Xo̱jo̱n Salmoo̱ 115 - Xo̱jo̱n eén Néná

Néná boá xi chjiéngá si̱ꞌandikón

¹ Jí boá xi tsoboaá nga si̱ꞌantsjaa̱ ji Ne, kó jmí tsi ji̱n, Jí boá xi tsoboaá nga si̱ꞌantsjaa̱ ji Ne, ta̱ngatꞌanii̱ kjo̱a̱tjóo̱ ko̱jo kjo̱a̱kixi̱i̱.

² Xota̱ na̱xi̱ńdá xi ngasee̱ bosíyá nga mojnókiejne̱, kó bi̱ tsó: «Ñá tikón Nejnú ngotꞌe̱ ꞌne̱»

³ ¡Ta̱nga ji ki̱a̱ tindyin ji nkꞌajmii̱, kó niꞌín ji ngayeje ni xi mejeén si̱ꞌin ji!

⁴ Ni xi ne ndyi̱tsoó kui xota̱ na̱xi̱ńdaá, ni xi to̱nsinié ko̱jo ni xi to̱ntiboa boá, ¡ni xi katsꞌénda xota̱ nga̱sondiee̱ boá!

⁵ Kó mí nii̱ bo̱a̱ xi tjiín kui nii̱. Tjín tsꞌoa, kó májín chji̱a̱, tjín ndyi̱ko̱n, kó májiín be,

⁶ tjín tji̱bo̱a̱nijon, kó májiín ntꞌié, tjín ṉtjo̱n, kó májiín koje̱n,

⁷ tjín tsja, kó májiín niꞌánjo̱, tjín sé, kó májiín fí, tjiín na̱xo̱, ¡ta̱nga nde ngo én fotjojiín tsꞌoa!

⁸ Bo̱a̱ kón xikoó kui nii̱, kui xota̱ xi ndyi̱tsꞌèndaa̱, ko̱jo kui xi kui nii̱ kjimaꞌniátakón.

⁹ Jún xota̱ Israee̱l, ti̱ꞌanꞌniátakónjnú Néná, ¡kuí boá xi bosikójoná ko̱jo xi kónná!

¹⁰ Jún xi chináꞌmijnú, ti̱ꞌanꞌniátakónjnú Néná, ¡kuí boá xi bosikójoná ko̱jo xi kónná!

¹¹ Kó jún xi niꞌándikónjnú Néná, ti̱ꞌanꞌniátakónjnú Néná, ¡kuí boá xi bosikójoná ko̱jo xi kónná!

¹² Néná foaꞌátsjiee̱n ñá, kó ꞌbikítsie máná kjo̱a̱niꞌánchikonñé: Tsꞌénchíkonñé xota̱ Israee̱l, tsꞌénchíkonñé chináꞌmii̱,

¹³ kó tsꞌénchíkonñé xota̱ xi tsꞌéndíkón, tsi xota̱ xi yandikón, ko̱jo tsi xi yandikónjín.

¹⁴ ¡Néná ngatsꞌénchíkonñé ngasejnú jún ko̱jo ndíjnú!

¹⁵ ¡Néná ngatsꞌénchíkonñéjnú jún, kui Néná xí katsꞌénda nkꞌajmii̱ ko̱jo tꞌanangii̱!

¹⁶ Ngayeje nkꞌajmii̱, tsi̱ꞌe̱ Néná boá, kó ñá boá xi katsjáná tꞌanangii̱ nga kamáꞌniátakónná.

¹⁷ Xota̱ xi je jesoón, jé kijí nga̱sondie nínga xió kjiꞌii̱, kó ngiti̱ májiín tsꞌéntsjaà Néná,

¹⁸ ¡ñá boá xi tsoboáná nga si̱ꞌantsjàa̱, ngotꞌe̱, ko̱jo ngatsjéni̱xtjin! ¡Si̱ꞌantsjàa̱ Néná!