Xo̱jo̱n Salmoo̱ 118 - Xo̱jo̱n eén Néná

Néná tjoó ñá

¹ ¡Si̱ꞌantsjàa̱ Néná! ¡Ko̱e̱ꞌée̱ ndokꞌóchji̱ì, ngatꞌa̱ achichí ndaxota̱! ¡Ngatsjéni̱xtjin nga tjoó ñá!

² Ngotjón ngotjón bi̱ nga tsó xota̱ Israee̱l: «¡Néná ngatsjéni̱xtjin nga tjoó ñá!»

³ Ngotjón ngotjón bi̱ nga tsó chináꞌmii̱: «¡Néná ngatsjéni̱xtjin nga tjoó ñá!»

⁴ Ngotjón ngotjón bi̱ nga tsó xota̱ xi tsꞌéntsjaà Néná: «¡Néná ngatsjéni̱xtjin nga tjoó ñá!»

⁵ Kjiꞌanga achichí nda̱ kjimana, tsíchji̱a̱a̱ Néná, kó kuí katsꞌénsénna, ¡kó jaꞌáxínna kui ni xi kjimana!

⁶ Néná boá xi tikónjo̱na: tsakjonjín an. Ngojín xi ka̱maa̱ nga ni xi ndajín sa̱ꞌínjo̱na,

⁷ Néná boá xi tikónjo̱na, kó kuí boá xi bosikójona. ¡Be án nga ja̱koxi̱ boá nga skuie an, nga si̱ꞌankjie xota̱ xi chꞌoo̱ an!

⁸ Chjí ngasenii̱ nga Néná xí ka̱maꞌniátakón, ta̱bo̱a̱jiín tsi xota̱ nga̱sondiee̱.

⁹ Chjí ngasenii̱ nga Néná xí ka̱maꞌniátakón, ta̱bo̱a̱jiín tsi xota̱ xi yandikoón.

^10-11 Ngayeje xota̱ na̱xi̱ńdaá íchjáꞌyána, íchjáꞌyá ndo̱jò ndójo̱na, ta̱nga Néná asíko̱jona tsi̱ꞌe̱ nga katsꞌée̱n.

¹² Jaꞌatjiyajonna xikó maá xo̱ꞌbo̱e̱e̱, ta̱nga kití ngi̱jin ndiꞌií xikó maá ndaꞌyaá, ¡Néná boá xi asíko̱jona nga katsꞌée̱n!

¹³ Katsangińña xchánna tsi̱ꞌe̱ nga sti̱ngí an, ta̱nga Néná kjindibákasikójona.

¹⁴ Néná boá xi tsjána ngaꞌniú, Néná boá xi tsjána nga sie an, ¡Néná boá xi ꞌboxiéꞌána!

^15-16 Xota̱ xi kixi̱i̱ ki̱a̱ ndiꞌaa̱, bi̱ nga tsó nga nga kjandayà tsja: «¡Néná katsꞌénkjién ngaꞌniuú, kó kuí boá xi katsꞌénni! ¡Si̱ꞌantsjà kjo̱a̱a̱ ngaꞌniú xí tjiín!»

¹⁷ Kji̱e̱ mejénjínna ko̱yà án. Mejénna kotíjña̱ ngase an, tsi̱ꞌe̱ nga to̱kó kuichjiára an ni xi je katsꞌén Néná.

¹⁸ Achichí ꞌniú atíjéna, ta̱nga katsꞌénkꞌiénjínna.

^19-20 ¡Chjáxꞌájnúꞌun ndi̱yà, jún nga̱ntjo̱a̱a̱ na̱ngo̱xi̱i̱ Néná! Ki̱a̱ nínga tindyiónjnú, ta̱kuítsí xi foaꞌa xota̱ xi Néná kixi̱ kjimaa̱. ¡Chjáxꞌájnúꞌun ndi̱yà, ngatꞌa̱ mejénna nga tsjàa̱ ndokꞌóchjì Néná!

²¹ ¡Ndokꞌóchji̱ì ji Ne, ngatꞌa̱ kiniꞌínsénní, kó kaꞌnaxiéꞌéní!

²² Ndi̱jo̱ xi katsꞌénchꞌó já chji̱ni̱e̱xo̱ó xí katsꞌénda na̱ngo̱xi̱i̱, kuí boá xi kamá ndi̱jo̱ ngaꞌniuú.

²³ Achichí fíndikónná kuí nii̱, ngatꞌa̱ Néná boá xi katsꞌén.

²⁴ Si̱ꞌán ngo sꞌué kuí ni̱xtjii̱n, ngatꞌa̱ ngo má ni̱xtjin xikoó xi̱ꞌbi̱, kjiꞌanga Néná katsꞌén ni nganda tsa̱ñá.

²⁵ Ji Ne, ji Ne, ¡ꞌna̱xiéꞌéjne̱, kó te̱ꞌéndiè ji nga nda ku̱i̱ndyionjne̱!

²⁶ ¡Ngatamachikonñé re xi tsꞌéndibání jaꞌeén Néná! Ndeskande na̱ngo̱xi̱i̱ Néná ndyi̱niꞌánchikonñéjne̱ ngayeje jún.

²⁷ Néná boá xi tsꞌentsíjenná. ¡Si̱ꞌanchòo̱n ṉchaa̱n, kó nijan tjianjo̱ kuí xota̱ na̱xi̱ńdaá!

²⁸ Jí boá xi Néna, kuíni nga tsjaa ndokꞌóchjì, kó tsꞌéntsjaà kjo̱a̱a̱ kjo̱a̱je xi tjiín.

²⁹ ¡Si̱ꞌantsjàa̱ Néná! ¡Ko̱e̱ꞌée̱ ndokꞌóchji̱ì, ngatꞌa̱ achichí ndaxota̱! ¡Ngatsjéni̱xtjin nga tjoó ñá!