞌínchikonñí xota̱ xi tjimá ndi̱yà xí ndaa̱, xota̱ xi ngayeje ini̱ma̱a̱ nga tjimátji̱ngi kjo̱a̱bokoyáa̱.

³ Jmí ni xi ndajín ndyi̱tsꞌènjín kui xotaa̱: ta̱ jí tsí xi ndyi̱ntꞌièꞌeén.

⁴ Jí boá xi je akatíxome nga kjo̱a̱botíxomàa̱ si̱ꞌankjatjosón xikó má tsó.

⁵ Mejénna sa̱ꞌinchji̱ni̱e̱ an yojona, kó sa̱ꞌinkjatjosón an ni xi tsó kjo̱a̱botíxomàa̱.

⁶ Tsi sa̱ꞌinkjatjosón an, jmí kjo̱a̱soboá kꞌuiéjínna.

⁷ Tsi ko̱ko̱yení ée̱n, ngayejee̱ ini̱ma̱na nga sa̱ꞌintsjaá,

⁸ kó kuintꞌieꞌée̱n kjo̱a̱botíxomàa̱. ¡Ngata̱ ꞌbíjñímasínjínní!

⁹ Ta̱ ngototo kjiꞌanga sa̱ꞌínkjatjosón ni xi tsó ée̱n, nga já ko̱jo ínchjín xo̱ngo̱ò ka̱maa̱ sa̱ꞌíndaya xikótsꞌèn tjíndo.

^10-11 Ngayejení ini̱ma̱na nga mongasee̱ ji, kó ngi̱jii̱n kjo̱a̱niꞌánkjóna yaꞌa an ée̱n. Ti̱ꞌin ji nga ka̱ma ꞌniáko̱n an kjo̱a̱bokoyáa̱, tsi̱ꞌe̱ nga sa̱ꞌinjéjín an.

¹² ¡Ngatamachikonñé ji Ne! ¡Takoyèní tsi̱ꞌe̱ nga sa̱ꞌinkjatjosón an ni xi tsó kjo̱a̱botíxomàa̱!

^13-15 Ngatsjéni̱xtjin nga ta̱ kui ni chjiá án, kui kjo̱a̱bokoyá xi ji katseꞌéjne̱. Kuí boá xi nda bosiénnijóo̱n, ngatꞌa̱ achichí kjo̱a̱tsja tsjána, ta̱bo̱a̱jiín ngayeje to̱nsinié xi tjín nga̱sondiee̱.

¹⁶ Kjo̱a̱botíxomàa̱ boá ni xi ꞌniú tsjaá kjo̱a̱tsja ini̱ma̱na, jmíni̱xtjin xchi̱yana.

^17-19 Kꞌi̱e̱ tikòn an kꞌi̱e̱e̱ nga tjítsꞌen an xáa̱, nda ti̱ꞌinje̱ní, kó sa̱ꞌinkjatjosón an kjo̱a̱ xi boeꞌé ji. Ta̱ ngotjón tikón án kui nga̱sondiee̱, takéní kjo̱a̱botíxomàa̱, tsi̱ꞌe̱ nga skuie an. ¡Tasíke̱jení tsi̱ꞌe̱ nga ka̱makjínna kjo̱a̱bokoyá tsjakjiꞌíi̱!

²⁰ Ngatsjéni̱xtjii̱n nga ma mejénna nga skuie an kjo̱a̱bokoyáa̱.

²¹ ¡Achichí ndasen mana kjo̱a̱a̱ kui xota̱ xi tsꞌénkjátjosónjín kjo̱a̱botíxomàa̱! ¡Jí boá xi niꞌínxchínje̱ ji kui xi nkꞌakoo̱n!

²² Ngata̱ boeꞌéndièjín ji nga si̱ꞌanchꞌóna, ngatꞌa̱ ngatsjéni̱xtjin nga tsꞌenkjatjosón an kjo̱a̱botíxomàa̱.

²³ Xota̱ xi tjiín ngaꞌniuú, ni ꞌbínda kondra̱na, ta̱nga ta̱ kjo̱a̱botíxomàa̱ boá ni xi tsꞌenkjó an án.

²⁴ Kuí boá xi tsjána kjo̱a̱tsja, kó nda kjo̱a̱botíxoma xi tjiín ji.

^25-28 Ti̱ꞌinkjatjosén ji ni xi kiꞌmíyetjén, kó ti̱ꞌinꞌnítakínní, ngatꞌa̱ jè ngiti̱ jmí ngaꞌniújínna, kó xi so xi ndakjaa̱n jè tjítsꞌénkꞌiénna. Jè kixiyaa xikótsꞌèn tikòn an, kó ji kiniꞌínsénní. ¡Takoyèní tsi̱ꞌe̱ nga sa̱ꞌinkjatjosón an kjo̱a̱botíxomàa̱, kó nga ta̱ ni tsjakjiꞌi xi niꞌín tsí ji xi sa̱ꞌinkjó án!

²⁹ Ngata̱ boeꞌéndièjín ji nga kꞌuindiso an, ¡takoyèní ée̱n, ngo kjo̱a̱nda!

^30-31 Ji Ne, ngata̱ boeꞌéndièjín ji nga ndajín kotíjña̱ an ngindyi̱ko̱n xotaa̱, ngatꞌa̱ kjo̱a̱botíxomàa̱ boá xi kjimaꞌniáko̱n an, kó jè katsjáa̱ko̱n an nga sa̱ꞌinkjatjosón an.

³² Jè tsá sa̱ꞌinkjatjosón an, ngatꞌa̱ ji akasíke̱jení tsi̱ꞌe̱ nga kamákjínna.

^33-35 Ji Ne, takoyèní tsi̱ꞌe̱ nga sa̱ꞌinkjatjosón an kjo̱a̱botíxomàa̱, ngatꞌa̱ achichí tsjá mána nga tsꞌenkjatjosón an, ¡ngatsjéni̱xtjin sa̱ꞌinkjatjosón an nga kotíjña̱ an nga̱sondie! Ti̱ꞌintsijìin kjo̱a̱kjíntakónna, kó ngayeje ini̱ma̱na nga kjuíntjíngí an.

³⁶ Ti̱ꞌin ji nga ta̱ ée̱n tsí xi sa̱ꞌinkjó án, kó jmí tsi to̱n xi niꞌán xi ndajín sakóná.

^37-38 Ngata̱ boeꞌéndièjín ji nga ni xi Nénájín xi kjuíntjíngí an, ngatꞌa̱ ta̱ jí tsí xi sa̱ꞌindikoón. ¡Ti̱ꞌinkjatjosén ji ni xi kiꞌmíyetjén, kó ti̱ꞌinꞌnítakínní!

^39-40 Ée̱n boá xi ꞌniú mejeén ini̱ma̱na. Achichí tsakjon má an nga tsꞌenkjó án nga tsꞌenchꞌóna kondra̱na. ꞌNa̱xiéꞌéní, kó ti̱ꞌinꞌnítakínní, ngatꞌa̱ jí boá xi xikoó ngo Ne ndiꞌa masien xi kixi̱.

⁴¹ Ji Ne, takéní kjo̱a̱tjóo̱, kó ꞌna̱xiéꞌéní, xikó má kase nga kiꞌmíyetjén ji.

^42-43 Bo̱a̱ tsꞌén nga ka̱mana kuichjiáꞌa an kondra̱na. Te̱ꞌéndièní nga ni xi ja̱koxi̱ xi kuichjiá an, ngatꞌa̱ ée̱n boá xi kjimaꞌniátakón an.

^44-45 Ka̱mana kjótsoꞌbándé án, ngatꞌa̱ ée̱n boá xi tsꞌénfítji̱ngi an, kó ngatsjéni̱xtjin nga sa̱ꞌinkjatjosón an.

⁴⁶ Ngindyi̱ko̱n já ree̱ ka̱ma kuichjiá an kjo̱a̱botíxomàa̱ kó soboájín ka̱mana.

^47-48 Tjóna ko̱jo achichí mejénna ée̱n, ngatꞌa̱ kuí boá xi ꞌbikítsiena kjo̱a̱tsja.

⁴⁹ Ni xi kaseyetjén ji tsjána kjo̱a̱chiyá, ¡ngata̱ niꞌínchíyéjín ji!

⁵⁰ Ni xi kaseyetjén ji tsjána kjo̱a̱mindyion, kó tsꞌéndájónna nga ndasen botíjña̱ an.

^51-53 Ji Ne, jmíni̱xtjin xchi̱yana ée̱n xi tikón ngatsjéni̱xtjii̱n, ngatꞌa̱ kuí boá xi tsꞌéndájónna. Xota̱ xi nkꞌakoo̱n chꞌo tsóna, achichí chꞌo mana nga kui xota̱ xi ꞌniú ndajiín fítji̱ngijín kjo̱a̱bokoyáa̱. Ta̱nga an tjítsꞌenkjatjosón án.

⁵⁴ Ta̱ chiboa tsí ka̱mana nga kotíjña̱ an kui nga̱sondiee̱, ta̱nga ngatsjéni̱xtjin xiyà an nga achichí nda kjo̱a̱bokoyáa̱.

⁵⁵ Ji Ne, kjiꞌanga jñoó chjiá an jaꞌée̱n, mejénna nga kjuíntjíngí an kjo̱a̱bokoyáa̱,

⁵⁶ ngatꞌa̱ kuí boá kui nii̱ xi tsoboána nga sa̱ꞌin an.

^57-58 Ji Ne, jí boá ngayeje ni xi tjínna an, ngayeje ini̱ma̱na nga mejénna kuintꞌieꞌeén, ko̱jo nga tsja ka̱maa̱ ni xi sa̱ꞌin an. ¡Ti̱ꞌinkjatjosén ji ni xi kiꞌmíyetjén, kó ti̱ꞌinꞌnítakínní!

^59-60 Ngiti̱ sa̱ꞌinkjaꞌájín ngase an ni̱xtjin: jè katsꞌenkjó án kjo̱a̱a̱ ni xi tsꞌen an, kó jè katsjáa̱ko̱n an nga kjuíntjíngí an kjo̱a̱botíxomàa̱.

⁶¹ Xota̱ xi ꞌniú ndajiín mejeén stso̱ba̱na, ta̱nga ꞌbijñámasiénjín an kjo̱a̱bokoyáa̱.

⁶² Nga ma masien ni̱xtji̱e̱n fostjíe̱n an, kó tsꞌendikoón ngatꞌa̱ kixi̱ boá kjo̱a̱botíjée̱.

⁶³ Amingo̱ mána ngayeje xota̱ xi bendikoón, ko̱jo xota̱ xi ntꞌiéꞌeén.

⁶⁴ Ji Ne, kjo̱a̱tjóo̱ boá xi sꞌikitsieni ngayeje nga̱sondiee̱, ¡takoyèní kjo̱a̱botíxomàa̱!

⁶⁵ Ji Ne, ¡nda ti̱ꞌinje̱ní, xikó má je kase ji nga kandokjo̱e̱tjén!

⁶⁶ Sꞌijinna ée̱n. ¡Te̱ꞌé ngasení kjo̱a̱kjíntakón ko̱jo kjo̱a̱kjínkón!

⁶⁷ Ngindiee̱ nga ko̱ti̱jéní, kjin kisꞌijñañaa ji, ta̱nga ngotꞌe̱ ꞌne̱ jè ntꞌieꞌée̱n ée̱n.

⁶⁸ Achichí nda ji xota̱, kó ni xi nda boá xi niꞌín ji, takoyèní nga kuintꞌieꞌée̱n kjo̱a̱botíxomàa̱.

^69-70 Xota̱ xi nkꞌakoo̱n chji̱a̱taꞌinna, kui xotaa̱ jmí ini̱ma̱jiín. Ta̱nga an ki̱a̱ tsꞌénfítji̱ngi an kjo̱a̱bokoyáa̱, ngatꞌa̱ kuí boá xi tsjána kjo̱a̱tsja.

⁷¹ Nda kiniꞌín ji nga kjo̱a̱ni̱ma̱ kiniꞌínkjeꞌení, ngatꞌa̱ bo̱a̱ tsꞌén kamákjínna kjo̱a̱bokoyáa̱.

⁷² Kuí boá kui nii̱ xi ꞌniú chjí ngasenii̱, ta̱bo̱a̱jiín to̱nsinieé ko̱jo to̱ntiboaa̱.

⁷³ Ndse̱ boá xi kiniꞌínkjìn jí nga kiniꞌíndení, ¡tasíke̱jení tsi̱ꞌe̱ nga kuintꞌieꞌée̱n kjo̱a̱botíxomàa̱!

⁷⁴ Xota̱ xi tsꞌéndíkoón tsja maa̱ nga bena, ngatꞌa̱ ꞌniáko̱n án ée̱n.

⁷⁵ Ji Ne, be an nga kixi̱ ni xi botíxome ji, kó tsoboána nga ko̱ti̱jéní.

^76-78 Ndibéje̱ní kjo̱a̱tjóo̱, kó ti̱ꞌinꞌnítakínní, ngatꞌa̱ achichí tsjá mána kjo̱a̱a̱ kjo̱a̱botíxomàa̱. Achichí tsꞌenkjó án kjo̱a̱botíxomàa̱, kuíni nga ti̱ꞌinkjatjosén ji ni xi kiꞌmíyetjén. Ti̱ꞌinkjeꞌe ji kjo̱a̱soboá kui xota̱ nkꞌakoo̱n, kui xi nde jmí kjo̱a̱jiín nga ni xi ndajín ndyi̱tsꞌènjo̱na,

⁷⁹ ti̱ꞌin ji nga ka̱matikójo̱na ngayeje xota̱ xi tsꞌéndíkoón, tsi̱ꞌe̱ nga sku̱i̱e̱ kjo̱a̱botíxomàa̱.

⁸⁰ Tasíke̱jení nga ka̱makjínna kjo̱a̱bokoyáa̱, tsi̱ꞌe̱ nga jmí kjo̱a̱soboá kjo̱a̱ꞌajín an.

^81-82 Jè tsá kjifoaꞌa ni̱xtjin xi tikòn an, jè ngiti̱ ndajín tsijenna, jè tsꞌénkoya an nga si̱ꞌinkjatjosén ji ni xi kiꞌmíyetjén nga kji̱ndi̱bé ꞌna̱xiéꞌéní, ngatꞌa̱ ꞌniáko̱n an ée̱n.

⁸³ Ndatsi je xchá án ko̱jo ndatsi je tjixíꞌniú yojona, ta̱nga tjichíyajínna ée̱n.

^84-87 Kui xota̱ xi nkꞌakoo̱n, ko̱jo xota̱ ndiso xi ki̱a̱jín tjimátji̱ngi kjo̱a̱bokoyáa̱, chja̱ya̱ ndyi̱ꞌbíndona. Kjiꞌání bo̱a̱ nga ko̱ti̱jée̱. Jè mejeén katsꞌénkꞌiénna, ta̱nga an tsꞌéntꞌièꞌénñáa̱ kjo̱a̱botíxomàa̱, ngatꞌa̱ kjo̱a̱kixi̱ boá. ¡Tasíke̱jení!

⁸⁸ ¡Ti̱ꞌinꞌnítakínní, kó kuintꞌieꞌeén, ngatꞌa̱ jí boá ngo Ne xi tjiín kjo̱a̱tjó!

^89-91 Ji Ne, ngatsjéni̱xtjin nga tindyin ji, ko̱jo nga ꞌniákoo̱n ji. Tji̱e̱nga tikón nkꞌajmii̱ ko̱jo nga̱sondiee̱, ée̱n to̱kó kꞌuijñára, ¡ngayeje xi kiniꞌínde ji, tjíndo nga xáa̱ xi sa̱ꞌín!

⁹² Tsi jmí kjo̱a̱tsja tsjájínna ée̱n, ¡jera̱ kꞌien ndasen an tsobo̱a̱!

⁹³ Jmí ni̱xtjin xchi̱yana ée̱n, ngatꞌa̱ kuí boá xi tikónni an.

⁹⁴ ¡ꞌNa̱xiéꞌéní, ngatꞌa̱ jí chji̱a̱ni an, kó mongase án nga sa̱ꞌinkjatjosón an kjo̱a̱botíxomàa̱!

⁹⁵ Tjín xota̱ xi ꞌniú ndajín xi mejeén sa̱ꞌínkꞌiénna, ta̱nga an mejénna nga ka̱makjínna kjo̱a̱bokoyáa̱.

⁹⁶ Ngayeje nga̱sondiee̱ nga kju̱i̱e̱, ¡ta̱ ée̱n tsí bo̱a̱ xi jmíni̱xtjin kju̱i̱e̱!

⁹⁷ ¡Achichí tjóna kjo̱a̱bokoyáa̱ nga ngaskande nga ngo ni̱xtjii̱n nga kui tjítsꞌenkjó án!

^98-99 Ngatsjéni̱xtjin nga tikónjo̱na, kó ngaskande ꞌniú kjínkón ngase tsꞌénna, ta̱bo̱a̱jiín kondra̱na ko̱jo mostro̱na.

¹⁰⁰ Ngaskande nda ngase makjínna kjo̱a̱bokoyáa̱, ta̱bo̱a̱jiín ni xi chji̱a̱ xota̱ xi xchaá, ngatꞌa̱ bo̱a̱ tsꞌen an xikó tsó.

¹⁰¹ Jè íjñá masien an ngayeje ndi̱yà xi ndajín, ngatꞌa̱ mejénna sa̱ꞌinkjatjosón an ée̱n.

¹⁰² Kji̱e̱ ꞌbijñámasiénjín an kjo̱a̱botíxomàa̱, ngatꞌa̱ jí boá xi mostro̱na.

^103-104 Achichí kjo̱a̱kjíntakón boeꞌéní, nga ngaskande je kamáchꞌona kjo̱a̱ndisoo̱. ¡Ée̱n ixi ngase mana, ta̱bo̱a̱jiín ntsjieén!

¹⁰⁵ Ée̱n boá xi ndiꞌíxò kjimana, kuí boá xi tsꞌentsíjee̱n ndi̱yàna.

¹⁰⁶ Sa̱ꞌinkjatjosón an ni xi kixiyatjoón nga sa̱ꞌin an: kuintꞌieꞌée̱n kjo̱a̱botíxoma kixi̱i̱.

^107-110 Ji Ne, ¡jè ta̱nisién tsie kjo̱a̱ni̱ma̱ xi je jaꞌatio an! Ngatsjéni̱xtjin nga nínga tjín kjo̱a̱bo̱ya tikòn an, ta̱nga jmíni̱xtjin chíyána kjo̱a̱bokoyáa̱. Xota̱ xi ꞌniú ndajiín chja̱ya̱ ꞌbíndona, ta̱nga ntꞌieꞌénñáa̱ kjo̱a̱botíxomàa̱. Tsjangatamaa̱ nga chjábé jí kui kjo̱a̱niꞌántsjà xi tjítsꞌenkꞌasꞌieen, kó takoyèní ée̱n. Ti̱ꞌinkjatjosén ji ni xi kiꞌmíyetjén, kó ti̱ꞌinꞌnítakínní.

^111-112 Án tsa̱ꞌa̱n kjo̱a̱bokoyáa̱, ¡kuí boá xi kjo̱a̱tsjaa̱ ini̱ma̱na! Jè katsjáa̱ko̱n an nga sa̱ꞌinkjatjosón an ngatsjéni̱xtjin, ngaskande nga kju̱i̱e̱tꞌani.

^113-115 ¡Tꞌíjñá so̱bo̱a̱jnúꞌun jún xota̱ xi ꞌniú ndajín! ¡Chꞌóna jún ngatꞌa̱ xota̱ jókje̱njnú! Ta̱nga ji Ne, tjóna ji, kó mejénna kjuíntjíngíra an kjo̱a̱bokoyáa̱. Jí boá xi ngi̱ndiena, ko̱jo jí boá xi chínní. Ni xi kiꞌmíyetjén ji, kuí boá xi tsꞌénkoyàa̱.

¹¹⁶ Te̱ꞌéní ngaꞌniú, kó kotíjña̱ ngase an nga̱sondie, xikó má kase ji nga kiꞌmíyetjén, ¡nga jmí kjo̱a̱soboá sakójínna!

¹¹⁷ ¡Tasíke̱jení, kó ꞌna̱xiéꞌéní, tsi̱ꞌe̱ nga sa̱ꞌinkjatjosón an ée̱n!

^118-119 Xota̱ xi ꞌniú ndajiín kui nga̱sondiee̱ xi chꞌoo̱ kjo̱a̱bokoyáa̱, mejénjiín nga ki̱a̱ kꞌuíndo tiñatꞌaa, kó xikó maá xtjié niꞌínje̱ ji. Ta̱ kjo̱a̱ndaní nga ni xi ndajín ndyi̱ꞌbínda, ta̱nga an, tsꞌenkjatjosón an ée̱n.

¹²⁰ Fotsié má an nga tsakjon má an ngindyikin ji, ¡ée̱n boá xi tsꞌénkjátsiéna!

¹²¹ Ji Ne, ¡ngata̱ boeꞌéndièjín ji nga ngi̱ya tsja kondra̱na kꞌo̱ka an! Ni xi nda ko̱jo ni xi kixi̱ boá xi tjítsꞌen an,

¹²² ti̱ꞌin ji nga ngatsjéni̱xtjin nga nda ko̱e̱je̱na, kó nga sa̱ꞌínxtíjínna xota̱ xi nkꞌakoo̱n.

¹²³ Jè ngiti̱ ndajín tsijenna nga tsꞌénkoya an nga kjo̱tjosón ni xi kiꞌmíyetjén ji nga kji̱ndi̱békasíke̱jení.

¹²⁴ ¡ꞌNiú tjó ti̱ꞌinje̱ní, kó takoyèní kjo̱a̱botíxomàa̱!

¹²⁵ Te̱ꞌéndièní tsi̱ꞌe̱ nga ka̱makjínna, ngatꞌa̱ mejénna nga skuie an kó tsó.

¹²⁶ Ji Ne, jè chi̱bo̱a̱a̱ nga je si̱ꞌin ji ngo ni, ngatꞌa̱ nde ngojín xi tsꞌénkjátjosón kjo̱a̱botíxomàa̱.

¹²⁷ Kjo̱a̱botíxomàa̱ boá xi tjó ngasena, ta̱bo̱a̱jiín tsi tsie kjo̱a̱cho̱n kꞌuiéna.

¹²⁸ Kuíni nga kui fitji̱ngi an, kó chꞌóna kjo̱a̱ndisoo̱.

¹²⁹ ¡Achichí ꞌniú nda kjo̱a̱botíxomàa̱! ¡Kuíni nga ki̱a̱ fitji̱ngi kixi̱ kixi̱ an!

¹³⁰ Kjiꞌanga ngo mostro̱ bokoyá, nde niꞌínjín makjiín ngayeje xotaa̱.

¹³¹ Achichí mejénna nga skuie an kjo̱a̱botíxomàa̱, ¡achichí mejénna nga tsá ka̱makjínna!

¹³² Ji Ne, ¡ti̱ꞌinsénní, kó ni̱ma̱ ngatamaa̱ an, xikó má niꞌínje̱ ji ngayeje xota̱ xi tjoó ji!

^133-134 Takéní ndi̱yà nínga kjuín án, xikó kase nga kiꞌmíyetjén, ¡mejénna sa̱ꞌinkjatjosón an kjo̱a̱botíxomàa̱! Ngata̱ boeꞌéndièjín ji nga ndajín ka̱mataꞌin an, ti̱nde nga boeꞌéndièjín ji nga ni xi ndajiín kꞌo̱kajin an.

¹³⁵ Takéní kjo̱a̱ndàa̱, kó takoyèní kjo̱a̱botíxomàa̱.

¹³⁶ Ngaskande mején mána skjandá an, kjiꞌanga be an nga jmíjín xi tsꞌénkjátjosón.

¹³⁷ Ji Ne, kixi̱ jí, kó kixi̱ botíjé jí.

¹³⁸ Kjo̱a̱botíxoma xi ji katseꞌéjne̱ ji̱n, kixi̱ boá, kó má maꞌniátakón.

^139-141 Kondra̱na ni̱ma̱kjo̱a̱ tsꞌénkꞌijñána, ta̱nga an tsꞌenchíyàjín an kjo̱a̱botíxomàa̱. Achichí ꞌniú tsꞌenxchán án, ngatꞌa̱ kui xotaa̱ tsꞌénkjátjosónjín. Ta̱nga an, tjóna kjo̱a̱botíxomàa̱, ngatꞌa̱ kuí boá xi xikoó to̱nsinié xi kui soboá soboaá.

¹⁴² Ngatsjéni̱xtjin nga kixi̱ niꞌín ji ni xi niꞌín, kó ja̱koxi̱ boá kjo̱a̱bokoyáa̱.

¹⁴³ Kjiꞌanga ndasen tikòn an, ko̱jo nga kjo̱a̱xti tjínna, kjo̱a̱botíxomàa̱ boá xi kjo̱a̱tsjana.

¹⁴⁴ Ngatsjéni̱xtjin nga kixi̱ kjo̱a̱kitìi̱, ¡te̱ꞌéní nga nda ka̱makjínna, ko̱jo nga tsie ngase kotíjña̱ an!

^145-146 Ji Ne, ngayejení ngaꞌniúna nga chjiaá ji, ¡ti̱ꞌinsénní, kó ꞌna̱xiéꞌéní! ¡Mejénna sa̱ꞌinkjatjosón an kjo̱a̱botíxomàa̱!

¹⁴⁷ Achichí ta̱jñó fostjíe̱n an, tsi̱ꞌe̱ nga kuíꞌaá nga ko̱si̱ke̱jení, ngatꞌa̱ ꞌniáko̱n an ée̱n.

¹⁴⁸ Nga ngo ni̱xtji̱e̱e̱n nga foféjín an kjiꞌanga tsꞌenkjó án ée̱n.

¹⁴⁹ Ji Ne, jí boá xi ngayeje kjo̱a̱tjoó, ¡ndaꞌyéní! Jí boá xi ngayeje kjo̱a̱kixi̱i̱, ¡te̱ꞌéndièní nga kotíjña̱ ngase an nga̱sondie!

¹⁵⁰ Jè ndyi̱tsꞌèntíñatꞌana yojoo̱ kui xota̱ xi je katsꞌénkjii̱n kjo̱a̱bokoyáa̱, kó mejeén nga ndajín ka̱mana.

¹⁵¹ Ta̱nga ji Ne, achichí tiña tindyinní, kó ꞌniáko̱n án kjo̱a̱botíxomàa̱.

¹⁵² Jè tsienii̱ nga be an ée̱n, kó jí boá xi ikꞌíjñí ji ngatsjéni̱xtjin.

¹⁵³ ¡Tsitsíjìi̱n kjo̱a̱ni̱ma̱ xi tsꞌénfoaꞌatio an, kó ꞌna̱xiéꞌéní! ¡Tsꞌenchíyàjín an kjo̱a̱bokoyáa̱!

¹⁵⁴ ¡Tasíke̱jení, kó ꞌna̱xiéꞌéní! ¡Ti̱ꞌinkjatjosén ji ni xi kiꞌmíyetjén, kó ti̱ꞌinꞌnítakínní!

^155-158 Ji Ne, achichí nda ji xota̱, jí boá xi ngayeje kjo̱a̱kixi̱i̱. ¡Te̱ꞌéndièní nga kotíjña̱ ngase an nga̱sondie! Kondra̱na ko̱jo xota̱ xi tjimátji̱ngina achichí kjín mi̱ je ma, ¡kui xota̱ xi ndajiín ko̱ꞌna̱xiéꞌéjín ji, ngatꞌa̱ jmí tsi ki̱a̱ tjimátji̱ngi kjo̱a̱bokoyáa̱! Chꞌóna kui xotaa̱, ngatꞌa̱ sꞌijinjiín ni xi kiꞌmíyetjén, ta̱nga an, ngatsjéni̱xtjin nga ntꞌieꞌée̱n ée̱n.

¹⁵⁹ Ji Ne, tsitsíjìi̱n kókjiꞌi tjóna kjo̱a̱botíxomàa̱, ¡ta̱ngatꞌanii̱ kjo̱a̱tjóo̱, te̱ꞌéndièní nga kotíjña̱ ngase an nga̱sondie!

¹⁶⁰ Ngayeje ée̱n, kjo̱a̱kixi̱i̱ yaꞌanii̱, ngayejee̱ nga kixi̱, kó ngatsjéni̱xtjin nga tikón.

¹⁶¹ Tsakjonjín an xota̱ xi tjiín ngaꞌniú xí ndyi̱mongatji̱ngina, ta̱ ée̱n tsí xi tsꞌénkjátsié mána nga ntꞌièe̱.

¹⁶² ¡Kuí boá xi tsie ngase kjo̱a̱tsja tsjána, ta̱bo̱a̱jiín tsi ngo ni to̱nsinié xi kasakona!

¹⁶³ Chꞌóna kjo̱a̱ndisoo̱, ¡kó tsjajín mána! Ta̱nga tjóna kjo̱a̱bokoyáa̱.

¹⁶⁴ Achichí kixi̱, kó fendajín an nga tsꞌéntsjaà.

¹⁶⁵ Xota̱ xi tjoó ée̱n, achichí kjo̱a̱xió ꞌbeé, kó jmíni̱xtjin stingí.

^166-168 Ji Ne, tsꞌénkoya an nga ko̱ꞌna̱xiéꞌéní, ngatꞌa̱ tjóna kjo̱a̱botíxomàa̱. Jè yé ji nga ngayejení ini̱ma̱na nga tsꞌenkjatjosón an.

^169-170 Ji Ne, ¡chjábé jí kjo̱a̱ndokjo̱a̱na, ko̱jo nga ꞌniú chjiaá! ¡Te̱ꞌéndièní nga ka̱makjínna, kó ꞌna̱xiéꞌéní, xikó má tsꞌén je kaseyetjén ji!

¹⁷¹ Án boá xi siee só nga sa̱ꞌintsjaá, ngatꞌa̱ jí boá xi bokoyéní ée̱n.

¹⁷² Sa̱ꞌintsjáa̱ én xí kiꞌmíyetjén, ngatꞌa̱ kixi̱ boá ngayeje kjo̱a̱botíxomàa̱.

¹⁷³ Ja̱bíꞌi̱n, kó te̱ꞌéní ndse̱, ngatꞌa̱ jè katsjáa̱ko̱n án nga ji xi kuintꞌieꞌeén.

¹⁷⁴ Ji Ne, achichí je tsꞌénkoya an nga ko̱ꞌna̱xiéꞌéní. Kjo̱a̱bokoyáa̱ boá xi kjo̱a̱tsjana.

¹⁷⁵ Te̱ꞌéndièní nga kotíjña̱ ngase an nga̱sondie, kó sa̱ꞌintsjaá, ¡ée̱n boá xi ngatsofóniúna!

¹⁷⁶ Tsoꞌbá án xikoó ngo cho̱tsa̱nga̱ xi kichajá, ja̱bíndyi̱sení, ngatꞌa̱ jí boá xi ndi̱a̱na ji, kó jè tjíjinko̱n an kjo̱a̱botíxomàa̱.