Xo̱jo̱n Salmoo̱ 116 - Xo̱jo̱n eén Néná

Jè ka̱ma nda kjófé an

¹ Tjóna Néna, ngatꞌa̱ ntꞌiéna kjiꞌanga ꞌniú chjiáa̱.

² Ngatsjéni̱xtjin nga kotíjña̱ an, kui kuichjiáa̱ ngatꞌa̱ ntꞌiéna.

³ Kjo̱a̱bo̱yaa̱ jè íjñaꞌniúna katsaki, achichí katsakjon an nga ko̱yà án. ¡Achichí ꞌniú nda̱ kamána!

⁴ Kósꞌe̱ kjiꞌá boá nga ꞌniú tsíchji̱a̱a̱ Néná tsi̱ꞌe̱ nga kꞌo̱xiéꞌána.

⁵ Kixi̱ boá Néna, kó tjiín kjo̱a̱chiyákjo̱a̱, kuí boá ngo Ne xi mejeén ñá ko̱jo xi tjoó ñá,

⁶ xi koo̱n xota̱ xi májiín ꞌboxiéꞌá soboá yojoo̱. Án kisꞌiejínna ꞌyá xí kꞌo̱xiéꞌána katsaki, kó kuí kjindibákasikójona.

⁷ Ji Ne, achichí nda niꞌínje̱ní, jè ka̱ma nda kjófé an.

⁸ Kaꞌnaxiéꞌéní ngi̱ya tsja kjo̱a̱bo̱yaa̱, kiniꞌíntsjiejìn ji ndándyíkón án, kó katseꞌéndièjín ji nga tsꞌáka an.

^9-10 Tji̱e̱nga tikón an nga̱sondie, ngatsjéni̱xtjin kuintꞌieꞌeén. Jí boá xi kjimaꞌniátakoón, ji Ne, ndatsi tsꞌenkie an yojona nga achichí ndasen tikón an.

¹¹ Achichí tsá je bo̱a̱ kixian an nga nde ngojín xi ma maꞌniátakón.

¹² Ji Ne, kótsꞌèn ka̱mana kꞌuichjií ngayeje kjo̱a̱nda xi kiniꞌínní.

¹³ Ja̱ tsjaa ndokꞌóchji̱ì, kó kuichjiaá nga sa̱ꞌinkjièn án jaꞌée̱n,

¹⁴ kó sa̱ꞌinkjatjosón an ni xi kixiyatjón an nga sa̱ꞌin an, ngindyi̱ko̱n xota̱ na̱xi̱ńdáa̱.

^15-16 Ji Ne, achichí on maá kjiꞌanga fesón xota̱ xi ji tjoó. ¡ꞌNa̱xiéꞌéní ngi̱ya tsja kjo̱a̱bo̱yaa̱, ngatꞌa̱ xáa̱ xí tjítsꞌen an!

¹⁷ Ngaskande nínga tikón ṉchandikóo̱n kjuínjo̱ an ngo kjo̱a̱tjó nga tsjaa ndokꞌóchji̱ì, kó kuichjiaá nga sa̱ꞌinkjièn án jaꞌée̱n.

^18-19 Ki̱a̱ ndi̱tsee̱n na̱ngo̱xi̱i̱, ki̱a̱ ngamasiee̱n na̱xi̱ńdáꞌniú Jerusale̱n, ko̱jo ngindyi̱ko̱n ngayeje xota̱ na̱xi̱ńdáa̱, sa̱ꞌinkjatjosón an ni xi kixiyatjoón nga sa̱ꞌin an. ¡Si̱ꞌantsjàa̱ Néná!